Read Uab Meto KISAH RASUL-RASUL 24 Bible Online

KISAH RASUL-RASUL 24 - Uab Meto bible

KISAH RASUL-RASUL 24

¹Fun neno nim anfini te, Ana' Lasi Fuat Anaet Nai Ananias nok ale amnasit to Yahudi sin ma atoni malasi mese kanan Nai Tertulus. Ma sin antam neu ama kumlol ma natiaba sin lasi antom Nai Paulus.

²Leka anboin Nai Paulus ma anhake, Nai Tertulus natam lasi antom Nai Paulus ma nak, “Ama Feliks makana, natuin ho mo'et, hai mipeni alekot piut, ma natuin ho hinem, anmu'i lasi alekot namfau le natiabon neu hai to.

³Ale lasi nane haim simo anbi me-me nok nek amlilat.

⁴Mes he nati' kais atbaken ama ho leku mainuan, au toti he nati' ama hom nen hai uab tuk-tuka i nok nek asimot alekot.

⁵Hai mipeni atoni i onle men le'u, le anmo'e slutuf neu atoni Yahudi bi pah alekot, ma anfani ahel lanan neu atoni Nasrani.

⁶Ma in anhainisi Ume Uisneno. [Es nane haim heke he nati' mifek mani natuin hai Plenat Knino.

⁷Mes Nai Lisias solalus nakaf anaet nem ma nasik nani nok aseke na'ko hai nimam,

⁸ma anlelu ale atoni le natam lasi he nem neu ama kumlol.] Ma leka ama kumlol anpalekas in lasi of muhin ale lasi le hai mitam mani antom in.”

⁹Ma ale atoni Yahudi sin lut lasi nane ma nak, namneo onane.

¹⁰Ma ama kumlol anfe mainuan neu Nai Paulus he nati' in namolok. Ma Nai Paulus nak, “Fun au uhin, ama hom fani alef lasi bi pah i ton namfau. Es nane nok nek amlilat au eki lasi i neu ama matan.

¹¹Ma ama ho mutenab muhin, mak afi ai neno bo'es am nua afinit, au nao eu Yerusalem he onen toti.

¹²Ma sin ka napeni kau fa he matoe ok es ai mo'e slutuf, bi Ume Uisneno ai bi ume buat, ai anbi bale bian anbi kot nane.

¹³Ma sin ka neki fa lasi panan he sa' le antom neu kau.

¹⁴Mes au uton neu ama, nak au tuthae hai am uf sin Uisneno ma utuin Lalan Uisneno le sin antek nak Lalan ka amneot. Au nekak nateb neu ale lasi le antui nani bi Nai Musa ma Mafefa knino sin sulat.

¹⁵Au mu'i afnekan neu Uisneno, onle sin amsa, nak ale amates of anfen anfani, atoni amneot ma atoni asanat.

¹⁶Es nane au ami he nati' au moni nok nek aknino bi Uisneno ma mansian sin matan.

¹⁷Ma anbi ton fauk-fauk leka au fain aum eu kot Yerusalem he eki amnaut neu au to ma eki fua tnatas nok.

¹⁸Leka au fe unaob ale lasi nane sin, atoni Yahudi sin neman na'ko pah Asia napeni kau bi Ume Uisneno, leka au uknino ulali au aok; kan mu'if atoni namfau ma katit fa matoes bi bale nane.

¹⁹Ma sin atoni Yahudi fauk le neman na'ko Asia sin mes he neman neu ama anbi i ma natam lasi sa' le sin napeni antom kau.

²⁰Ai sin alsin le antoko anbi i so sin naton lasi amle'ut sa' le sin napeni anbi kau, leka au hake bi Tolas Alif amnasit sin matan.

²¹Ai al antom uab fefa mese le au u'uab ani, leka au hake bi sin atnanan ak: Natuin au uteb lasi ale atoni amates anfen anfani, neno i sin nahakeb kau anbi hi matam.”

²²Mes Nai Feliks le nahin lek-leko antom Lalan Uisneno, in naboni lasi nane ma nak, “Leka solalus nakaf anaet Nai Lisias neman te, of au ufek ho lasi!”

²³Ma in anlelu solalus nakaf hen pao Nai Paulus, mes in napeni manuan, ma kais nakain in ini sin he neman kiso Nai Paulus.

²⁴Leka neno fauk onane te Nai Feliks nok in fenai bi Drusila, bife Yahudi, anlelu hen boin Nai Paulus, ma sin he nen antom lasi palsait neu Yesus Neno Anan.

²⁵Mes leka Nai Paulus na'uab antom lasi amneot ma lasi naplenat aon ma antom neno lef lasi amnemat, Nai Feliks namtau ma nak, “Namaut nai, ma hom nao nai, leka au mu'i sona, of au lelu hen boin ko.”

²⁶Fun anbi nane Nai Feliks nafneka, he napeni noni na'ko Nai Paulus. Es nane te fe fe'at in anboin Nai Paulus he namolok nokan.

²⁷Mes leka ton nua namsopun, Nai Perkius Festus anseka Nai Feliks. Ma natuin Nai Feliks hen halin atoni Yahudi sin nekan, in namautu Nai Paulus nabala bi o'of.