Read Uab Meto KISAH RASUL-RASUL 22 Bible Online

KISAH RASUL-RASUL 22 - Uab Meto bible

KISAH RASUL-RASUL 22

¹“Bae benu ala ki, ma au ama sin ok-oke, him nen nai, sa' le he uton ki, on lasi au he soi au aok.”

²Leka ale to sin nen Nai Paulus na'uab neki a'at Ibrani te sin natena ok-oke. Ma Nai Paulus na'uab nak,

³“Au atoni Yahudi kau, nahonis kau bi Tarsus pah Kilikia, mes au u'nae bi kot Yerusalem, ma Nai Gamaliel nanoni kau nok alekot neu hit am uf sin plenat, talan te au fani atoni amakoet neu mepu Uisneno onle hi ala ki amsa bi leku i.

⁴Ma au hamu'i ale atoni le natuin Lanan Uisneno talan te umate sin; au heke ale atoni ma bife ma utam neu o'of.

⁵Ma Ana' Lasi Fuat nakaf anaet ma tolas amnasit nabe'i hen saksi lasi nane. Au simo sulat na'ko sin ma eki neu atoni Yahudi le anbi Damsyik. Ma natuin sulat nane au heke ale atoni le natuin Lanan Uisneno ma ok sin neu Yerusalem hen hukum sin.

⁶Mes anbi lanan, leka au haumak kuan Damsyik neno namtetu, naskek onane te meusine naek na'ko neno tunan anpin funam natef kau.

⁷Ma au bel eu nain ma au nen hanfes nak neu kau, “Saulus, Saulus, nansa' hom hamu'i kau ka?”

⁸Ma au utae ak: Ho sekau ko, Usi? In nak: Au Yesus atoni Nazaret, le hom hamu'i nane.

⁹Ma ale atoni le sin nok kau, sin nit pina' nane mes sin ka nenaf hanaf le na'uab nok kau.

¹⁰Oke te au ak: Usif au he mo'e sa' ka? Ma Usif nak neu kau: Hom fen nai ma amnao nai neu kuan Damsyik. Ma anbi nane of an etun ko ale lasi le anlekan nani neu ko.

¹¹Fun au matak ka nitaf, natuin meusine nane in pinan, oke te au ini sin le anao nok kau sin na' au nimak ma antopu kau nao meu Damsyik.

¹²Anbi kuan nane anmu'i atoni mese kanan Nai Ananias, le natuin plenat knino ma makana bi ale to Yahudi sin.

¹³In nem anhake haumak kau ma nak: Saulus, au bae, hom fei ho matam ma amkiso nai! Ma bi leku nane amsa au it anfani ma au kiso in.

¹⁴Oke te in nak: Hit am uf sin Uisneno anlek nalali ko he nati' ho muhin In lomin, ma he mit In Amneot ma he mutnin a'at le anpoi In fefan.

¹⁵Fun ho mes amfani In saksi neu ale atoni antom lasi le ho mit ma hom nen mulali.

¹⁶Ma leku i ho fe maim nekam neu sa' ka? Hom fen nai ma hom fe ho aom he naslani ko, ma hom toti neu Uisneno hen sako ho sanat sin.

¹⁷Ma leka au fani eu kot Yerusalem, ma fe onen toti bi Ume Uisneno, Smanan Knino anhatane kau

¹⁸ma au it Usi, le nak neu kau: Ampoi nai lab, ma musaitan kot Yerusalem fun of sin kan simof ho saksi antom kau.

¹⁹Ma au utae: Usif, sin nahinen nak afi au es atam eu ale ume buat ma aheke sin le nekan nateb knino neu Ko ma utam sin neu o'of ma hamu'i sin nok.

²⁰Ma leka sin namate Ho saksi Nai Stefanus, au amsa bin, ma au lomi sin mo'et nane, ma au es a'pao atoni le namate in, sin bael pake.

²¹Mes Usif nak neu kau: Hom nao nai, fun Au he sonu ko neu bale lo neu atoni bian le kan tamaf to Yahudi.”

²²Ale to sin nen Nai Paulus na'uab ante a'at nane te, sin ala sin na'ba ma nak, “Mineku main atoni i na'ko pah pinan! In kan tamaf ota hen moni!”

²³Ma ale atoni sin na'ba piut ma antekal sin blua pake ma antekal afu skuku.

²⁴Es nane te solalus nakaf anlelu he neki Nai Paulus neu kot he nati' anpalekas in lasi ma anbiso, he napeni lasi sa' le in mo'e talan te to sin na'ba neun.

²⁵Leka sin anfutu Nai Paulus hen biso te, in nak neu solalus nakaf nane. “Nabe'i ka hen biso atoni Roma ka nok fa lef lasi ka?”

²⁶Ma leka solalus nakaf nane in nen lasi nane, in an etun nani neu nakaf anaet, ma nak, “Ho he mo'e sa' ka, fun atoni nane atoni Roma!”

²⁷Ma solalus nakaf anaet nane nem neu Nai Paulus ma nak, “Muton kau nai, namneo ho atoni Roma ka? Ma Nai Paulus natae, “Namneo.”

²⁸Ma solalus nakaf anaet nane nak, “Au sos kanaf i eki upaf matani.” Ma Nai Paulus nak, “Mes au mu'i hak natuin nahonis kau bi pah Roma.”

²⁹Ma ale solalus le hen palekas Nai Paulus in lasi, sin naskotun. Ma solalus nakaf nane namtau, fun in lelu hen futu Nai Paulus le atoni Roma kun.

³⁰Mes solalus nakaf nane he nahin nok amneot, nak atoni Yahudi sin natam lasi sa' antom Nai Paulus. Es nane te nokfa onane anlelu he nunan Nai Paulus na'ko o'of ma anlelu, he nati' ale Tolas Alef Lasi Knino ma ale amnasit Yahudi sin nabuan. Oke te in nok Nai Paulus na'ko kot ma nahakeb nani bi sin matan.