Read Uab Meto KISAH RASUL-RASUL 26 Bible Online

KISAH RASUL-RASUL 26 - Uab Meto bible

KISAH RASUL-RASUL 26

¹Ma Nai Agripa na'uab neu Nai Paulus nak, “Ho mupeni mainuan hem saksi ho lasi.” Onane te Nai Paulus na'aiti in niman ma ansaksi in lasi nak,

²“Kesel Nai Agripa, au upeni au uak fun neno i au upeni manuan he uhoeb au lasi anbi ho matam, neu ale lasi le atoni Yahudi sin nasub nani neu kau.

³Nes-nesi natuin ho muhin namneo-namneo ale atoni Yahudi sin halat ma sin mo'et. Es nane au toti ko he nati' hom nen kau nok nek seusabat.

⁴Ale atoni Yahudi sin nahin au monik na'ko fe au munif kau, le afi au moni bi au to sin bi kot Yerusalem.

⁵Ma sin nahin kau, ma kalu sin anlomi, leko sin ansaksi nak afi au moni on atoni Farisi le natuin hai plenat knino nok alekot.

⁶Ma neno i au hake bi alef lasi sin matan natuin au uteb ani Uisneno In lasi manta'en, nok hai am uf sin.

⁷Ma ale hai uf bo'es am nua ampao mani ma minaoba mani fai manas nok nek atahas. Ma natuin au uteb lasi nane, Kesel Nai Agripa, atoni Yahudi sin nasub kau sanat.

⁸Nansa' hi ka miteb mak, Uisneno nafena amates?

⁹Maski onme amsa, au utenab, ak he tite nok matani kanaf, Yesus na'ko Nazaret.

¹⁰Lasi nane au mo'e amsa bi kot Yerusalem. Ma ka al fa utam atoni knino namfau bi o'of, leka au simo kuasat na'ko ana' lasi fuat, mes au lomi amsa leka he namate sin.

¹¹Ma au hamu'i sin anbi ume buat, ma useke sin he natotan nekan ateb knino. Fun au nekak anmaput ma u'to' talan te au li'u sin na'ko ale kot bian amsa.”

¹²Ma anbi lasi nane, leka au upeni kuasat ma mepu na'ko ana' lasi fuat sin anbi lanan nao neu Damsyik,

¹³naskek onane, Kesel Nai Agripa, oni manas namtetu au it meusine mese le in pinan nesi na'ko manas, ansanu nem na'ko neno tunan ma anaum nan kau ok au ini sin le anao nok kau.

¹⁴Ma haim bel meu nain, oket au nen hanfes nak neu kau neki a'at Ibrani nak: Saulus, Saulus, nansa' hom hamu'i kau? Susal neu ko, leka ho mutik besi pan aikan.

¹⁵Mes au utae ak: Ho sekau Ko, Usif? Ma Usif natae nak: Au Yesus Kau, le hom hamu'i.

¹⁶Mes hom fen nai ma amhake nai. Fun Au ulilok eu ko, he lek ko, amfani atuthaes ma saksi neu ale lasi le ho mit na'ko Kau ma antom ale sa' le Au he ulile neu ko.

¹⁷Of Au beti aikan ko mu'ko Yahudi ma mu'ko ale to le kan tam neu to Yahudi. Ma of Au sonu ko neu sin,

¹⁸he nati' hom fei sin matan he nate'unok na'ko mesokan neu meusine ma na'ko kuasat Nitu neu Uisneno, he nati' nekan nateb neu Kau ma napeni sako sanat ma ansimo bael tulu le Uisneno naloitan nani neu ale atoni knino sin.

¹⁹Es nane, Kesel Nai Agripa, au ka upehen itaf mnitas le na'ko neno tunan.

²⁰Mes au etun uhunun lasi nane neu atoni Yahudi bi kuan Damsyik bi kot Yerusalem ma neu pah Yudea ok-oke. Ma neu atoni bian amsa, he nati' sin nate'unok ma anfani neu Uisneno ma nanaob ale mepu namnono nok te'un nekaf nane.

²¹Ma natuin lasi nane, atoni Yahudi sin anheke kau bi Ume Uisneno ma he namate kau.

²²Mes natuin Uisneno anbab kau talan te neno i, au fe moni ma ahake he saksi neu abaut ma anaet nok. Ma sa' le au saksi nane ka naik fa na'ko sa' le afi Mafefa knino ma Nai Musa an etun nani,

²³esle, Neno Anan mes ansutai mane'at ma In anfani ahunut le anfen anfani na'ko amates, ma an etun meusine neu to Yahudi ma neu to bian amsa.

²⁴Leka Nai Paulus ansaksi lasi antom in mepu te Nai Festus na'uab nok hanan naek nak, “Hom nek maun, Paulus! Ho lasi hine nane anmo'e ko tal mumaun.”

²⁵Mes Nai Paulus nak, “Au ka nek maunu fa, Kesel Festus makana! Au u'uab nok amneot ma nok nek ahinet!

²⁶Kesel Nai Agripa amsa nahin ale lasi nane, es nane nabe'i au u'uab anbi Usif matan nok amneot. Fun katit fa lasi mese na'ko lasi nane le Usif ka nahinef, fun ale lasi nane kan bol fa tolo'-tolo'.

²⁷Ati Kesel Nai Agripa ho nekam nateb neu Mafefa knino sin ka? Au uhin, nak ho nekam nateb neu sin.”

²⁸Mes Nai Agripa natae nak, “Ala kle'o te hom fuli man kau he fani atoni Slani!”

²⁹Ma Nai Paulus nak, “Au he toti neu Uisneno, he nati' anbi leku tuka ai anbi neno suk a'lo, ka al fa am usif mes hi ala ki le amnen au molok i, amfani onle au, mes ka nok fa kolen besi i.”

³⁰Oke te am kesel ma ama kumlol ma bi Bernike ma alsin abit nane, sin anfenan.

³¹Leka sin ante mone, sin na'uaben es nok es nak, “Atoni i ka nasanab fa sa' le he namate in ai he natam neu o'of.”

³²Ma Nai Agripa nak neu Nai Festus, “Nabe'i he nafetin atoni i, kalu in kan totif hen nao neu Kesel.”