Read Uab Meto KISAH RASUL-RASUL 18 Bible Online

KISAH RASUL-RASUL 18 - Uab Meto bible

KISAH RASUL-RASUL 18

¹Nalali te Nai Paulus nasaitan Atena ma nao neu kot Korintus.

²Ma anbi kot Korintus in na'eku nok atoni Yahudi mese kanan Nai Akwila na'ko Pontus. In fe nem na'ko Italia nok in fel kanan bi Priskila, fun Kesel Nai Klaudius naplenat he nati' ale atoni Yahudi nasaitan pah Roma. Ma Nai Paulus nao nok sin ume.

³Ma natuin sin mepu papmese in natua nabua nok sin. Sin mepu nabua fun mepu nane esle anmoe um-ume.

⁴Ma bi Neno Snasat Nai Paulus an etun lasi anbi ume buat ma in nami lanan he ale atoni Yahudi ma ale atoni Yunani nekan nateb knino.

⁵Leka Nai Silas ma Nai Timotius neman na'ko Makedonia, Nai Paulus antao nekan oke hen etun lasi ma ansaksi neu ale atoni Yahudi nak Yesus nane lo Neno Anan kun.

⁶Mes leka ale atoni nane sin namusu nokan ma na'uab nale'un, oke te in antekal afu na'ko in bael pake ma nak neu sin, “Him sutai kim hi sanat, au ufetin nimaf na'ko lasi nane. Ma tomas i au poi ma nao eu uf bian le kan tam nonot Yahudi.”

⁷Ma Nai Paulus anpoi na'ko bale nane ma nao neu atoni mese kanan Nai Titius Yustus le namtaus Uisneno, in ume le anmapaumakan nok ume buat.

⁸Mes Nai Krispus nakaf ume buat nane in nekan nateb neu Uisneno nok in ume nanan alsin. Ma anmu'i atoni Korintus namfau le nen Nai Paulus in a'at ma sin nekan nateb ma neki sin aon he naslani sin.

⁹Ma anbi faies onane te Uisneno nakua In a'an neu Nai Paulus nok mnitas mese nak, “Kais mumtau, mu'uab piut kais mutena!

¹⁰Fun Au hake ok ko ma katit fa esle hen ableo ko ma anhamu'i ko fun Au to namfau anbi kot i.”

¹¹Ma Nai Paulus namaika anbi Korintus ton mese funan ne ma an etun A'an Uisneno neu sin.

¹²Mes leka Nai Galio anfani kumlol bi Akhaya, ale atoni Yahudi sin anfen nekaf mese ma anmatoe nok Nai Paulus, oke te anhel neki neu toko alef lasi.

¹³Ma sin nak, “Atoni i nami hen fuli to he namtaus Uisneno neki lasi le nasuli nok Plenat Knino Nai Musa.”

¹⁴Leka Nai Paulus he namolok te, Nai Galio nak neu atoni Yahudi sin, “Hoi atoni Yahudi, kalu lasi le mitam antom lasi tanhais ai lasi bulalu nabe'i au nen hi lasi nane.

¹⁵Mes kalu lasi nane lasi matoes antom neu kanaf ka, ai uabe ka, ai hi plenat knino ka, hi mifek kim; au ka loim he fani alef lasi neu lasi humaf nane.”

¹⁶Oke te Nai Galio anli'u sin na'ko ke'an alef lasi nane.

¹⁷Ma sin anheke Nai Sostenes nakaf ume buat ma anbiso bi alef lasi sin matan. Mes Nai Galio kan lae nok fa sin.

¹⁸Nai Paulus namaika anteni neno fauk bi Korintus. Nalali te in naseon bae knino sin bi nane ma ansae bnao neu Siria nok bi Priskila ma Nai Akwila. Ma Nai Paulus an eu in nafuruan bi Kengkrea fun in mo'e nalali lasi manta'en.

¹⁹Ma sin ante bi Efesus, Nai Paulus nasaitan bi Priskila ma Nai Akwila bi nane, ma in mes antam bi ume buat, ma na'uab nok atoni Yahudi sin.

²⁰Ma sin antoti he Nai Paulus namaika nok sin suk a'lo mes Nai Paulus kan lomif.

²¹Mes in naseon sin ma nak, “Of au fain aum eu ki leka Uisneno anlomi.” Oke te in nao na'ko Efesus.

²²Leka nem ante bi Kaisarea in ansanu ma nao neu Yerusalem ma anfe han alekot neu tolas knino bi nane ma in nao neu Antiokhia.

²³Leka namaika neno fauk anbi nane te in nao anteni natuin pah Galatia ma Frigia hen hatane atoni apalsait sin nekan.

²⁴Onane te anmu'i atoni Yahudi mese Nai Apolos nahonis bi Alexandria nem neu Efesus. In atoni malasi ma ahinet antom lasi Sulat Knino.

²⁵In ansimo noina neu Lanan Uisneno, fun in uab nane namnutun fin ma in nanoina antom Yesus, mes al in nahin Nai Yohanes in noina antom lasi naslani atoni.

²⁶Ma in na'uab bi ume buat, leka bi Priskila ma Akwila nen, oket sin nokan neu sin ume. Ma bi nane sin na'uab naknutu Lanan Uisneno le he neki honis natuin Yesus neu Nai Apolos.

²⁷Fun Nai Apolos anlomi hen lak neu Akhaya, onane te bae knino sin bi Efesus antui sulat neu atoni apalsait sin bi Akhaya he nati' nasimo Nai Apolos nok nek amlilat. Leka in nem ante Akhaya, natuin halinat Uisneno in anfani atoni alekot neu ale atoni apalsait sin.

²⁸Fun nok matane in na'eka ale atoni Yahudi sin bi mat-mat, ma nalile sin a'at le antui nani bi Sulat Knino nak Yesus nane lo Neno Anan kun.