Read Uab Meto KISAH RASUL-RASUL 8 Bible Online

KISAH RASUL-RASUL 8 - Uab Meto bible

KISAH RASUL-RASUL 8

¹Ma Nai Saulus amsa anlomi, he namate Nai Stefanus. Ma bi neno nane hamu'it naek anbol neu tolas knino bi kot Yerusalem. Ma sin alsin nasitbok neu pah Yudea ma Samaria, al haefin sin kahaf.

²Mes ale atoni le namtausan Uisneno sin ansub Nai Stefanus fun ankul ma ankae neun.

³Mes Nai Saulus in nami lanan piut he nale'un tolas knino. In antam neu um-ume ma anhel napoitan ale atoni ma bife le anpalsai neu Yesus ma natam sin neu o'of.

⁴Ma alsin le nasitbon neu pah nane sin an etun lasi knino bi me-me.

⁵Ma Nai Filipus in nao neu kuan Samaria ma an etun neu sin antom Yesus Neno Anan.

⁶Leka ale atoni sin nen Nai Filipus in na'uab ma nit ale taka le in anmo'e nani, sin alsin nekaf mese ansimo le in na'uab nani.

⁷Fun ale sman nitu anpoi na'ko ale atoni le niut sae ma anbai nok hanan naek. Ma ale atoni me hae hela sin naleko kun.

⁸Es nane te ale to bi kuan nane sin namlil ma namoek.

⁹Ma anbi kuan nane anmu'i atoni mese kanan Nai Simon, le bi neno ahunut in mo'e ale taka le'u ma naneku to Samaria sin nekan, fun in tek in aon nak in atoni makana kun.

¹⁰Ma sin alsin antao nekan oke neu in na'ko abaut talan te anaet ma sin nak, “Atoni i Uisneno matane naek kun le mateka on matane naek.”

¹¹Ma sin natuin in fun suk a'lo in sanmakab sin neki in mo'et nane.

¹²Mes leka sin nen ale Lasi Knino le Nai Filipus an etun sin, antom Plenat Uisneno ma Yesus Neno Anan In kanan, ale atoni ma bife sin nana'at sin aon he naslani sin.

¹³Nai Simon amsa nekan nateb knino neu lasi nane, ma nit ale taka ma lasi amkakat le Nai Filipus anmo'e nani.

¹⁴Leka haefin bi kuan Yerusalem sin nen, nak to Samaria sin ansimo A'an Uisneno, sin anlelu Nai Petrus ma Nai Yohanes nao neu kuan nane.

¹⁵Leka sin nua sin ante kuan nane sin anonen toti, he nati' to Samaria ansimo Smanan Knino.

¹⁶Fun Smanan Knino fe kan sanu fa neu tuaf mese anbi sin, al naslani sin anbi Usif Yesus In kanan.

¹⁷Oke te sin nua sin naiti niman neu to Samaria nane ma sin ansimo Smanan Knino.

¹⁸Leka Nai Simon nit nak haefin na'aiti niman neu atoni nane sin, anfe Smanan Knino neu sin. Es nane te Nai Simon neki noni neu Nai Petrus ma Nai Yohanes,

¹⁹ma nak, “Fe kau kuasat nane amsa, he nati' leku au u'aiti nimak neu sekau te in ansimo Smanan Knino.”

²⁰Mes Nai Petrus nak neu in, “Mumle'u nai mok ho noni nane, fun ho mutenab mak hem sos halinat Uisneno meki noni.

²¹Ho ka mu'if hak he mok kai bi mepu i, fun ho nekam ka namneo fa bi Uisneno matan.

²²So mute'unom nai mu'ko amle'ut i ma amonen toti neu Uisneno he nati' In sako ho nek salit i.

²³Fun au kiso ko on eun oef amenut ma lasi penu na ate ko.”

²⁴Ma Nai Simon natae nak, “Him onen toti kau neu Uisneno, he nati' sa' le hi mi'uab milali kais antom neu kau.”

²⁵Ma leka sin nua sin an etun nalali A'an Uisneno, anfani neu kot Yerusalem. Ma anbi lalan sin an etun Lasi Knino neu to anbi kuan-kuan Samaria.

²⁶Ma ahake Uisneno nak neu Nai Filipus nak, “Hom fen nai ma hom nao meu neno aon bian A'ne'u, mutuin lanan le ansanu na'ko Yerusalem neu Gaza.” Lanan nane katit fa tuaf.

²⁷Oke te Nai Filipus in nao. Ma anmu'i atoni Etiopia mese, atoni makana ma nakaf neu apao maus Sri Kandake, usif bife pah Etiopia, le nao neu Yerusalem hen onen toti.

²⁸Atoni nane in fani nem ma antok bi in aklet tunan fun anso'i Mafefa Knino Nai Yesaya in sulat.

²⁹Ma Smanan Knino nak neu Nai Filipus, “Hom nao nai ma amhake haumak aklet nane!”

³⁰Ma Nai Filipus in nao neu bale nane ma in nen atoni nane in so'i Mafefa Knino Nai Yesaya in sulat. Ma Nai Filipus natan nak, “Ati ho muhin sa' le hom so'i mani ka?”

³¹Ma in natae nak, “Leka me au he uhin, kalu es ka naton kau fa?” Oke te in antoti Nai Filipus hen sae ma antok nokan.

³²Fun lasi le in anso'i nani nahan nak on i: In onle bibi kase le antopu nao neu bale lolot; ma onle bibi kase ana le kan anbai bi akatelis sin matan, onane te In kan fei fa In fefan.

³³Bi le In nabaunon kun anlefi lasi neu In; sekau of anpeo nahin in naone-ka? Fun naiti In asmanan na'ko paha pinan.

³⁴Ma atoni makana nane nak neu Nai Filipus, “Au toti ko, mafefa knino na'uab antom sekau ka? Antom In aon ka, ai antom neu atoni bian ka?”

³⁵Ma Nai Filipus na'uab na'ko a'at nane ma an etun Lasi Knino Usif Yesus neu in.

³⁶Oke te sin nao piut ma ante bale mese le anmu'i oe. Ma atoni makana nane nak, “Kiso, oe es nane. Sa' he nakain, kalu naslani Kau?” [

³⁷Nai Filipus nak, “Kalu ho mutenab meki nekam oke, nabe'i ho muslani.” Ma in natae nak, “Au uteb namneo, nak Yesus Neno Anan Uisneno Anmone kun.”]

³⁸Oke te atoni Etiopia nane nahakeb in aklet ma sin nua sin ansanu bi oe, ma Nai Filipus naslani atoni makana nane.

³⁹Ma leka sin anpoi na'ko oe te Smanan Knino nait neki Nai Filipus. Ma atoni makana nane ka nit anteni fa in. Mes nao anfin nok nek amlilat.

⁴⁰Mes Nai Filipus anpoi bi Asdod. In nao natuin pah nane ma an etun lasi knino neu to bi kot talan te in nem ante Kaisarea.