Read Uab Meto KISAH RASUL-RASUL 7 Bible Online

KISAH RASUL-RASUL 7 - Uab Meto bible

KISAH RASUL-RASUL 7

¹Ma Ana' Lasi Fuat Amnanut nak, “Ale lasi, le sin na'uab nane namneo ka?”

²Nai Stefanus natae, “Bae benu ma sin au ama alki, hi mitnin fe! Afi hit am uf Nai Abraham fe ka na'oni fa neu Haran mes fe antok bi Mesopotamia, Uisneno apinat nem neu in ma nak:

³Hom poi nai mu'ko ho pah ma hom nao meu pah le Au he lekan ko.

⁴Oke te Nai Abraham anpoi na'ko pah Kasdim ma antok bi Haran. Leka in amaf anmate, Uisneno anlelu Nai Abraham nem neu pah i, le him mimaik ambine.

⁵Bi bale nane Uisneno kan fe fa neu Nai Abraham, bale pis es maski lakat mese amsa kahaf, mes Uisneno anmantaen neu Nai Abraham nak of namuni te Uisneno anfe bale nane neu Nai Abraham ma neu in sufan ka'un. Bi tomas nane Nai Abraham fe kan mu'if anah.

⁶Uisneno nakua a'an nak on i: ‘Of hi sufam anfani atoni amnemat bi pah bian. Pah tuaf nane of anhamu'i sin on ate talan te ton natun ha.

⁷Mes of Au hukum ale atoni le anhamu'i sin, Uisneno nakua a'an onane, ma nalali te sin poi na'ko pah nane ma nem neu bale i hen nabes neu Kau.’

⁸Ma Uisneno nahakeb lasi mantaen antom lasi hapit ma helit nok Nai Abraham. Ma Nai Abraham nahonis Nai Ishak oket anheli bi neno fanu. Ma Nai Ishak nahonis Nai Yakub ma Nai Yakub nahonis in anhin bo'es am nua esle' hit am uf Yahudi.

⁹Ma natuin lasi nek unu, hit am uf sin nasosa Nai Yusuf neu pah Mesir, mes Uisneno anhake nokan.

¹⁰Ma nafetin in na'ko ale malenat ma anfe halinat ma hine neu in, leka anhake bi Nai Firaun usif pah Mesir matan, oke te Nai Firaun naiti anfani ana' aplenat bi pah Mesir ma neu in sonaf nok.

¹¹Ma oket amnahas anaek anbol bi pah Mesir ma pah Kanaan nok, talan te hit am uf sin ka napeni fa mnahat.

¹²Leka Nai Yakub nen, nak anmu'i mnahat bi pah Mesir, in lelu hit am uf sin nao neu pah nane. Sin nao i on hae ahunut.

¹³Ma leka sin nao hae nua onane, Nai Yusuf nalile in aon neu in tataf sin, ma Nai Firaun nahin Nai Yusuf in ini sin.

¹⁴Nalali te Nai Yusuf lelu nunan in amaf, Nai Yakub, nok in sufan smanaf bo'hitu ma nim.

¹⁵Ma Nai Yakub nao neu pah Mesir. Ma in nok hit am uf sin anmate bi pah Mesir.

¹⁶Ma sin neki aon nitu neu Sikhem ma nabela sin bi nuat naukel le Nai Abraham ansos neki noni muti na'ko Nai Hemor in anhin bi Sikhem nane.

¹⁷Mes neno mantaen le Uisneno anfe nani neu Nai Abraham haumaken, to nane ansato piut bi pah Mesir.

¹⁸Ma usif bian le naplenat bi pah Mesir, le ka nahinef Nai Yusuf.

¹⁹Usif nane naim ela neu hit to ma anhamu'i hit am uf sin, lelu hen polin sin anah le fe nahonis sin, he nati' hit to kais anpe' anteni.

²⁰Ma bi leku nane nahonis Nai Musa le namas bi Uisneno matan. Ma sin anpanat nani bi in amaf ume funan tenu.

²¹Oke te sin anpolin Nai Musa mes Nai Firaum in feotnai naiti ma anpanat on in anah kun.

²²Ma sin nanoni Nai Musa neki lasi hine na'ko atoni Mesir ma in nabe'i bi in a'at ma in mepu nok.

²³Fun leka in uan ante ton bo'ha, in nekan anlomi he nao ankiso in ini sin, esle' to Israel.

²⁴Leka in nit atoni Mesir mese anhamu'i atoni Israel mese oke te in hake nok atoni Israel nane ma namate atoni Mesir nane.

²⁵Fun in natenab nak of in ini sin nahin, nak Uisneno anpake in he nafetin to Israel, mes sin ka nahinen fa.

²⁶Nokfa onane te in nem anteni ma nit atoni Israel nua sin mabanan es nok es, oke te in nami he naleko sin, nak: Bae, nansa' es hi maban, ait hi ka meubaen fa ka?

²⁷Atoni le anmo'e amle'ut neu in aonbian nane antite Nai Musa ma nak:

²⁸Sekau es nasaeb ko hem fani nakaf ma alef lasi bi kai ka? Ait ho he mumate kau amsa on afi neno ho mumate atoni Mesir nane ka?

²⁹Leka Nai Musa nen a'at nane in naen na'ko pah Mesir neu pah Midian. Ma bi pah Midian in nahoni anmone nua.

³⁰Ma ton bo'ha namuni te, ahake neno tunan mese nem neu Nai Musa bi mnela snaen haumak Nu'af Sinai, Ahake nane nalileon bi ai pina le anpoi na'ko kis lubu.

