Read Uab Meto KISAH RASUL-RASUL 14 Bible Online

KISAH RASUL-RASUL 14 - Uab Meto bible

KISAH RASUL-RASUL 14

¹Ma bi Ikonium sin nua sin antam neu atoni Yahudi sin ume buat ma nanoina sin onane, talan te atoni Yahudi ma atoni Yunani namfau nekan nateb knino neu Yesus.

²Mes atoni Yahudi le nekan ka nateb, sin nakoke atoni le ka nahin Uisneno sin nekan talan te sin nato'an ale atoni le nekan nateb neu Yesus.

³Ma Nai Paulus nok Nai Barnabas namaika nok sin neno fauk anbi nane. Mes sin nanoina nok nek mainuan, fun sin nekan nateb Uisneno. Ma Uisneno anhatan beno antom In halinat ma anfen sin kuasat hen mo'e taka ma lasi amkakat neu to.

⁴Mes ale atoni bi kot nane anbatiok fani pukan nua. Bian anhake nok atoni Yahudi ma bian anhake nok Nai Paulus ma Nai Barnabas.

⁵Oke te to mesokan ma to Yahudi nok sin nakaf-nakaf anmo'e taisibu hen hamu'i ma anpoli haefin nane neki fatu.

⁶Leka haefin nahin lasi nane te sin naskotun neu kot-kot bi Likaonia, esle Listra ma Derbe bale bian funam natef.

⁷Ma sin an etun Lasi Knino bi kot-kot nane.

⁸Ma bi kot Listra anmu'i atoni mese le antoko ha natuin in haen an ole na'ko fe nahonis talan te in ka nao nitaf.

⁹In antoko ma natnin Nai Paulus in uab nane. Oke te Nai Paulus ankiso in nak, in nekan nateb knino ma of naleko kun.

¹⁰Nalali te Nai Paulus nak neune, “Hom fen nai ma menu ho haem!” Ma atoni nane anfen ma in nao.

¹¹Ma leka sin nit sa' le Nai Paulus anmo'e nani te sin anbai neki a'an Likaonia nak, “Uisneno ansanu nem es hi atnanam nahumbon on mansian.”

¹²Ma sin antek Nai Barnabas nai Zeus ma sin antek Nai Paulus nak Hermes fun in es na'uab.

¹³Oke te Zeus in ana' fuat le in ume fuat bi kot kotin nem ma neki bia keso ma tuna' neu kot enon he neki fuat nok ale to neu haefin nane.

¹⁴Ma leka Nai Paulus ma Nai Barnabas sin nen lasi nane te sin anpisu sin bael pake ma naen antam neu to amfaun nane ma sin anbai nak,

¹⁵“Atonin hi mo'e sa' ka? Hai amsa mansian onle hi. Hai aim meu i hem etun ki Lasi Knino he nati' hi misaitan hi mo'et amle'ut ma amfani aim meu Uisneno amonit le anmepu neno tunan ma pah pinan, tasi nok in nesan ok-oke.

¹⁶Le bi batan afinit, In namautu ale uf he nao natuin sin lanan kun.

¹⁷Mes In ka nikan fa he nalile In mo'et alekot, esle nasanut ulan na'ko neno tunan he nabalub pah neu ki. In nahenu hi nekam neki haot ma amlilat.”

¹⁸Maski haefin sin na'uab onane, ka nakain nabe'i sin he neki fuat neu sin.

¹⁹Mes atoni Yahudi sin nem na'ko Antiokhia ma Ikonium ma anfuli to nane hen hake nok sin. Oke te sin anpoli Nai Paulus neki fatu ma anhel napoitan neu kot kotin, fun sin natenab nak anmaten.

²⁰Mes leka asimo lasi anhake natef nan, in fen ma antam neu kot. Nokfa onane in nok Nai Barnabas nao neu kot Derbe.

²¹Nai Paulus ma Nai Barnabas an etun Lasi Knino bi kot Derbe ma anmu'i atoni namfau le nekan nateb neu Yesus. Oke te sin anfani neu kot Listra ma kot Ikonium ma kot Antiokhia.

²²Ma bi kot-kot nane sin anhatane asimo lasi sin nekan ma anfainek sin he nati' sin nekan nateb nabala neu Yesus fun nak he tam teu Plenat Uisneno hit mes atsutai mafena namfau.

²³Ma bi pukan-pukan knino nane Nai Paulus ma Nai Barnabas anbeti penatua-penatua, nalali te sin anonen toti ma nalenok, sin natnat penatua-penatua neu Uisneno le sin nekan nateb knino neune.

²⁴Nalali onanete Nai Paulus ma Nai Barnabas anao anteni anfinin Pisidia ma ante Pamfilia.

²⁵Ma sin an etun a'an Uisneno bi Perga, sin nao neu Atalia bi tasi ninen.

²⁶Ma sin ansae bnao na'ko Atalia anfani neu kot Antiokhia le afi nana'at neu sin halinat Uisneno he naiti mepu le sin anmepu nalali.

²⁷Leka sin ante kot Antiokhia sin nabuab tolas aknino ma an etun ale sa' le Uisneno anmo'e nani natuin sin, ma nak Uisneno nasoitan eno he nati' ale uf-uf bian amsa nekan nateb knino neu Yesus.

²⁸Ma Nai Paulus ma Nai Barnabas namaika nok asimo lasi sin bi kot nane suk a'lo.