Read Uab Meto KISAH RASUL-RASUL 19 Bible Online

KISAH RASUL-RASUL 19 - Uab Meto bible

KISAH RASUL-RASUL 19

¹Leka Nai Apolos fe anbi Korintus, Nai Paulus in nao neu ale kuan bi pah nane ma nem ante Efesus. Ma anbi nane in napeni asimo lasi sin fauk.

²Ma in nak neu sin, “Ati him simo Smanan Knino ka, leka hi nekam nateb knino.” Mes sin natae nak, “Fe kahaf, fun hai fe kam nenaf nak anmu'i Smanan Knino.”

³Oke te Nai Paulus nak neu sin, “Kalu onane naslani ki neki sa'ka?” Ma sin natae nak, “Neki Nai Yohanes Aslanit ini.”

⁴Ma Nai Paulus nak, “Nai Yohanes Aslanit nane in naslani atoni le napis na'ko sanat, ma Nai Yohanes nak neu sin nak: Sin mes nekan nateb neu In le nem namuni na'ko in esle Yesus.”

⁵Leka sin nen lasi nane te sin nana'at sin aon he naslani sin bi Usif Yesus In kanan.

⁶Ma leka Nai Paulus na'aiti niman neu sin, oke te Smanan Knino ansanu nem neu sin ma sin na'uab neki a'at Smanaf nane ma naBeno Alekot nok.

⁷Ma sin ok-oke oni tuaf bo'es am nua.

⁸Ma anbi funan tenu Nai Paulus antam neu ume buat bi bale nane ma nanoina nok nek mainuan. In an etun sin ma nami he nati' sin nekan nateb neu Plenat Uisneno.

⁹Mes bian namanub sin nekan ma kan lomif he nateb knino, fun sin na'akan Lanan Uisneno bi to mfafaun sin matan. Es nane te Nai Paulus nao nasaitan sin ma anbeti naikan in asimo lasi sin ma neno-neno in na'uab anbi Nai Tiranus in ume skol.

¹⁰In mepu onane ton nua tal ale to bi pah Asia, atoni Yahudi ma atoni Yunani sin alsin nen a'an Uisneno.

¹¹Ma Uisneno anmo'e lasi amkakat matani natuin Nai Paulus.

¹²Kalu sin neki lesu ai bale sa' le Nai Paulus anpake ma nabela nani neu ale amenat sin, oket sin naleko' na'ko menas ma ale sman nitu anpoi nasaitan sin.

¹³Ma anmu'i mnane Yahudi sin fauk le nao natef pah nane ma antek Yesus kanan he napoitan sman nitu na'ko ale atoni sin, fun sin anbai ma nak, “Au sukat ki eki Yesus kanan le Nai Paulus an etun.”

¹⁴Atoni amoetin nane esle Nai Skewa Ana' Lasi Fuat nakaf to Yahudi in anhin an atoni hitu.

¹⁵Mes sman nitu nane nak sin nak, “Yesus au uhine, ma Nai Paulus au uhine, mes hi le i hi sekau ki ka?”

¹⁶Ma atoni le niut sae nane naen nu ma anpisu sin blua pake ma antufu sin talan te sin naen monas nok papa' na'ko ume nane.

¹⁷Ma ale atoni Yahudi ma atoni Yunani le namaika bi kot Efesus, sin nen lasi nane te sin namtau ma sin naliatas Usif Yesus In kanan.

¹⁸Ma atoni namfau le sin nekan nateb neu Yesus, sin neman ma nahoeb sin sanat bi mat-mat, nak afi sin amsa anmoe onane.

¹⁹Ma bian, le afi sin anmo'e ela mesokan, sin nabua sin sulat ma notu sin bi to amfaun sin matan. Ma ale sulat nane sin upan oni noin muti nifun bo'nim.

²⁰Ma nok lasi nane te Uisneno In a'an nasitbon piut ma nahenu nok kuasat.

