Read Uab Meto KISAH RASUL-RASUL 3 Bible Online

KISAH RASUL-RASUL 3 - Uab Meto bible

KISAH RASUL-RASUL 3

¹Bi neno mese onane te haumak leku onen totis, leku tenu neno mabe, Nai Petrus nok Nai Yohanes nao neu Ume Uisneno hen onen toti.

²Bi nane anmu'i atoni mese napeni men ole na'ko in ainaf apun. Neno-neno sin anloi neki ma nabela haumak Ume Uisneno eno le antek nak Eno Amasat, hen toti amnaut na'ko ale atoni le hen tam neu Ume Uisneno.

³Leka in nit Nai Petrus ma Nai Yohanes hen tam neu Ume Uisneno in toti sin hen fen sa'.

⁴Ma sin kiso nake' in ma Nai Petrus nak, “Kiso neu kai fe.”

⁵Ma atoni nane ankiso sin fun nafnekan hen simo sa' na'ko sin.

⁶Mes Nai Petrus nak, “Au ka mu'if muti ma mnatu he fe ko, ma sa' le au mu'i, of au fe ani neu ko. Anbi Yesus atoni Nazaret In kanan, hom nao nai.”

⁷Oke te Nai Petrus antopu atoni nane in niman ne'u hen tuntaku in ma anfen. Naskek onane te in haen anmatane kun.

⁸In titbok anfen ma nao naonison ma natuin sin antam neu Ume Uisneno fun in nao nok ma anokaleti ma anpules Uisneno.

⁹Ale to sin nit in le nao nok te anpules Uisneno,

¹⁰nalali te sin nahin in, le antok anbi Eno Amasat Ume Uisneno, ma antoti amnaut talan te sin namkak natuin ale sa' le anbol neu sin.

¹¹Fun atoni nane in natuin piut Nai Petrus ma Nai Yohanes. Ma leka sin tenu sin ante bale mae'ka bi Ume Uisneno le antek nak, “Ke'an Salomo” to ok-oke nem neu sin fun ansanmak neu lasi nane.

¹²Leka Nai Petrus nit ale atoni nane sin, in nait uab nak, “Hi atoni Israel, nansa' hi mimkak neu lasi i ma nansa' him kiso mi'ke kai. Ai hi mitenab mak atoni i nabe'i natuin hai matanim ma natuin hai atoni amtaus Uisneno ka?

¹³Uisneno neu Nai Abraham, Nai Ishak ma Nai Yakub, Uisneno neu hit am uf sin, naliatas In ate esle Yesus le hi mina'at ma mitotan bi Nai Pilatus matan, le in lomi he nafetin In.

¹⁴Mes hi mitotan atoni Knino ma Amneot, ma him lomi nafetin ki atoni abulalut.

¹⁵Onane te In, le Atopu honis hi mimate mani, mes Uisneno nafena In na'ko amates; ma hai le i amsaksi lasi nane.

¹⁶Ma natuin matani anbi Yesus In kanan, atoni men ole nane nabe'i anfani onle hi mit ma mihine. Ma lasi nek teb nane es anfe atoni i naleko bi hi matam ok-oke.

¹⁷Bae benu alki, au uhin afi hi ma ale hi nakaf sin hi mo'e sa' neu Yesus, ma hi ka mihin fa lasi.

¹⁸Ma natuin lasi onane Uisneno he natis In a'an le afi In an etun nani neu Mafefa knino sin, nak: Kesel Afetin afe honis le In ansonu nani mes hen sutai mafena.

¹⁹Es nane te mipis nai ma mite'un hi nekam nai he nati' ansako naneku hi sanat,

²⁰of Uisneno nabalab ki manikin ma ansonu Yesus neu ki on afi In ba'an nani hen fani Uisneno Afetin honis.

²¹In namaika bi neno tunan talan te Uisneno nafe'un ale sa', onle In an etun nani neu Mafefa knino sin na'ko batan ahunut.

²²Fun Nai Musa nak: Uisneno of nahakeb ki Mafefa knino mese na'ko hi bae sin, on au. Him nen nai ale lasi le Mafefa knino nane he na'uab neu ki.

²³Ma ale atoni le ka natuin fa Mafefa knino nane in hanan, of antite napoitan na'ko to Uisneno ma nale'un nani.

²⁴Ma ale Mafefa knino sin na'uab lasi Uisneno, na'ko Nai Samuel ma ale Mafefa knino bian le nem namuni, sin alsin neki beno antom batan i.

²⁵Hi es amsimo fef bela nane ma ale lasi alekot le Uisneno nabela nani nok hit am uf sin, leka In nakua a'an neu Nai Abraham: Ma bi ho sufam ale uf bi pah pinan i of napeni alekot.

²⁶Ma Uisneno nahakeb In Ate fun ansonu nahunu neu ki, hen fe alekot neu ki, ma antopu napoitan ki mi'ko ale hi mo'et apenut.”