Read Uab Meto KISAH RASUL-RASUL 2 Bible Online

KISAH RASUL-RASUL 2 - Uab Meto bible

KISAH RASUL-RASUL 2

¹Leka Neno Pentakosta ante, ale atoni nek ateb knino nabua anbi bale mese.

²Naskek onane te slutuf na'ko neno tunan on anin nautus ma nahenu ume le sin tok anbine.

³Ma ale atoni nek ateb knino nit ale maf on ai pinan le ankauflon ma antok bi sin mes-mese.

⁴Ma Smanan Knino nahenu sin, oke te sin na'uab neki a'at bian onle Smanan Knino anfe sin he na'uab.

⁵Bi tomas nane atoni Yahudi le namtaus Uisneno na'ko ale pah-pah bi pah pinan i sin nabuan anbi Yerusalem.

⁶Leka slutuf nane ansanu nem ale to nabua nem. Ma sin alsin naskek ma namkak fun sin nen atoni nek ateb knino na'uab neki sin a'at mes-mese.

⁷Sin alsin nekan namneku ma ansanmak oket sin nak, “Ale atoni le na'uab nane sin atoni Galilea ai?

⁸Leka me hit nen sin na'uab neki hit es-es hit a'at bi pah le hit atbine!

⁹Ma anbi kit anmu'i atoni na'ko Partia, Media, Elam na'ko Mesopotamia, Yudea ma Kapadokia, Pontus ma Asia.

¹⁰Frigia ma Pamfilia, Mesir ma pah Libia le anhaumak Kirene, ma anmu'i amnemat na'ko pah Roma,

¹¹anmu'i atoni Yahudi ma uf bian le antam lekat to Yahudi, atoni Kreta ma atoni Arab. Hit nen sin na'uab neki hit a'at antom lasi amkakat le Uisneno anmo'e nani.”

¹²Sin alsin namkak ma nekan namneku ma na'uaben es nok es nak, “I he lasi sa' ka?”

¹³Mes bian atoni sin naslaet nak, “Sin anmafun tua min kase.”

¹⁴Mes Nai Petrus anfen nok haefin bo'es am mese nane, ma neki uab keti neu sin nak, “Hi atoni Yahudi ma ale to le natua bi kot Yerusalem, mitnin lek-leko ale a'at le au u'uab neu ki.

¹⁵Ale atoni i sin kan mafu fa onle hi mitenab, fun manas fe leku sio.

¹⁶Mes i Uisneno In a'an natuian Mafefa Knino Nai Yoel:

¹⁷Uisneno nakua a'an, ‘Nak of anbol bi Neno Amsoput — nak of Au op Au Smanan Knino neu ale atoni. Hi anmone ma anfeto sin of neki beno, le Au uton neu sin. Hi anmunif sin of napeni mnitas, antom lasi le Au ulile neu sin, Ma ale mnasi-mnasi of napeni nunmait, le Au uton neu sin.

¹⁸Ma neu Au ate — atoni ma bife bi neno nane — , of Au op Au Smanak ma sin an etun ale lasi le Au uton neu sin.

¹⁹Ma Au of mo'e ale lasi sanmakat bi fafon, bi neno tunan ma ale taka bi pinan, bi paha pinan: Na' ma ai ma ai masu.

²⁰Ma manas of nabaina anfani mesokan bola ma funan nabaina anfani na' nahunu na'ko Uisneno In neno naek ma apinat anbol.

²¹Bi leku nane sekau le in anbai ma antek Uisneno In kanan of napeni honis.’

²²Hi atoni Israel, him nen nai a'at i: Yesus atoni Nazaret nane atoni le Uisneno anlek nani ma nalile neu ki. Ale lasi sanmakat ma taka le Uisneno mo'e nani bi hi atnanam neki Yesus nane, onle hi mihin kim.

²³Natuin In lekat, Uisneno nana'at Yesus neu ki. Ma hi mina'at Yesus neu ale atoni abulalut hen kus bi hau nehe ma namate nani.

