Read Uab Meto KISAH RASUL-RASUL 21 Bible Online

KISAH RASUL-RASUL 21 - Uab Meto bible

KISAH RASUL-RASUL 21

¹Leka hai manseon milali te haim sae bnao ma amnao meu Kos. Ma nokfa onane te haim tia bi Rodos ma mi'ko nane nao meu Patara.

²Leka hai mipeni bnao bi Patara, haim sae ma haim lak meu Fenisia.

³Nalali te hai mipene mit Siprus bi aon bian li', mes haim nao amfin meu pah Siria. Ma haim sanu bi Tirus fun bnao he nasanut baut anbi nane.

⁴Ma hai mimaika bi Tirus neno hitu oke te haim kiso ale atoni apalsait sin bi nane. Ma natuin Smanan Knino anmepu, asimo lasi sin anfainek Nai Paulus he kais anao neu kot Yerusalem.

⁵Mes leka neno namsopun te haim poi ma amnao. Ma sin ala sin nok sin fel sin anah nasain kai neu kot kotin. Oke te haim li'tu ma amonen mok sin bi tasi ninen.

⁶Leka hai manseon milali te haim sae meu bnao te sin anfani neu ume.

⁷Ma hai mi'ko Tirus ma amte bi Ptolemais fun lal tasi antu' bi nane. Ma haim fe han senut neu bae knino sin bi bale nane ma mimaika mok sin neno mese.

⁸Nokfa onane te haim nao amteni ma amte bi Kaisarea, ma haim tam bi Nai Filipus amnek Lasi Knino in ume, le afi anbeti nani bi kot Yerusalem.

⁹In anmu'i anfeto ha le napeni halinat Uisneno he nabeno knino.

¹⁰Leka mimaika neno fauk anbi nane te, mafefa knino mese nem na'ko pah Yudea kanan Nai Agabus.

¹¹In nem neu kai, oke te in naiti Nai Paulus in pasu futu ma anfutu in haen ma in niman ma nak, “Smanan Knino nak on i: Pasu futu i in tuan, of atoni Yahudi sin anfutu nani bi kot Yerusalem ma nana'at neu atoni bian le kan tamaf nonot Yahudi.”

¹²Leka haim nen lasi nane te hai mok atoni apalsait sin amtoti Nai Paulus he nati' kais in nao neu kot Yerusalem.

¹³Mes Nai Paulus natae nak, “Nansa' him kae he nati' miklati au nekak? Fun au uloitan ulali hen futu kau ma namate kau bi kot Yerusalem natuin Usif Yesus In kanan.”

¹⁴Fun Nai Paulus kan lomif hai fainekat nane, haim ela ma mak, “Usif tunan In lomin maut hen bol!”

¹⁵Leka hai mimaika neno fauk anbi kot Kaisarea, hai miikab ma amnao meu kot Yerusalem.

¹⁶Ma atoni apalsait sin fauk nok kai na'ko Kaisarea. Ma sin nok kai neu atoni mese kanan Nai Manason, atoni Siprus le anfani atoni apalsait suk a'lo, fun hai mimaika anbi in ume.

¹⁷Leka hai mimte kot Yerusalem, bae knino sin ansenu kai nok amlilat.

¹⁸Nokfa onane Nai Paulus nok kai amnao hem kiso Nai Yakobus; ma ale penatua sin amsa anbi nane.

¹⁹Ma Nai Paulus anfen sin ale lasi le Uisneno anmo'e nani natuin in neu to le kan tamaf nonot Yahudi.

²⁰Ma leka sin nen lasi nane te sin naliatas Uisneno ma nak neu Nai Paulus, “Bae, hom kiso, atoni Yahudi nifun-nifun le nekan nateb neu Yesus sin alsin anpanat plenat Uisneno le anfe nani neu Nai Musa.

²¹Ma sin nen nak ho munoina ale to Yahudi le namaika nok atoni uf bian he nafetin plenat Nai Musa, fun ho mak kais anheli sin anhin ma kais natuin hi halat.

