Read Uab Meto KISAH RASUL-RASUL 20 Bible Online

KISAH RASUL-RASUL 20 - Uab Meto bible

KISAH RASUL-RASUL 20

¹Leka taisibu bi kot Efesus namne, Nai Paulus anboin asimo lasi sin ma anfainek sin. Ma leka in naseon nalali, in nao neu Makedonia.

²Fun in nao natef pah nane ma anfainek bae knino sin, nalali te in nem neu pah Yunani.

³In namaika bi pah nane funan tenu, in naloitan hen sae bnao neu pah Siria. Mes leka in fe naloitan he nao te atoni Yahudi sin malomin he namate. Es nane in nafek hen fani natuin Makedonia.

⁴Ma Nai Sopater, Nai Pirus atoni Berea anah, ma Nai Aristarkhus ma Nai Sekundus atoni Tesalonika ma Nai Gayus atoni Derbe ma Nai Timotius ma Nai Tikhikus ma Nai Trofimus atoni pah Asia sin nao nabua nokan.

⁵Fun atonin nane sin nao nahunun ma anpao kai bi Troas.

⁶Mes leka neno naek U'tunu Kan pake fa ma Lalu haef anfini te haim sae bnao mi'ko Filipi ma neno ha namuni te hai aim meu sin bi Troas, ma mimaika neno hitu anbi kuan nane.

⁷Leka hai mubua hem ebi utunu' bi neno mese anbi klei nane, Nai Paulus na'uab nok bae knino sin anbi nane fun nokfa in natenab he nao. Es nane in na'uab talan te fai nanesab.

⁸Ma anbi ke'an fafon, le hai mibua anbin, sin notu paku namfau.

⁹Ma anmu'i atoni munif mese kanan Nai Eutikhus antoko bi eon ana'. Fun Nai Paulus na'uab suk a'lo, atoni munif nane ansesa ka nabe'if. Oke te antupan fin ma anmof na'ko ume aktutan tenu neu pinan. Leka sin naiti te, anmaten.

¹⁰Mes Nai Paulus ansanu ma aneton neu atoni munif none in fafon, ma anho nan, ma nak, “Kais mimtau, fe anmoni.”

¹¹Nalali te Nai Paulus ansae anfani neu ke'an fafon, ma an ebi u'tunu ma anbukae. Leka anbukae nalali te in na'uab piut talan manas anpe' oke te Nai Paulus nao.

¹²Ma sin nok atoni munif nane anmoni neu in ume, ma sin ala sin malinan.

¹³Ma haim nao ma amsae bnao meu Asos, fun hem senu Nai Paulus anbin. Natuin in anba'an nak in he nao hae nok lan meto.

¹⁴Leka in na'eku kai bi Asos, hai mokan neu bnao ma amnaom fin meu Metilene.

¹⁵Oke te haim nao piut ma nokfa onane te haim tia bale le anmabaina nok pah Khios. Ma anmeu te haim tia Samos ma haim nao nenbes anteni te haim tia bi Miletus.

¹⁶Fun Nai Paulus nafek he kais nao nok Efesus, he nati' kais anbaken neno neu pah Asia. Fun in manap he nati' napeni neno naek Pentakosta ai neno naek nasanut Smanan Knino anbi kot Yerusalem.

¹⁷Es nane te Nai Paulus anlelu atoni mese na'ko Miletus nao neu Efesus he natonan ale penatua tolas knino he neman neu Miletus.

¹⁸Leka sin neman, Nai Paulus nak neu sin, “Hi mihin, le au ok ki na'ko neno fe au aum a'te pah Asia i:

¹⁹Au tuthae Uisneno nok nek baun. Ma anbi mepu tuthaes au matak oen ansai ma lasi su'at namfau na'ko atoni Yahudi le he namate kau.

²⁰Ma maski onane amsa au ka utau fa sa' le he neki alekot neu ki. Fun au uton ma unoni ki bi mat-mat ma bi hi ume sin amsa.

²¹Fun au saksi neu atoni Yahudi ma atoni Yunani, he nati' sin nate'un nekan neu Uisneno ma sin nekan nateb knino neu hit Usif Yesus Neno Anan kun.

²²Mes tomas i he utuin Smanan Knino in lomin, au nao eu kot Yerusalem, ma au ka uhinef neu lasi sa' le hen bol neu kau,

²³al au uhin Smanan Knino naton nalali kau na'ko kot neu kot nak o'of ma hamu'it anpao kau.

²⁴Mes au ka utenab fa au monik lamun au utiaba ma usopu au mepu tuthaes le Usif Yesus nasuba nani neu kau he saksi Lasi Knino halinat Uisneno ini.

²⁵Ma leku i au uhin, lof hi ala ki le afi au non ma kah ki he etun Plenat Uisneno, of hi ka mitam tenif au humak.

²⁶Es nane neno i au saksi neu ki, au knino kau ma ka usanab fa neu sekau le of in namle'u.

²⁷Fun au ka upehen ki mes au uton ki piut ale lekat Uisneno.

²⁸Es nane nati' him panat kim hi aom ma ampanat pukan knino ok-oke fun Smanan Knino es nasaeb ki hem fani apaot he mituku tolas Uisneno le In napeni nani neki In Anmone Ini maten.

²⁹Ma au uhin, leka au nao te of ale asu fui abulalut antaman ki ma ka nek fa pukan knino.

³⁰Ma lof anmu'i atoni anbi ki, le neki noina moel hen hel koti atoni apalsait sin na'ko lanan amneot ma nao natuin sin.

³¹Es nane te him panat nai ma mimnau nai, fun bi ton tenu in nanan, fai manas au ka usnas it neu he fainek ki mese-mese nok matnu.

³²Ma leku i au utnat ki neu Uisneno ma In a'an halinat knino. Ma In anmu'i kuasat hen hatani ki ma anfe ki athoes le In naloitan nani neu ale atoni le In naknino nani sin.

³³Noin muti ai mnatu ai bael pake au ka totif na'ko es amsa.

³⁴Ma hi mihin mak au mepu kuk eki au nimak he unokab au monik ma au amnoktin sini.

³⁵Fun anbi ale lasi au fe ki leta, nak het mepu onane hit mes atuntaku ale alima'et sin fun he tamnau Usif Yesus In a'an, le In na'uab nak: Leko nesi atfe na'ko at simo.”

³⁶Leka Nai Paulus na'uab nalali, in anli'tu ma anonen toti nok sin.

³⁷Oke te sin ankae ma anse'ul ma anho Nai Paulus ma a'nek in ten-teni.

³⁸Ma sin nekan antu' nes-nesi, le Nai Paulus na'uab, nak of hi ka mitam tenif au humak. Oke te sin nasain nani neu bnao.