²⁴Mes Uisneno nafena In ma nafetin na'ko kuasat maten fun In ka nabe'i fa he nabala bi kuasat maten nane.

²⁵Fun Nai Daud na'uab antom Yesus nak; Au it Usi piut bi au matak, fun In hake bi au aok bian ne'u, au ka ubeko fa.

²⁶Es nane te au nekak namlil ma au smanak namoek, ma au aok i anpao nok atais bi nopu naukel,

²⁷fun Ho ka musaitan kau fa bi amates balan, ma Ho ka mumautu fa Ho atoni Knino he nit amle'ut.

²⁸Ho muton kau lalan neu honis; Ho muhoeb neu kau amlilat bi Ho matam.

²⁹Bae benu al ki, au uketi muti monas neu ki antom hit am uf Nai Daud. In anmate ma ansub In fun In nuat naukel anbi hit atnanak talan te neno i.

³⁰Mes Nai Daud atoni Mafefa knino ma in nahin nak Uisneno anmanta'en nokan neki supat nak: Uisneno of naiti atoni mese na'ko Nai Daud in sufan hen toko bi Ini toko.

³¹Es nane in nit nalali anbi matan ma ma'uab nalali antom Kesel Afetin anfen anfani, leka in na'uab nak: Of ka nasaitan fa In bi amates balan ma In nesan ka namle'u nitaf.

³²Le Yesus i, Uisneno nafena nani, ma hai le i es amfani saksi antom ale lasi nane.

³³Ma Uisneno nalatan In neki nukun ne'u, ma ansimo Smanan Knino le anba'an nani, oke te an op nani neu kai onle hi mit ma amnen anbi i.

³⁴Fun Nai Daud kan sae neu neno tunan mes Nai Daud nak: Uisneno nak neu au Usi nak:

³⁵Hom tunom nai bi Au nimak ne'u, talan te Au tao Ho musu bi Ho haem nupun.

³⁶Es nane te ale to Israel hi mes mihin namneo, Uisneno es anmo'e Yesus le him miboni bi hau nehe nane, In es anfani Usif ma Kesel Afe honis.”

³⁷Leka sin nen lasi nane te sin nekan antu' ma sin antoti neu Nai Petrus ma neu haefin bian sin nak, “Bae, hai he mo'e lasi sa' ka?”

³⁸Ma Nai Petrus natae sin nak, “Mite'un hi nekam nai, ma him fe hi aom he naslani ki bi Yesus Neno Anan In kanan hen sako hi sanat. Onane te of him simo bael tulu Smanan Knino.

³⁹Fun lasi manta'en nane neu ki ma neu hi anhini ma neu alsin abit lo nok, esle' fauk-fauk le Uisneno no'en sin.”

⁴⁰Ma nok uab bian namfau Nai Petrus anfainek sin ma antoti neu sin nak, “Mifetin nai hi aom na'ko batan apenut i.”

⁴¹Ma ale to le nem ma ansimo Nai Petrus in uab keti nane anfe sin aon he naslani sin ma bi neno nane smanaf le ansato sin oni atoni nifun tenu.

⁴²Fun sin anmakoe bi haefin sin noina ma bi nekaf mese. Ma sin nabua bi ebi utunu' ma onen totis nok.

⁴³Ma haefin anmo'e lasi sanmakat ma taka namfau talan te ale to nane sin namtau.

⁴⁴Ma ale to le nekan nateb nalali sin namesbok piut ma ale sa' le sin ini nane on sin ini ok-oke.

⁴⁵Ma anmu'i na'ko sin le nasosa sin maus ma anbait nani neu ale atoni natai nok sin nukat mese-mese.

⁴⁶Ma neno-neno sin nabua nekaf mese bi Ume Uisneno. Ma sin ebi utunu' bi sin ume mese-mese, fun sin bukae nok amlilat ma nek baun,

⁴⁷ma anpules Uisneno. Ma to ok-oke anlomi sin. Ma neno-neno Uisneno ansato sin neki ale atoni le napeni honis.