Read Uab Meto KISAH RASUL-RASUL 13 Bible Online

KISAH RASUL-RASUL 13 - Uab Meto bible

KISAH RASUL-RASUL 13

¹Ma anbi tolas aknino bi kot Antiokhia anmu'i Mafefa knino ma anoni sin, esle' Nai Barnabas ma Nai Simeon le nakhata in kanan Nai Metan, ma Nai Lukius atoni Kirene, ma Nai Menahen le anhao nanaeb nok Kesel Nai Herodes, ma Nai Saulus.

²Leka sin fe anonen neu Uisneno ma nanahok onane te Smanan Knino nak, “Bet maikan Kau Nai Barnabas ma Nai Saulus neu mepu le Au he lekan sin.”

³Ma sin nanahok ma an onen toti oke te antek alekot neu Nai Barnabas ma Nai Saulus ma ansonu sin nao.

⁴Natuin Smanan Knino es ansonu sin, onane te Nai Barnabas ma Nai Saulus sin anao neu Seleukia ma ansae bnao anao neu Siprus.

⁵Leka sin ante bi Salamis, sin an etun a'an Uisneno bi ume buat atoni Yahudi. Ma Nai Yohanes nok sin hen bab sin mepu.

⁶Ma sin nao natef pah nane talan te Pafos. Bi Pafos sin nae'ku nok atoni Yahudi mese kanan Baryesus. In atoni ahin ela ma Mafefa knino moel kun,

⁷in nok kumlol Nai Sergius Paulus atoni ahinet bi pah nane. Ama kumlol anboin Nai Barnabas ma Nai Saulus he neman fun in lomi he nen a'an Uisneno.

⁸Mes Nai Elimas — in kanan natuin a'at Yunani — , amo'e ela nane, in nasenib sin ma anlomi he ama kumlol kais nekan nateb neu Yesus.

⁹Mes Nai Saulus le antek amsa nak: Nai Paulus nahenu nok Smanan Knino ankiso atoni amo'e ela nane,

¹⁰ma nak, “Hoi Nitu menu, ho nekam nahenu nok lasi ak'elo ma lasi amle'ut. Ho mumusu mok lasi alekot, musnas nai mu'ko mupenub Lanan Amneot le Uisneno ini kun!

¹¹Hom kius mit, Uisneno In niman neu ko, of ho matam anfolo ma ho ka mitaf manas in pinan tal neno fauk.” Ma naskek onane te Nai Elimas in natnin onle nipu ma mesokan ana'mu nan ma in akapoe he nami atoni hen topu.

¹²Leka ama kumlol nit lasi nane te in nekan nateb neu Usif Yesus; fun in nekan ansanmak neu Uisneno In lasi noina nane.

¹³Oke te Nai Paulus nok in ini sin nao nasaitan Pafos ma ansae bnao nao neu Perga bi pah Pamfilia; mes Nai Yohanes nasaitan sin ma anfani neu kot Yerusalem.

¹⁴Ma sin na'ko Perga sin naon finin ma ante bi Antiokhia pah Pisidia. Ma sin antam bi ume buat nok Neno Snasat ma antokon.

¹⁵Leka anso'i nalali Nai Musa in sulat ma Mafefa knino sin sulat, ale nakaf ume buat nane anlelu natan Nai Paulus nok in ini sin ma nak, “Hai bae ki, kalu hi mu'i uab ai molok he meki fainekat ma halinat neu to i, haim fe ki leku mainuan!”

¹⁶Ma Nai Paulus anfen ma anhosen sin neki niman ma nak, “Hoi atoni Israel ma hi ala ki le hi mimtausan Uisneno, him nen nai!

¹⁷Uisneno neu to Israel i, anbeti hit am uf sin ma nanaeb sin, leka sin anbi pah Mesir on atoni anao amnemat. Ma nok In niman matua kuasat In antopu napoitan to Israel na'ko pah Mesir.

¹⁸Ma In anseusaban sin mo'et ton bo'ha bi mnesat paha asnean.

¹⁹Ma leka nale'un uf hitu bi pah Kanaan, In anbati pah nane neu sin hen fani sin ini kun,

²⁰oni ton natun ha ma bo'nim. Nalali te In anfe sin alef lasi talan te batan Mafefa Knino Nai Samuel.

²¹Ma namuni te sin antoti kesel ma Uisneno anfe sin Nai Saul, Nai Kisy anmone na'ko uf Nai Benyamin hen fani kesel neu sin ton bo'ha.

²²Ma leka sin antite Nai Saul, Uisneno naiti Nai Daud hen fani kesel neu sin. Ma Uisneno nakua a'an antom Nai Daud, nak: Au upeni Nai Daud, Nai Isai anmone, atoni le anmatom nok Au nekak ma anmo'e natuin Au lomik.

²³Ma na'ko Nai Daud in sufan, namnes nok In lasi manta'en, Uisneno nahakeb Kesel Afetin neu to Israel, esle' Yesus.

²⁴Ma nahunu na'ko Yesus he nem, Nai Yohanes anhunun neu to Israel he nate'un sin nekan ma neki sin aon he naslani sin.

