Read Uab Meto KISAH RASUL-RASUL 28 Bible Online

KISAH RASUL-RASUL 28 - Uab Meto bible

KISAH RASUL-RASUL 28

¹Leka hai ala kai amte meto nok aomina, ma hai mihin, pah nane pah Malta.

²Ma ale atoni le natua anbi pah nane sin ansimo kai nok nek athoes. Fun sin nahopi ai mata' naek es neu kai, natuin ulan ansanu ma mainikin nok.

³Leka Nai Paulus naiti hau klibu hen tao neu ai te, natuin ai malala, kaun es anpoi ma ansau in niman.

⁴Leka ale atoni sin nit kauna nane nakfilion bi Nai Paulus niman te, sin na'uaben es nok es nak, “Atoni i oni atoni abulalut, fun nahoni nani na'ko tasi, Uisneno Amneot kan paleob nani fa hen moni.”

⁵Mes Nai Paulus anlisin natam kauna nane neu ai, ma in ka naben fa menas.

⁶Mes sin natenab nak, in niman of anfu'un ai anmu'an ma kle'o es of anmate. Leka sin anpao suk a'lo ma sin nit nak katit fa sa' anbol neun, sin natenab anfan nak Nai Paulus oni uisneno.

⁷Fun anhaumak bale nane ama kumlol in afu esan. Kumlol nane kanan Nai Publius In ansimo kai on in ini nok nek atfeis neno tenu.

⁸Ma bi neno nane Nai Publius in amaf antup, natuin mainin ma an hoenon na'. Es nane Nai Paulus antam neu in ke'an ma anonen toti ma na'aiti niman neun oke te in naleko'.

⁹Ma natuin lasi nane ale amenat na'ko pah nane sin neman ma Nai Paulus naleko' sin amsa.

¹⁰Ma sin alsin antola kai, ma leka hai hem nao te, sin naloitan ale sa' neu hai lanan.

¹¹Ma funan tenu namuni te haim sae meu bnao le na'ko Aleksandria ma anhake bi pah Malta bi neno mainikin anaek. Ma bnao nane anpake malak “Dioskuri”, (le'u mahuma ankuan Nai Kastor ma Nai Poluks).

¹²Ma haim nao mituin Sirakusa ma mimaika ambi nane neno tenu.

¹³Oke te haim sae bnao ma amnao mituin tasi ninen ma amte Regium. Ma nokfa anin na'ko neno Li' anfu hai bnao oket neno nua hai mimte Putioli.

¹⁴Ma anbi nane hai mi'eku mok bae knino sin, ma sin anhok kai oke te hai mimaika mok sin neno hitu. Nalali te haim nao amteni meu Roma.

¹⁵Ma bae knino sin anbi Roma leka sin nen neu kai, sin nem ma ansenu kai bi Masa' Apius ma ume Snasat Tenu. Leka Nai Paulus nit sin, in anonen toti natulu nekan neu Uisneno hen hatane sin nekan.

¹⁶Leka hai mimte Roma, Nai Paulus napeni manuan he namaika anbi in ume nok solalus mese hen pao.

¹⁷Ma neno tenu namuni, Nai Paulus anboin ale atoni Yahudi makana bi bale nane. Ma leka sin nabuan, Nai Paulus namolok nok sin ma nak, “Bae benu ala ki, au ka mo'ef sanat sa' neu hit to ai neu hit am uf sin halat, sin anheke kau bi Yerusalem ma nana'at kau neu atoni Roma.

¹⁸Mes leka sin an tae au lasi, sin lomi he nafetin kau, fun sin ka napeni fa au sanat le he namate kau.

¹⁹Mes natuin atoni Yahudi sin antite fekat nane, es nane au aum eu Kesel, mes ka nok fa salit he utam lasi neu au to.

²⁰Es nane au toti, he nati' au kiso ki ma umolok ok ki fun natuin to Israel in afnekat anfutu kau neki kolen besi i.”

²¹Mes sin nak neu Nai Paulus, “Hai kam simof sulat na'ko hit bae knino sin bi pah Yudea antom ko ma katit fa esle he naton kai lasi amle'ut antom ko.

²²Es nane haim lomi hem nen na'ko ko, ho mutenab onane, fun hai mihin, mak nonot i sin antite ho lasi noina anbi me-me.”

²³Oke te sin manlekan neno neu Nai Paulus, ma leka neno manlekan ante sin neman neu Nai Paulus in ume. Ma Nai Paulus namolok ansaksi plenat Uisneno neu sin, na'ko nok-noka tal neno anmabe. In na'uab neki a'an Plenat Uisneno le matui anbi Nai Musa in sulat ma Mafefa knino sin sulat. Ma in anlomi he nati' sin nekan nateb neu Yesus.

²⁴Ma bian sin nekan nateb neu ale sa' le Nai Paulus na'uab, mes bian sin nekan ka nateb nani fa.

²⁵Oke te sin nasano natuin sin uab nane ka nae'ku fa es nok es. Mes Nai Paulus na'uab anteni fefa mese nak, “Namneo, a'at le Smanan Knino natiab nani neu hit am uf sin neki Mafefa Knino Nai Yesaya natiabon kun le in hanan nak:

²⁶Hom nao nai neu to i, ma mu'uab mak: Of him nen ma nitnin, mes ka mihinef, of him kiso piut, mes ka mitaf.

²⁷Fun to i in nekan anmafaub, ma sin luken nen mes anmafen, ma sin matan nane nabil; he nati' kais sin nit neki sin matan ma nen neki sin luken ma nahin neki sin nekan, oket nali'on anfani he au uleko sin.

²⁸Es nane te hi mes mihin, nak tetus le na'ko Uisneno i anfe nani neu ale uf bian le kan tamaf nonot Yahudi ma of sin nen.” [

²⁹Ma leka Nai Paulus na'uab nalali te, ale atoni Yahudi sin naon mes nasulin es nok es.]

³⁰Ma Nai Paulus namaika ton nua anbi ume le in anseb, ma in ansimo ale atoni le nem neun.

³¹Ma an etun Plenat Uisneno ma nanoina sin antom Usif Yesus Neno Anan ka nok fa tu'as ekat sa'.