Read Uab Meto KISAH RASUL-RASUL 25 Bible Online

KISAH RASUL-RASUL 25 - Uab Meto bible

KISAH RASUL-RASUL 25

¹Leka Nai Festus nem ante pah nane neno tenu, in nao na'ko Kaisarea neu Yerusalem.

²Ma ale ana' lasi fuat nakaf ma ale atoni Yahudi makana sin nem neu Nai Festus he natam lasi antom Nai Paulus.

³Ma sin antoti he nati' in mo'e alekot neu sin le neki amle'ut neu Nai Paulus; esle hen lelu Nai Paulus nem neu Yerusalem. Fun sin malomis nalali he namate Nai Paulus bi lanan atnanan.

⁴Fun Nai Festus natae nak: Sin anpao Nai Paulus es Kaisarea ma au amsa he fani laba eu Kaisarea.

⁵Ma in nak, “Es nane ale atoni makana, hi mok kau meu Kaisarea ma mitam lasi neu in, kalu namneo in nasanab.”

⁶Leka Nai Festus namaika bi Yerusalem neno fanu ai neno bo'es oke te in anfani neu Kaisarea. Ma nokfa onane te in anmo'e tolas lef lasi, ma anlelu Nai Paulus anhake bi in matan.

⁷Leka Nai Paulus nem ante, ale atoni Yahudi le neman na'ko Yerusalem anhake natef nan, ma natam lasi namfau ma mafena mes ale lasi nane ka ma u'fa.

⁸Mes Nai Paulus ansaksi in lasi amneot ma nak, “Au ka usanab fa neu atoni Yahudi sin Plenat Knino, ai neu Ume Uisneno, ai neu Kesel pah Roma.”

⁹Mes Nai Festus he neka mina atoni Yahudi sin, in natae Nai Paulus ma nak, “Hom lomi ka hem nao meu Yerusalem he nafek lasi i anbi au matak?”

¹⁰Mes Nai Paulus natae nak, “Au hake es i bi toko alef lasi Kesel Roma in matan ma anbi bale nane mes nafek au lasi. Fun ama ho muhin namneo, au ka usanab fa neu atoni Yahudi.

¹¹Bait au usanab namneo ai au mo'e lasi amle'ut sa' le natai nok he namate kau, au lomi he mate. Mes, kalu lasi le sin natam nalali antom kau ka namneo fa, ka nabe'i es he nana'at kau on lasi he neka mina sin. Au toti he hake bi Kesel matan!”

¹²Leka anmalomis nok ale aof alef lasi te Nai Festus natae nak, “Fun hom lomi hem hake bi Kesel matan, of hom nao nai neu Kesel!”

¹³Ma neno fauk onane te Kesel Nai Agripa nok bi Bernike neman neu Kaisarea hen kiso Nai Festus.

¹⁴Fun sin namaika neno fauk anbi nane, Nai Festus natiaba Nai Paulus in lasi neu usif nane nak: “Anmu'i atoni hukum mese es i le Nai Feliks nasaitan nani bi neno in a'nao.

¹⁵Leka au fe bi kot Yerusalem, ale ana' lasi fuat nakaf ma ale amnasit to Yahudi sin natam lasi antom atoni nane ma antoti kau he ufek in lasi.

¹⁶Mes au utae sin ak, atoni pah Roma ka nabe'i fa he nana'at atoni amo'e sanat onle he neka mina sin. So in mabaina nok ale atoni le anmo'e lasi nokan he nati' in napeni mainuan hen saksi in aon antom lasi nane.

¹⁷Es nane sin nok kai mahai aim neu bale i. Ma nokfa onane au mo'e tolas lef lasi ma au boin atoni nane hem tam nem.

¹⁸Mes leka ale atoni le natam lasi anhake natef nan in, sin ka natam fa antom mo'et amle'ut onle au utenab bi au nekak.

¹⁹Mes al sin nasulin nokan antom sin lasi knino, ma antom atoni mese kanan Nai Yesus, le anmaten, mes Nai Paulus nak In anmoni.

²⁰Fun au nekak anmafen neu he ufek lasi humaf i onme. Ma au utan, ai hom lomi hem nao meu Yerusalem he nafek ho lasi anbin.

²¹Mes Nai Paulus antoti he nabala bi o'of, talan te Kesel nafek in lasi. Es nane anlelu hen pao bi o'of tal au sonu neu Kesel.”

²²Ma Nai Agripa natae Nai Festus nak, “Au amsa lomi he nen atoni nane.” Mai Nai Festus natae nak, “Noka, of hom nen mani tua.”

²³Nokfa onane Nai Agripa ma bi Bernike sin koenok neman nok bael pake amasat. Ma sin antam bi ke'an alef lasi nok ale solalus nakaf anaet ma ale atoni makana bi kot nane. Nai Festus naplenat he nati' Nai Paulus antam nem.

²⁴Ma Nai Festus na'uab nak, “Kesel Nai Agripa ma ale sin ama le him tok mibua mok kai ambi i. Hit mit atoni i, le atoni Yahudi sin, anbi Yerusalem ma anbi kot i sin natam lasi neun. Ma sin nem neu kau ma anhunun nak: Atoni i ka nabe'i fa hen moni.

²⁵Mes au upeni atoni i kan mo'ef lasi amle'ut sa' le he namate ma in anlomi hen hake bi Kesel matan. Es nane au ufek he nati' au sonu neu Kesel.

²⁶Mes au fe' ka upeni fa lasi sa' antom in le au he tui ani neu Kesel. Natuin lasi nane au uhakeb ani anbi i neu ki ala ki nes-nesi Kesel Nai Agripa, he nati' leka hit palekas talali, au upeni lasi he tui ani neu kesel.

²⁷Fun au utenab ak, ka nalekof, kalu hit sonu atoni o'of ma ka taton fa lasi amle'ut le in anmoe nani.”