²¹Leka ale lasi nane anbol nalali te, Nai Paulus nafek bi in nekan he nao neu Makedonia ma Akhaya oke te anfin neu Yerusalem. Ma Nai Paulus nak, “Leka au te bi Yerusalem, au he nao eu pah Roma amsa.”

²²Onane te in anlelu in ababat sin nua, esle Nai Timotius ma Nai Erastus nahunun neu Makedonia, mes in nabalah neno fauk bi Asia.

²³Ma oni anbi neno nane taisibu naek anbol neu Lanan Uisneno.

²⁴Fun anmu'i atoni mese kanan Nai Demetrius, atoni atois noni le antois uim le'u Artemis na'ko noin muti. Ma in napeni upaf naek neu in ameput sin.

²⁵Es nane te in nabua ale in ameput sin nok ameput bian le sin mepu papmese ma nak neu sin, “Atonin, hi mihin, nak hit mepu i neki alekot neu kit!

²⁶Neu, hi mit ma him nen kim, Nai Paulus le ka al fa bi kot Efesus, mes ala kle'o bi pah Asia ok-oke, in anfuli to ma nasekeb atoni namfau ma na'uab nak, ale sa' le anmepu neki niman mansian nane ka Uisneno fa.

²⁷Ka al fa hit mepu i namle'u, he na'uab nale'un kit, mes uim le'u naek Artemis of namle'u amsa ma in kanan namneku. Ma Artemis, le to pah Asia ma to pah pinan namtaus nani of namneku nfin nok in matanen.”

²⁸Leka sin nen lasi nane te sin nekan anmaput ma nato'an ma sin anbai nak, “Artemis, atoni Efesus sin uisneno, ho moni kum!”

²⁹Ma kot nane nahenu nok taisibu naek. Ma sin anheke Nai Gayus ma Nai Aristarkhus, sin nua sin atoni Makedonia le anse'u Nai Paulus anbi lanan, ma anhel neki sin nao neu bale bae bi kot nane.

³⁰Nai Paulus hen tam bi to sin atnanan mes in asimo lasi sin kan lomif.

³¹Fun ale anaet bi pah Asia le sin fef leko nok Nai Paulus, anlelu haef neune, he nati' kais in tam neu bale bae nane.

³²Ma leka abuat bi bale nane sin anbai, bian nak on i, bian nak onane, slutuf matane, ma bian sin ka nahin he nabuan neu lasi sa'.

³³Oke te atoni Yahudi sin antite atoni mese kanan Nai Aleksander neu matan. Fun in napeni uab na'ko atoni bian antom lasi nane. Es nane te in na'pasa niman he neki uab neu to he nasoni in aon.

³⁴Mes leka sin nahin nak in atoni Yahudi kun sin na'ba oni leku nua nak, “Artemis, atoni Efesus sin uisneno, ho moni kum!”

³⁵Nalali te lul tunis kot Efesus namneb sin ma nak, “Hoi atoni Efesus! Sekau bi pah pinan i le ka nahin fa kot Efesus nane apao ume le'u Artemis le naek kun, ma le'u mahuma le ansanu na'ko neno tunan ka?

³⁶Ma es ka nabe'i fa hen matoe lasi nane, es nane hi mitena nai, ma kais hi manap he mo'e lasi.

³⁷Fun him hel meki atoni i nem neu i, le sin ka nasik fa hit uim le'u ma ka nale'un fa in kanan.

³⁸Es nane kalu Nai Demetrius nok in ameput sin es natam lasi neu es, anmu'i alef lasi ma kumlol. So lasi panaf nua sin natam sin lasi anbin.

³⁹Ma kalu anmu'i lasi bian, le him lomi, leko hi meki neu tolas buat to ini.

⁴⁰Fun hit ala kit tam es lasi amle'ut, natuin lasi taisibu naek neno i. Ma hit kat mu'if lasi un le he tamneob to abuat neu taisibu i.” Ma leka sin nen nalali ale lasi te, lultunis kot anlelu to ok-oke hen fanin.