Read Uab Meto KISAH RASUL-RASUL 6 Bible Online

KISAH RASUL-RASUL 6 - Uab Meto bible

KISAH RASUL-RASUL 6

¹Bi neno-neno, asimo lasi Yesus ansato piut. Onane te ale to Yahudi le na'uab neki a'at Yunani sin namunu neu atoni Ibrani sin. Fun batis neu sin bife banu ka nanaobon fa nok alekot bi tuthaes neno-neno.

²Es nane haefin bo'es am nua anboin ale asimo lasi sin ma nak, “Hai mitenab bi hai nekam, leka me hai he maikoti A'an Uisneno ma hem tuthae lasi mnahat.

³Es nane him beti nai bae, atoni hitu bi hi atnanam, le naleko ma nahenu nok Smanan Knino ma ahinet. Oke te hai misaeb sin neu mepu nane,

⁴he nati' mitupu hai nekam bi onen totis ma tuthaes bi A'an Uisneno.”

⁵Ma tolas knino ok-oke sin ansimo a'at nane, ma anbeti Nai Stefanus le nekan nateb knino ma nahenu nok Smanan Knino, ma Nai Filipus, Nai Prokhorus, Nai Nikanor, Nai Timon, Nai Parmenas ma Nai Nikolaus, le antam to Yahudi na'ko Antiokhia.

⁶Fun nahakeb sin hitu sin bi haefin sin matan ma anonen tek alekot neu sin.

⁷Nak A'an Uisneno nis piut ma asimo lasi bi Yerusalem ansato anteni namfau. Ma Ana' Lasi Fuat namfau nem ma nana'at sin aon ma nekan nateb neu Yesus.

⁸Ma Nai Stefanus le nahenu nok halinat neno ma matani, anmo'e lasi sanmakat taka namfau bi ale to sin matan.

⁹Mes atoni bian na'ko to Yahudi le antek sin nak tolas Libertini — tolas knino nane esle' atoni na'ko Kirene ma na'ko Aleksandria — ma to Yahudi bian na'ko Kilikia ma na'ko Asia. Atoni nane sin fen ma anmatoe nok Nai Stefanus.

¹⁰Mes sin ka nabe'i fa sa' le Nai Stefanus na'uab nani fun nane lasi hine ma mepu Smanan Knino kun.

¹¹Oke te sin antite natam atoni fauk he na'uab nak, “Him nen atoni i na'uab amle'ut neu Nai Musa ma neu Uisneno.”

¹²Onane te sin nak'ola to ma amnasit-amnasit ma ahinet sulat, ma anheke Nai Stefanus, ma anhel neki nao neu Tolas Alef Lasi Nakaf sin matan.

¹³Oke te sin nahakeb saksi moel le na'uab nak, “Atoni i antek uab amle'ut piut neu ume knino i ma Plenat Knino nok.

¹⁴Fun haim nen in na'uab nak: Yesus, atoni Nazaret nane, he nale'un Ume Uisneno ma hen nabaina lekat le Nai Musa nana'at nani neu kit.”

¹⁵Ma ale atokos bi Tolas Alef Lasi Nakaf nane sin ankiso Nai Stefanus, ma sin nit Nai Stefanus human on ahake neno tunan human.