³¹Leka Nai Musa nit ai nane in namkak. Es nane te in nao anhaumak he nahin nani Uisneno hanan nak neu in:

³²Au le i hi am uf sin Uisneno, Nai Abraham, Ishak ma Yakub sin ini. Oke te Nai Musa nata'i ma ka nabe'i hen kiso anteni.

³³Ma Uisneno nakua a'an: Mupoitan penhae na'ko ho haem, fun bale hom hake nane bale knino kun.

³⁴Au it ma uhin ulali Au to sin sutais bi pah Mesir, ma Au nen ulali sin sakoit. Es nane Au sanu he nati' ufetin sin Aum nai, Au he sonu ko neu pah Mesir.

³⁵Nai Musa le i, afi sin antite ma nak: Sekau es nasaeb ko hem fani nakaf ma alef lasi ka? Musa le nane amsa Uisneno hen sonu on nakaf ma afetin nok ahake neno tunan le nalilon bi kis lubu nane.

³⁶In es neki to Israel na'ko pah Mesir fun anmo'e sanmakat ma taka namfau bi pah Mesir, bi Tasi Amtasa ma mnela paha snaen ton bo'ha in amnanun.

³⁷Musa le i afi in es nak neu to Israel: Of Uisneno he nahakeb neu ki Mafefa knino mese onle au.

³⁸In kun es anhake bi to atnanan bi mnela paha snaen nok ahake neno tunan le na'uab nokan bi Nu'af Sinai nok hit am uf sin — Ma in es ansimo a'an honis hen fe nani neu ki.

³⁹Mes hit am uf sin kan lomi fa he nen in mes antite nani, fun sin lomi hen fani neu pah Mesir.

⁴⁰Ma sin nak neu Nai Harun: Moe kai nai, uisneno le hen topu kai, fun Nai Musa le antopu kai poi mi'ko pah Mesir — hai ka mihin fa sa' le hen bol neu in.

⁴¹Oke te sin mo'e nan bijae tipu mese ma sin neki fuat neu le'u mahuma nane ma sin namlil natuin sa' le sin anmo'e nani neki sin niman kun.

⁴²Ma Uisneno nasaitan sin ma namautu sin he nabes neu ale afkun bi neno tunan, onle antui nani bi Mafefa knino sin sulat nak: Hi to Israel ki, bi ton bo'ha hi kam lolo mit hi mu'it ma mitnat mani neu Kau bi mnela paha snaen!

⁴³So mak him loi meki le'u mahuma Molokh ma le'u mahuma afkun Refan, ma hi mibes meu le'u mahuma nane sin. Es nane of Au polin ki neu noel bian pah Babel.

⁴⁴Fun um-ume le Uisneno nem neu hit am uf sin bi mnela paha snaen, sin anmo'e nani natuin Uisneno anlek nani neu Nai Musa ma anmo'e natuin heta le sin nit nalali.

⁴⁵Sin am uf sin ansimo um-ume nane bi neno Nai Yosua antopu sin. Ma sin neki nem bi pah i, le nasik nani na'ko to le Uisneno anli'u sin na'ko hit am uf sin matan; talan te Nai Daud in batan.

⁴⁶Ma Nai Daud napeni halinat bi Uisneno In matan, ma in toti he nahakeb ume neu Uisneno.

⁴⁷Mes Nai Salomo es nahakeb ume neu Uisneno.

⁴⁸Mes Uisneno Amnanut ka namaika fa bi ume le anmepu neki mansian niman, on antui nani bi Mafefa knino sin sulat:

⁴⁹Neno tunan nane Au toko, ma pah pinan nane Au haek telin. Hi he mihakeb ume sa' neu Kau, Uisneno nakua In a'an onane, of Au usnas bi bale me ka?

⁵⁰Fun ale sa' nane Au mo'e kuk eki Au nimak!

⁵¹Hi atoni nak fatu ki ma luke teme ki neu Uisneno ma amtite Smanan Knino onle hi am uf sin ma hi amsa.

⁵²Ai anmu'i Mafefa knino le hi am uf kan hamu'i sin ka? Fun sin namate ale atoni le nem nahunu ma an etun antom Atoni Amneot le he nem, le him aneb ma mimate mani.

⁵³Ale ahake neno tunan sin natiab nalali plenat knino neu ki, mes hi ka mituin mani fa.”

⁵⁴Leka Tolas Alef abuat nakaf sin nen ale lasi nane te, sin nekan namen ma sin neku nisin neu Nai Stefanus.

⁵⁵Mes Nai Stefanus, le nahenu nok Smanan Knino, anbaisenu neu neno tunan. In nit Uisneno In pinan ma Yesus anhake bi In niman ne'u.

⁵⁶Ma in nak, “Kiso, au it neno tunan natfei ma Anmone Pah To anhake bi Uisneno niman ne'u.”

⁵⁷Mes sin ansun sin luken ma anhunun nok hanan naek ma antumatan Nai Stefanus.

⁵⁸Ma sin anhel napoitan Nai Stefanus na'ko kot ma anpoli neki fatu. Ma ale saksi sin nabela sin tainusat anbi atoni munif mese kanan Nai Saulus in matan.

⁵⁹Ma sin fe anpoli Nai Stefanus, in an onen toti ma nak, “Koi Uisneno, kais Ho musuba sanat neu sin!” Ma in na'uab nalali te in anmate.