Read Uab Meto KISAH RASUL-RASUL 4 Bible Online

KISAH RASUL-RASUL 4 - Uab Meto bible

KISAH RASUL-RASUL 4

¹Leka Nai Petrus ma Nai Yohanes fe na'uab nok to onane, naskek Ana' Lasi Fuat Nakaf ma apao Ume Uisneno nakaf ma atoni Saduki nem neu sin.

²Sin nato' fun Nai Petrus ma Nai Yohanes nanoina to ma an etun nak Yesus anfen anfani na'ko amates ma nane anfani taka mese nak: Atoni amates of anfen anfani.

³Ma sin anheke sin ma natam anlapat sin bi o'of talan te meu noka fun neno anfaien.

⁴Ma ale atoni le sin nen a'at nane sin nekan nateb knino ma sin ansato smanaf oni atoni nifun nim.

⁵Ma nokfa onane te ale atopu to Yahudi ma ale amnasit ma ale ahinet Sulat, sin anmo'e buat bi Yerusalem,

⁶nok Ana' Lasi Fuat Nakaf Anaet Nai Hanas ma Nai Kayafas, Nai Yohanes ma Nai Aleksander ma ale bian le antam nonot Ana' Lasi Fuat Nakaf Anaet.

⁷Ma nahakeb Nai Petrus ma Nai Yohanes anbi tolas sin matan ma antoti sin nak, “Hi mileko atoni men ole nane meki kuasat sa' ma meki sekau in kanan ka?”

⁸Ma Nai Petrus le nahenu nok Smanan Knino natae nak, “Hi atopu to ma amnasit-amnasit,

⁹kalu neno i hi mitan kai natuin mo'et alekot neu amenat ma he miton ki meki kuasat sa' atoni nane napeni aomina',

¹⁰es nane mihin nai alki ma ale to Israel, natuin Yesus Neno Anan, na'ko Nazaret In kanan, le hi miboni bi hau nehe mes Uisneno nafena nafani na'ko amates. Bi In kanan kun atoni i anhake bi hi matam nok aomina.

¹¹Nai Yesus, fatu le ameup ume anpolin nani esle hi, mes In anfani fatu makana.

¹²Fun katit kanaf bian al anbi Yesus kanan, ma katit fa kanaf bian bi pah pinan i le anfe neu mansian he nahoni kit nekin.”

¹³Leka sin abuat nane nit Nai Petrus ma Nai Yohanes le ka namtau fa, ma sin nahin nak atoni nua nane atoni abaut ma ka ahinet fa, oke te sin namkak; ma sin nahin nak afi sin nua sin nok Yesus.

¹⁴Fun sin nit atoni le naleko nane anhake nok haefin nane, sin ka na'uab fa sa' anteni.

¹⁵Ma sin anlelu haefin nane anpoi na'ko ke'an buat nane, nalali te sin malomin,

¹⁶ma nak, “Hit het mo'e sa' neu atoni i sin ka? Fun ale to bi kot Yerusalem nahin nalali lasi sanmakat le sin mo'e nani ma hit ka tatotan fa lasi nane.

¹⁷Mes he kais nane nasitbon neu to amfaun, leko nesi hit hakatau sin ma tal sin, he kais namolok kanaf nane anten neu sekau amsa.”

¹⁸Ma sin boin sin antam, fun ankakan sin nak: Kais him saksi ma minoina amteni meki Yesus kanan.

¹⁹Mes Nai Petrus ma Nai Yohanes natae nak, “Neu, hi mifek kim, me es namneo bi Uisneno matan: Hai mimtaus ki ka ai mimtau neu Uisneno.

²⁰Fun hai ka mibe'if he mitena mok lasi le hai mit ma amnen milali.”

²¹Fun sin abuat nane ka napeni fa lalan he nasanab haefin nane, oke te sin hakatau sin ma nafetin sin nao, fun sin namtausan ale to le naliatas Uisneno natuin lasi le anbol nalali.

²²Atoni le naleko natuin lasi amkakat nane in uan nesi na'ko ton bo'ha.

²³Nafetin nalali sin onane te, Nai Petrus ma Nai Yohanes nao neu sin ini sin ma an etun sin sa' le nakaf-nakaf ma amnasit-amnasit na'uab nani.

²⁴Leka sin ini sin nen lasi nane te, sin anonen nekaf mese neu Uisneno nak, “Koi Uisneno, Ho es muhakeb neno tunan ma pah pinan, tasi nok in nesan ok-oke.

²⁵Fun Ho mukua a'am meki Smanan Knino natuin Ho ate hai ama Nai Daud; Ho mukua a'am mak: Nansa' ale to le ka nahin Uisneno sin nato', nansa' ale uf-uf sin nami lasi luman kun?

²⁶Ale usif pah pinan nem anhake ma ale nakaf nem nabua hen matoe nok Uisneno ma Kesel Afetin.

²⁷Fun namneo Nai Herodes ma Nai Pilatus nabua nok to le ka nahin Uisneno ma to Israel bi kot i. Sin nabua hen tumatan Ho ate Knino Yesus le Ho maiti anfani Kesel Afetin.

²⁸Sin al sin nabua hen mo'e ale sa' le Hom lek mani nahunu meki Ho kuasat ma Ho lomim kun.

²⁹Ma leku i, koi Uisneno, Hom kiso sin an hakatau kai. Es nane amfe kai matani he Ho ate kai amsaksi Ho a'am nok amlilat.

³⁰Menu nai Ho nukum he muleko amenat sin ma mulile ale lasi sanmakat ma ale taka, meki Ho ate knino Yesus In kanan.”

³¹Ma leka sin fe anonen toti onane te, bale le sin nabua anbi nabeko, oke te sin alsin nahenu nok Smanan Knino, ma sin na'uab Uisneno a'an nok nek mainuan.

³²Ma ale atoni nekan nateb nalali, sin nekaf mese ma smanaf mese, ma katit fa es na'uab nak: Sa' le in ini nane ini kun, mes ale sa' nane sin ini ok-oke.

³³Ma nok kuasat matani haefin ansaksi antom lasi Usif Yesus fen anfani ma halinat neno nathoe anbi sin.

³⁴Ma katit fa es anbi sin le anma'nuk. Fun ale atoni le anmu'i najan ai ume, nasosa nani sin mu'in nane ma in upan sin neki nem,

³⁵ma nabela nani bi haefin sin matan; oke te anbati neu ale sekau le nuk nani.

³⁶Onane amsa Nai Yusuf, le haefin antek in kanan Nai Barnabas, in oten an amela, atoni Lewi na'ko pah Siprus.

³⁷In nasosa in lele, oket in neki upan ma nabela nani bi haefin sin matan.