Read Uab Meto KISAH RASUL-RASUL 23 Bible Online

KISAH RASUL-RASUL 23 - Uab Meto bible

KISAH RASUL-RASUL 23

¹Ma Nai Paulus ankiso neu Tolas amnasit sin ma na'uab nak, “Bae benu ala ki, tal neno i au fe moni nok nek muti anbi Uisneno In matan.”

²Leka Nai Paulus na'uab onane te, Nai Ananias ana' lasi fuat nakaf anaet anlelu atoni le anhake haumak Nai Paulus hen pas Nai Paulus fefan.

³Mes Nai Paulus nak neu ana' lasi fuat nakaf nak, “Uisneno of anpas ko, le nek asafanut nak nekan knino! Hom tok ambi i he mufek au lasi natuin plenat knino, mes hom tanhai plenat knino ma amlelu hen pas kau.”

⁴Mes ale atoni le antoko nane sin nak Nai Paulus, “Ho musi'u Uisneno In ana' lasi fuat ka?”

⁵Ma Nai Paulus nak, “Bae benu ala ki, au ka uhinef, nak in Ana' Lasi Fuat Nakaf anaet. Namneo, antui bi Sulat Knino nak: Kais mu'uab amle'ut neu ho to in nakaf!”

⁶Ma fun in nahin nak ale atokos nane sin bian nonot Saduki ma bian nonot Farisi, es nane in naiti hanan neu Tolas Alef nane nak, “Bae benu ala ki, au atoni Farisi kau ma Farisi sin sufan kau. Hi mihakeb kau bi Tolas Alef abuat i, natuin au nekak nateb nak amates of anfen anfani.”

⁷Leka in namolok onane te atoni Farisi ma atoni Saduki nasulin ma anbatiok neu pukan nua.

⁸Fun atoni Saduki sin nak, katit fa amates anfen anfani, ma katit fa ahake neno tunan ma katit fa smanaf; mes atoni Farisi sin nekan nateb ale lasi nane.

⁹Natuin lasi nane te sin anmatoen. Ma atoni Farisi sin fauk le nahin plenat knino sin anfen ma nak, “Hai ka mipeni fa sanat sa' bi atoni i! Oni anmu'i smanaf ai ahake neno tunan es na'uab neune.”

¹⁰Ma matoes naek, tal solalus nakaf namtau kalu-kalu sin hen pisu nis Nai Paulus. Es nane in anlelu solalus sin hen topu Nai Paulus na'ko sin atnanan ma nokan neu kot.

¹¹Ma anbi fai nane Usif Yesus nem ma anhake bi Nai Paulus aonbian ma nak neune, “Mumepan ho nekam nai, fun on afi hom saksi Au kanak anbi kot Yerusalem, onane amsa hom nao nai ma amsaksi mani bi pah Roma.”

¹²Ma nokfa onane te atoni Yahudi sin nabuan ma naiti supat neu sin aon, nak of sin ka nah ma ka ninun fa, kalu sin fe ka namate fa Nai Paulus.

¹³Ma sin abuat nane oni nesi na'ko atoni bo'ha.

¹⁴Ma sin nao neu ale ana' fuat nakaf sin ma ale amnasit to Yahudi sin ma nak, “Hai maiti milali supat neu hai aom, of hai ka miah ma ka minu fa leka hai fe ka mimate fa Nai Paulus.

¹⁵Onane te hi mok tolas amnasit amnao meu solalus nakaf he neki Nai Paulus neu ki ma on hi he miknutu amteni in lasi; ma hai ampao mani he mimate, leka fe ka neman tian ki.”

¹⁶Mes Nai Paulus moen feuf le in fetof anah, nen lasi amle'ut nane. In nao neu kot, ma leka in napehi mainuan hen tam, oke te in natonan Nai Paulus.

¹⁷Oke te Nai Paulus anboin solalus mese ma nak neune, “Ho mok anah i neu solalus nakaf fun in he naton lasi sa' es neun.”

¹⁸Ma solalus nane in nok anah nane neu solalus nakaf ma nak, “Nai Paulus atoni hukum nane, anboin kau ma antoti, he au ok anah i nem neu ko, fun in he naton ko lasi es.”

¹⁹Ma solalus nakaf antopu anah nane niman ma nao anhake na'tet ok ma natan anah nane nak, “Ho he muton kau lasi sa' ka?”

²⁰Ma anah nane nak, “Atoni Yahudi sin anmanlekan nalali, he nati' sin antoti ko, he nati' noka ho mok Nai Paulus neu tolas amnasit sin, he nati' anpalekas anteni in lasi.

²¹Mes kais hom nen sin tua, fun sin atoni bo'ha ma nesi naloitan nalali he namate Nai Paulus. Fun sin naiti supat ma anle'at sin aon, of sin ka nah ma ka ninu fa talan te sin namate Nai Paulus. Ma tomas i sin pao nanin, al natnin neu ho fekat.”

²²Ma solalus nakaf nane anlelu anah nane hen fani, ma anba'an nak, “Ka nabe'i hem etun lasi i neu es am es, mak hom eut mulali kau lasi nane.”

²³Nalali te solalus nakaf anaet anboin solalus nakaf nua ma nak neu sin, “Milotan nai solalus natun nua ma asae bikase bo'hitu ma amneki auni natun nua he nati' leku sio fai i sin naon neu Kaisarea.

²⁴Ma miloitan amsa bikase sae neu Nai Paulus he nati' mokan nok aomina neu ama Kumlol Nai Feliks.”

²⁵Ma in antui sulat le hanan nak on i,

²⁶“Neu ama Kumlol Nai Feliks makana. Nai Klaudius Lisias ansonu han senut alekot.

²⁷Atoni Yahudi sin anheke atoni i, ma leka sin he namate, au ok solalus sin aim misik ma mifetin mani, fun au nen, nak in atoni Roma.

²⁸Fun au lomi he uhin, sin nasanab in natuin lasi sa', es nane au eki neu sin Tolas Alef buat amnasit.

²⁹Mes au uhin, sin nasanab atoni i natuin sin plenat knino, ma kan mu'if lasi le he namate ai he natam neu o'of.

³⁰Au upeni hanaf, nak anmu'i atoni le anmalomis he namate atoni i. Es nane au lelu he nokan laba neu ama kumlol. Ma neu ale atoni le hen mo'e lasi nokan, au ak sin, he nati' sin natam lasi nane neu ama.”

³¹Oke te ale solalus sin natuin plenat ma sin nok Nai Paulus bi fai nane neu Antipatris.

³²Ma nokfa onane te sin namautu ale atoni asae bikase he nok Nai Paulus anaon finin ma sin anfani anmes, neu kot.

³³Leka sin nem ante Kaisarea, asae bikase nane sin nanona sulat neu ama kumlol ma nana'at Nai Paulus nok.

³⁴Ma leka ama kumlol anso'i nalali sulat nane, in natan Nai Paulus, neu in na'ko pah me. Ma leka in nen, nak Nai Paulus na'ko Kilikia,

³⁵in nak, “Of au palekas ho lasi, leka ale atoni le natam lasi neu ko sin neman.” Oke te in lelu hen pao Nai Paulus anbi Nai Herodes in sonaf.