²²Leku le'i atoni-atoni Yahudi le'an palsai nalali anen nak: Ba'e ho esko i onanate he mo'e onme ka?

²³Es nane leko ho mo'e on i. Anmu'i atoni ha es i, le anmo'e lasi manta'en nok Uisneno.

²⁴Ho mok sin he miknino hi aom ma ambaen sin he nati' sin an eu sin nakan funun. Ma sin alsin of nahin nak sa' le sin nen nane ka namneof. Fun ho mutuin ale plenat Nai Musa.

²⁵Mes ale atoni uf bian le kan tamaf nonot Yahudi mes nekan nateb neu Yesus, haim tui milali sulat neu sin ma mifek he nati' sin naskotun sin aon na'ko mnah fuat, na'ko na', na'ko sisi mu'it le ankil nison ma na'ko lasi mapaisa.”

²⁶Ma nokfa Nai Paulus in nao nok atoni ha in nane ma sin naknino'ok, oke te sin taman neu Ume Uisneno he naton nak: Leka neno he naknino'ok namsopun ma es-es he neki in fua tulu.

²⁷Leka neno hitu namsopun te, ale atoni Yahudi le neman na'ko pah Asia sin nit Nai Paulus anbi Ume Uisneno. Oke te sin na'koke to nekan hen heke Nai Paulus,

²⁸ma anhunun nak, “Hoi atoni Israel, maen aim! Atoni i, le nanoina to ok-oke bi me-me he neki lasi suli neu hit to ma neu plenat Nai Musa ma neu bale i! Ma in nok atoni Yunani sin hen tam neu Ume Uisneno hen hainisi bale knino i!”

²⁹Fun afi sin nit Nai Trofimus atoni Efesus le nok Nai Paulus anbi kot, ma sin natenab, nak Nai Paulus nokan antam bi Ume Uisneno.

³⁰Ma slutuf matane bi kot nane, ma ale to nane neman ma anheke Nai Paulus oke te anhel napoitan na'ko Ume Uisneno ma sin an ek ale eno ok-oke.

³¹Leka sin nami he namate Nai Paulus, hanaf natiabon neu solalus nakaf, nak slutuf matane es kot Yerusalem.

³²Onane te solalus nakaf nok ale solalus ma ale nakaf sin nao neu bale slutuf nane. Leka sin nit solalus nakaf ma ale solalus nane te, sin nasnas ma kan bison tenif Nai Paulus.

³³Mes solalus nakaf nane anhaumak Nai Paulus ma anheke ma anlelu hen futu neki kolen besi nua. Fun antoti nak, atoni i sekau, ma in anmo'e lasi sa' ka.

³⁴Mes natuin to namfau bian anhunun nak on i, bian anhunun nak onane. Ma natuin slutuf matani, solalus nakaf ka nahinef lasi panan he sa'. Es nane in anlelu he neki Nai Paulus neu kot.

³⁵Leka sin nem ante elak le hen sae neu kot, solalus sin anloi Nai Paulus, fun to namfau ansai nem,

³⁶ma natuin sin ma anhunun nak, “Mineku mani nai!”

³⁷Leka sin nok Nai Paulus hen tam neu kot, in nak neu solalus nakaf nane nak, “Au upeni mainuan kle'o, he u'uab ok ko tua!” Solalus nakaf nak neune nak, “Ho mu'uab muhin a'at Yunani ka?

³⁸Ho ka atoni Mesir ka, le afi ho mo'e taisibu ma maen meki atoni abulalut nifun he neki bale manuat neu mnela paha snaen?”

³⁹Ma Nai Paulus natae nak, “Au atoni Yahudi kau u'ko Tarsus, kot makana bi pah Kilikia; au upeni leku mainuan he umolok neu ale atonin i.”

⁴⁰Leka Nai Paulus napeni mainuan na'ko solalus nakaf, in nao ma anhake anbi elak nane ma napasa niman neu to. Ma leka to nane natena, Nai Paulus na'uab neki a'at Ibrani nak: