Read Uab Meto KISAH RASUL-RASUL 16 Bible Online

KISAH RASUL-RASUL 16 - Uab Meto bible

KISAH RASUL-RASUL 16

¹Ma Nai Paulus nem amsa neu Derbe ma neu Listra. Ma anbi nane anmu'i atoni mese kanan Nai Timotius. In ainaf bife Yahudi le nekan nateb knino, ma in amaf nane atoni Yunani.

²Ma ale bae knino sin bi Listra ma Ikonium nahin Nai Timotius on atoni alekot.

³Ma Nai Paulus anlomi he Nai Timotius nokan neu mepu; es nane Nai Paulus anlelu hen heli in fun ale atoni bi pah nane, nahin nak in amaf nane atoni Yunani.

⁴Leka sin nao anfin ale kot nane Nai Paulus ma Nai Silas natonan sin ale fekat le haefin ma penatua sin nafek nani bi kot Yerusalem he nati' tolas aknino mo'e natuin.

⁵Ma ale tolas aknino napeni be'it anbi nek ateb knino talan te sin ain ansato piut.

⁶Ma sin nao anfini neu pah Frigia ma pah Galatia, fun Smanan Knino nakain sin he kais an etun Lasi Knino bi pah Asia.

⁷Leka sin ante Misia sin hen tam neu Bitinia mes Yesus Ini Smanan Knino kan lomif.

⁸Ma sin anfin Misia neu Troas.

⁹Ma bi fai nane Nai Paulus nit mnitas mese nak: Atoni Makedonia mese anhake bi bale nane ma nak neune, “Lak aum nai neu Makedonia ma amtulun kai nai!”

¹⁰Leka Nai Paulus nit nalali mnitas nane, hai maim lanan hem lak laba neu Makedonia, fun hai mitenab mak mnitas nane Uisneno es no'en kai, he nati' haim etun lasi knino neu ale to bi pah nane.

¹¹Ma haim nao mi'ko Troas ma amlak neu Samotrake, ma nokfa haim tia Neapolis,

¹²ma hai mi'ko Neapolis meu Filipi, kot ahunut le tukan Makedonia ini, le atoni Roma natua anbin. Ma hai mimaika neno fauk anbi kot nane.

¹³Ma bi Neno Snasat haim poi mi'ko kot enon, ma haim nao meu noe ninen fun hai mitenab nane atoni Yahudi sin bale onen totis. Ma haim toko ambin, oke te mimolok mok bife-bife le nabuan bi bale nane.

¹⁴Ma bife mese kanan bi Lidia asosa tais bauk ulu tasi, na'ko kuan Tiatira. In bife atulu nekaf neu Uisneno, es nane Uisneno anfai in nekan talan te in nen ma antao nekan neu sa' le Nai Paulus na'uab nani.

¹⁵Leka naslani nalali in nok in ume nanan sin, in anhone kai nak, “Kalu hi mitenab au nekak nateb knino neu Yesus, aim he mimaika bi au ume.” In naseke kai tal haim simo mani.

¹⁶Anbi haefes leka haim nao meu bale onen totis nane, hai mieku mok ate bife mese le anmu'i sman nitu. Ma natuin kuasat nitu in napeni osa naek neu in tuanenu.

¹⁷Ia nao natuin Nai Paulus ma hai, oke te in anbai nak, “Atonin i Uisneno Amnanut In ate sin. Ma sin neman hen etun neu ki lanan honis.”

¹⁸Bife nane anhunun piut onane tal neno fauk. Mes leka Nai Paulus ka nalan nabe'i te in nak neu sman nitu nane, “Anbi Yesus Neno Anan In kanan, au lelu ko hem poi mu'ko bife i.” Ma bi leku nane amsa sman nitu anpoi.

¹⁹Leka bife nane in tuanenu nit lasi nane, ma sin of ka na'os anteni fa, sin anheke Nai Paulus ma Nai Silas, ma anhel neki sin neu masa' he nahakeb sin bi nakaf sin matan.

²⁰Leka nok sin nua sin nao neu ale anaet matan nalali te sin nak, “Atonin i sin bakalan hit kot fun sin atoni Yahudi kun.

²¹Ma sin nanoina halat, le hit on atoni Roma ka nabe'i het simo ma tatuin.”

²²Oke te atoni amfaun nane antumatan sin. Ma ale anaet bi kot nane sin anlelu hen pisu sin bael pake ma antepo sin.

²³Leka antepo nalali sin te neki sin antam neu o'of. Ma sin lelu nakaf apao o'of hen pao sin leko-leko.

²⁴Fun nakaf apao o'of ansimo nalali plenat onane te in natam sin neu o'of, ke'an atnanan ma antao nake matane neu sin haen.

²⁵Ma leka fai natnan Nai Paulus ma Nai Silas anonen toti ma ansi ma naliatas Uisneno ma atoni hukum bian natnin sin.

²⁶Ma naskek onane te nainunus naek talan te o'of in sukin nabeko. Ma ale eno natfai ma ale nake bi sin haen natkasu kun.

²⁷Ma nakaf apao o'of nane naskek ma anfen na'ko tupas. Ma in nit ale eno natfei ok-oke in faki suni he napau nison fun in natenab nak ale atoni hukum nane naen kukun.

²⁸Mes Nai Paulus in anbai ma nak, “Kais mule'un ho aom fun hai ala kai es i!”

²⁹Ma nakaf apao o'of nane anlelu neki paku, in naen antam ma na'tai, oke te anmof hae bi Nai Paulus ma Nai Silas in matan.

³⁰In nok sin anpoi, ma nak neu sin, “Tuan-tuan, au mo'e onme he upeni honis?”

³¹Nai Paulus ma Nai Silas natae nak, “So ampalsai nai neu Yesus Kesel Afetin of ho mupeni honis, mok ho ume nanan ale sin.”

³²Oke te sin an etun a'an Uisneno neun ma neu in ume nanan ala sin.

³³Ma bi leku nane amsa nakaf apao o'of nok sin nao ma anboe sin papa. Ma bi leku nane amsa in nok in ume nanan nana'at sin aon he naslani sin.

³⁴Oke te in nok sin nao neu in ume ma nabalab sin hen bukaen. Ma in nekan namlil fun in nok in ume nanan sin anfani apalsait neu Uisneno.

³⁵Ma nokfa onane te ale anaet kot nane anlelu he natonan nakaf apao o'of nak, “Mifetin atoni nua le nane!”

³⁶Oke te nakaf apao o'of natiaba lasi nane neu Nai Paulus ma nak, “Anaet-anaet kot anlelu nem he nafetin ki; es nane him poi nai ma amnao nai nok aomina!”

³⁷Mes Nai Paulus nak neu sin, “Sin antepo kai bi to amfaun sin matan ka nok fa lef lasi, fun hai atoni Roma kai. Oke te sin natam kai neu o'of. Leka me tomas i sin he napoitan kai nok tol-tolo' ka? Lasi ka on fa nane! So sin neman he napoitan kai.”

³⁸Ma ale nakaf nane sin natiaba a'at nane neu ale anaet kot sin. Leka sin nen nak Nai Paulus ma Nai Silas nane atoni Roma oke te sin namtau.

³⁹Ma sin neman fun na'uab leko-leko nok Nai Paulus ma Nai Silas. Oke te nok sin anpoi ma antoti he nati' sin nao nasaitan kot nane.

⁴⁰Fun sin anpoi na'ko o'of ma nao neu bi Lidia in ume. Ma leka sin nit bae knino anbi nane, sin anhalin sin oke te sin nua sin nao.