Read Uab Meto KISAH RASUL-RASUL 17 Bible Online

KISAH RASUL-RASUL 17 - Uab Meto bible

KISAH RASUL-RASUL 17

¹Ma Nai Paulus nok Nai Silas nao natuin lanan Amfipolis ma Apolonia ma nem ante Tesalonika. Ma anbi nane anmu'i ume buat atoni Yahudi.

²Ma Nai Paulus antam neu ume buat nane. Neno Snasat tenu ma'katuin in namolok nok sin a'at na'ko Sulat Knino.

³In anfainek sin ma naton neu sin, nak Neno Anan mes ansutai mafena ma anfen anfani na'ko amates balan ma in nak, “In kun Neno Anan Yesus le au eut ani neu ki.”

⁴Ma atoni bian na'ko sin nekan nateb ma namesbok nok Nai Paulus ma Nai Silas onane amsa atoni Yunani namfau le namtaus Uisneno ma bife makana sin namfau nekan nateb neu Yesus.

⁵Mes atoni Yahudi sin nekan namen ma anhok ale atoni abulalut bi masa' ma anmo'e slutuf bi kot nane. Ma sin nao neu Nai Yason in ume ma nami Nai Paulus ma Nai Silas he nok sin nao neu buat to sin matan.

⁶Mes leka sin ka napeni fa Nai Paulus ma Nai Silas, sin anhel neki Nai Yason ma bae knino sin fauk nao neu ale anaet kot ma anhunun nak, “Atonin le anmo'e taisibu bi me-me sin neman es i,

⁷ma Nai Yason ansimo sin namaika es in ume. Sin antanhai ale plenat kesel pah Roma ma an etun nak anmu'i Kesel bian le kanan Yesus.”

⁸Leka ale atoni ma ale anaet sin nen lasi nane sin nekan na'unu.

⁹Mes leka sin ansimo noni poh fefaf na'ko Nai Yason nok bae knino sin oke te nafetin sin.

¹⁰Ma anbi fai nane amsa bae knino sin anlelu Nai Paulus nok Nai Silas nao neu Berea. Leka sin ante Berea sin antam neu atoni Yahudi sin ume buat.

¹¹Mes atoni Yahudi bi kot nane naleko' nesi atoni Yahudi bi Tesalonika, fun sin ansimo a'at nane nok nek sinmakat ma neno-neno sin antae Sulat Knino he n ahin nak ale lasi nane anmneo onan ka.

¹²Ma anmu'i atoni namfau le nekan nateb neu Yesus. Ma to Yunani namfau ale bife ma atoni makana amsa nekan nateb neu Yesus.

¹³Mes leka ale atoni Yahudi na'ko Tesalonika sin nahin, nak Nai Paulus an etun a'an Uisneno bi Berea amsa, sin neman ma anfuli fun nakoke ale atoni sin nekan.

¹⁴Mes bae knino sin anlelu Nai Paulus he nao neu tasi ninen, mes Nai Silas ma Nai Timotius nabala bi Berea.

¹⁵Ma leka sin nasain Nai Paulus ante Atena, sin anfani nem neu Berea ma neki Nai Paulus in han ba'an he nati' Nai Silas ma Nai Timotius naon laba neune.

¹⁶Leka Nai Paulus fe anpao sin bi Atena, in nekan ansusal fun in nit kot nane nahenu nok le'u mahuma.

¹⁷Es nane anbi ume buat Nai Paulus na'uab nok ale atoni Yahudi ma atoni bian le namtaus Uisneno, ma anbi masa', neno-neno in na'uab nok ale atoni le in nae'ku nok sin.

¹⁸Ma ale atoni ahinet na'ko nonot Epikorus ma Stoa amsa anmasoal nokan ma bian nak, “Atoni fefa pakan nane na'uab nak sa' ka?” Mes bian sin nak, “Oni in an etun noina Uisneno teta kun.” Sin na'uab onane fun Nai Paulus an etun Lasi Knino antom Yesus ma antom lasi amates anfen anfani.

¹⁹Ma sin nok Nai Paulus neu buat anbi nu'af Areopagus ma nak, “Hai he mihin noina fe'u le ho munoina nane, nabe'i ka?

²⁰Fun ho munenab kai lasi fe'u, es nane haim lomi he mihin, ale lasi nane in oten he sa'.”

²¹Fun ale atoni Atena ma ale atoni anao amnemat le namaika anbi kot nane sin lomi hen pake sin leku mainuan he natnin ma namolok antom ale lasi fe'u nane.

²²Nai Paulus nao ma anhake bi Areopagus tunan ma nak, “Hi atoni Atena, au it nak anbi ale lasi hi mimtaus Uisneno teta.

²³Fun leka au' u on-oni bi kot i, au it hi bale onen ma anbi bale mese le hi meki fuat neun, au it tuis mese nak on i: Neu Uisneno le ka mahine fa. Nah, neu Uisneno le hi ka mihine nane, In kun esle au etun neu ki.

²⁴Uisneno le anmepu neno tunan ma pah pinan nok in nesan, In, es Uisneno neu neno tunan ma pah pinan, le ka namaika fa anbi ume le'u le anmo'e neki niman mansian,

²⁵ma niman mansian kan tuthae nani fa, onle In na'nuka sa'. Fun In kun es anfe honis ma smanaf ma ale sa' neu to pah pinan.

²⁶Na'ko atoni mese In anmo'e ale to pah pinan ma natua pah pinan. Fun In es anlek ale eti neu sin ma ale nakat neu sin bale maika.

²⁷He nati' sin nami In ma an ableo ma napeni nan In, fun In ka na'lo fa na'ko kit.

²⁸Fun anbi In hit atmoni, hit tabloti, hit esan onle hi atoni ahinet sin na'uab nani nak: Hit le i amsa Uisneno In sufan kit.

²⁹Fun Uisneno In sufan kit, kais hi tatenab, Uisneno namnes nok noni mnatu ai noni muti ai fatu mahuma le mansian anmo'e nani neki in hinen.

³⁰Fun hit lasi mono nane Uisneno nikan nani, ma tomas i Uisneno an etun neu mansian, he nati' sin napis na'ko sin sanat.

³¹Fun In anlek nani neno le hen lefi lasi pah pinan in nok amneot. Ma lasi nane nana'at nani neu atoni mese le Uisneno anbeti nani. Ma In anfe taka neu ale lasi nane esle nafena nafani atoni nane na'ko amates balan.”

³²Leka sin nen nak anfen anfani na'ko amates, bian naslaet ma bian sin nak, “Haefes anteni na' haim nen lasi nane.”

³³Oke te Nai Paulus anpoi na'ko sin atnanan.

³⁴Mes anmu'i atoni fauk le namesbok nok Nai Paulus ma anfani atoni apalsait esle Nai Dionisius, aof na'ko buat Areopagus, ma bife mese kanan bi Damaris ma atoni bian amsa nok sin.