²⁵Ma leka Nai Yohanes haumak he nasopu in mepu onane te in nak: Hi mitenab mak oni In esle' Au, mes kahaf, fun of In nem namunin kau. Ma au ka tam fa ota he sefi In tani penhae.

²⁶Bae benu al ki, le Nai Abraham sufan ma alki le mimtaus Uisneno, lasi honis nane Uisneno anfe nalali neu kit.

²⁷Fun ale atoni le namaika bi kot Yerusalem ma atopu to Yahudi, sin kan simof Yesus. Mes sin naiti fekat he namate Yesus ma natiaba nani Mafefa knino sin sulat le anso'i nani anbi neno-neno Snasat.

²⁸Ma sin ka napeni fa lasi sa' le anfani lasi matan he namate In, mes sin antoti Nai Pilatus he nati' namate Yesus.

²⁹Ma leka sin natis ale sa' le antui nani antom Yesus te sin nasanut nani na'ko hau nehe ma natupa In aon nitu anbi nopu naukel.

³⁰Mes Uisneno nafena nafani na'ko amates sin balan.

³¹Ma bi neno fauk-fauk In nalilon neu sin le nao nokan na'ko pah Galilea neu kot Yerusalem. Ma muni i sin es anfani saksi neu to Israel.

³²Ma haim etun lasi knino nane neu ki, sa' le Uisneno anmantaen neu hit am uf sin,

³³Uisneno natis nalali neu kit, neu sin sufan, fun nafena nafani Yesus onle antui nani anbi Sit Pules bata nua nak: Au Anmone Ko! Bi neno i Au uhonis ulali Ko.

³⁴Ma Uisneno nafena nafani In na'ko amates ma of ka nana'at nafani fa In neu nopu maten. Lasi nane Uisneno naton nani bi In a'an nak: Au he utisi neu lasi mataen knino le of natiabon, le Au fe ulali neu Nai Daud.

³⁵Es nane In naton nani anbi sulat Sit Pules bian nak: Of Ho ka mumautu fa Ho Atoni Knino nabala bi nopu maten.

³⁶Fun Nai Daud afi natisi nalali Uisneno In lomin, oke te in anmate ma ansub nani nok in am uf sin ma in namle'u bi nopu maten.

³⁷Mes Yesus le Uisneno nafena nafani ka on fa nane.

³⁸Ma mihin nai, bae benu alki fun natuin In es, an etun lasi sako sanat neu ki.

³⁹Ma anbi In amsa ale atoni le ampalsai of mipeni sako sanat le hi ka mipeni fa na'ko plenat Nai Musa.

⁴⁰Es nane te ampanat nai, he nati' kais hi mipeni sa' le antui nani bi Mafefa knino sin sulat nak:

⁴¹Mimnau nai, ale hi asi'ut, mimkak nai ma mimneku nai, fun Au mo'e mepu mese bi hi batan, mepu le hi nekam ka nateb nani fa, leka es an etun nani neu ki.”

⁴²Leka Nai Paulus ma Nai Barnabas anpoi na'ko ume buat nane te, sin antoti he nati' na'uab anteni lasi neno snasat amnemat.

⁴³Leka leku luli besa namsopu onane te ale atoni Yahudi ma atoni na'ko uf bian sin natuin Nai Paulus ma Nai Barnabas. Ma sin nua sin namolok nok sin ma anfainek sin he nati' sin nabala anbi halinat Uisneno.

⁴⁴Ma bi Neno Snasat amnemat ale to anbi kot nane nem ok-oke he natnin a'an Uisneno.

⁴⁵Mes leka atoni Yahudi sin nit to amfaun nane te sin nato' ma nasi'u ma antite sa' le Nai Paulus na'uab nani.

⁴⁶Mes Nai Paulus ma Nai Barnabas sin na'uab nok nek mainuan nak, “Namneo hen etun a'an Uisneno nahunu neu ki, mes natuin him tite ma hi mak hi kam tam fa ota he mipeni lasi honis. Es nane hai misaitan ki ma haim nao meu pah mesokan.

⁴⁷Fun lasi i Uisneno es anlek nani neu kaim nak: Au lek ko he nati' amfani meusine neu ale to le ka nahin Uisneno, he nati' meki lasi honis neu pah pinan.”

⁴⁸Leka ale to le ka nahin Uisneno sin nen lasi nane te sin namlil ma naliatas a'an Uisneno. Ma ale to le Uisneno anlek he napeni honis, sin nekan nateb knino.

⁴⁹Oke te a'an Uisneno nasitbon kun neu pah nane funam natef.

⁵⁰Ma atoni Yahudi sin anfuli ale bife makana ma ale anaet-anaet le namtaus Uisneno bi kot nane he neki hamu'it neu Nai Paulus ma Nai Barnabas ma anli'u sin na'ko pah nane.

⁵¹Mes Nai Paulus ma Nai Barnabas antekal afu na'ko sin haen, on amnaut neu sin, oke te sin nao neu Ikonium.

⁵²Ma asimo lasi bi Antiokhia sin nahenu nok Smanan Knino.