Read Uab Meto KISAH RASUL-RASUL 9 Bible Online

KISAH RASUL-RASUL 9 - Uab Meto bible

KISAH RASUL-RASUL 9

¹Ma Nai Saulus in nekan fe anmaputu hen hakatau ma namate Usif Yesus in asimo lasi sin. In nao neu Ana' Lasi Fuat Amnanut,

²ma antoti sul kuasat he nao neu atopu to Yahudi sin bi Damsyik. Leka in na'eku nok atoni ai bife le nekan nateb neu Usif Yesus in anheke sin ma neki sin neu Yerusalem.

³Leka in fe nao neu Damsyik ma anhaumak kot nane te, naskek meusine ansinek na'ko neno tunan ana'mu nan.

⁴In anmof neu najan ma in nen hanfes nak neune, “Saulus, Saulus, nansa' hom hamu'i Kau ka?”

⁵Nai Saulus natae nak, “Ho sekau Ko Usif?” Hanaf nane natae nak, “Au Yesus Kau, le hom hamu'i nane.

⁶Mes amfen nai ma amnao nai meu kot nane, bi nane of naton lasi sa' le ho he mo'e.”

⁷Mes ale in atoni le nao nokan, sin namkak fun sin nen hanaf nane mes sin ka nitaf es amsa.

⁸Ma Nai Saulus anfen ma anfai matan mes in ka nitaf. Es nane, sin antopu in antam neu Damsyik.

⁹Ma neno tenu in alon Nai Saulus kan kiso nit fa ma ka nah ma ka ninu fa nok.

¹⁰Ma bi kot Damsyik anmu'i Usif Yesus In asimo lasi mese kanan Nai Ananias. Usif nak neu in bi mnitas mese nak, “Ananias!” In natae nak, “Au es kau i, Usif!”

¹¹Ma Usif nak, “Hom nao nai meu Nai Yudas in ume bi Lanan Amneot ma amtoti fun anmu'i atoni mese na'ko Tarsus kanan Nai Saulus. Atoni nane anonen.

¹²Ma anbi mnitas in nit atoni mese kanan Nai Ananias antam nem ma na'aiti niman neun, he nati' in nit anfani!”

¹³Mes Nai Ananias natae nak, “Usi au nen na'ko atoni namfau antom atoni nane, le in anmo'e amle'ut neu Ho to aknino sin bi kot Yerusalem.

¹⁴Ma in nem neu i neki kuasat na'ko Ana' Lasi Fuat nakaf hen heke ale atoni le antek Ho kanam.”

¹⁵Mes Usif, nakua a'an neu Nai Ananias nak, “Hom nao nai, fun atoni i mabeti neu Kau he nati' an etun Au kanak neu ale to bian le ka nahin Uisneno ma neu uisfini ma neu to Israel.

¹⁶Mes of Au ulile neun ale lasi mane'at le in hen sutai natuin Au kanak.”

¹⁷Oke te Nai Ananias nao ma antam neu ume nane. In na'aiti niman neu Nai Saulus ma nak, “Saulus, au bae ko, Usif Yesus le afi nalile In aon neu ko bi lanan le hom nao mutuin, anlelu kau he aum eu ko, he nati' ho mit amfani ma muhenu mok Smanan Knino.”

¹⁸Ma bi leku nane on aknufan le anmof na'ko Nai Saulus matan ma in nit anfani. Oke te in anfen ma naslani nan.

¹⁹Ma leka in nah nalali te in napeni matani anfan. Ma Nai Saulus namaika bi kot Damsyik nok asimo lasi sin neno fauk.

²⁰In nao neu ume buat ma an etun nak Yesus nane Uisneno In Anmone.

²¹Ale atoni le sin nen lasi nane sin namkak ma nak, “Ati ka in fa, le nale'un ale atoni bi kot Yerusalem le antek Yesus kanan? Ma in nem neu i hen heke ma neki sin neu Ana' Lasi Fuat nakaf sin matan!”

²²Mes Nai Saulus ansaksi nok matani ma naneku to Yahudi le namaika bi kot Damsyik sin nekan fun in nalile neu sin nak Yesus nane lo Neno Anan kun.

²³Neno fauk namuni te atoni Yahudi sin malomin he namate Nai Saulus. Mes sin nek salit amle'ut nane Nai Saulus nahin nani.

²⁴Fun atoni Yahudi sin anpao kot enon, nok fai ma nok manas he nati' namate in.

²⁵Onane te bi fai es Nai Saulus in asimo lasi sin natam nani neu aba' mese ma nasanut neu baik lape kotin.

²⁶Leka Nai Saulus ante kot Yerusalem in nami hen apson neu asimo lasi sin, mes sin alsin namtausan in, fun sin nekan fe ka nateb fa, nak in amsa asimo lasi.

²⁷Mes Nai Barnabas ansimo in ma nokan neu haefin ma an etun sin neu afi Nai Saulus nit Usif Yesus bi lanan atnanan ma Usif namolok nokan onme ma in nanoina mat-mat Usif Yesus kanan bi Damsyik.

²⁸Ma Nai Saulus nabua nok sin bi Yerusalem, ma sin nanoni bi Usif Yesus In kanan.

²⁹Ma in na'uab ma anmatoti nok atoni Yahudi sin le sin na'uab neki a'at Yunani, mes sin nami he namate in.

³⁰Mes leka bae knino sin nahin lasi nane sin nokan nao neu Kaisarea ma ansonu in nao neu Tarsus.

³¹Ma bi neno-neno tolas knino bi pah Yudea, Galilea ma Samaria sin moni nok halan nekaf. Ma natuin matani ma halinat Smanan Knino, tolas knino nane napeni be'it ma ansato piut, fun anmoni nok amtaus neu Uisneno.

³²Ma Nai Petrus nao napun kuan-kuan ma bale-bale. Ma in nao amsa neu to knino bi kuan Lida.

³³Bi kuan nane in nae'ku nok atoni mese kanan Nai Eneas le in antup ton fanu bi hala tupa natuin in aon an ole.

³⁴Ma Nai Petrus nak neu in nak, “Eneas, Yesus Neno Anan naleko ko. Hom fen nai ma muloitan ho hala tupa!” Onane te in anfen kun.

³⁵Ma ale to kuan Lida ma Saron le nit Nai Eneas, sin nali'ok nem neu Uisneno.

³⁶Ma anbi kuan Yope anmu'i asimo lasi bife mese kanan bi Tabita — kanan bi a'at Yunani Dorkas. Bife nane anmo'e lasi alekot namfau ma namnau ale amamu'it sin.

³⁷Mes bi neno nane in namen ma anmate. Oke te sin naniu in aon nitu ma natupa anbi ke'an fafon.

³⁸Kuan Lida anhaumak kuan Yope. Leka a'simo lasi sin nen, nak Nai Petrus anbi kuan Lida, sin anlelu atoni nua nao neune ma antoti nak, “Koenom aum laba fe meu hai kuan.”

³⁹Ma Nai Petrus anfen ma nao nok sin. Leka sin ante kuan Yope, sin nok Nai Petrus neu ke'an fafon nane. Ma ale bife banu sin nem anhaumak Nai Petrus ma ankae ma nalile ale sobalu ma bael pake, le bi Dorkas anmo'e nani bi neno fe anmoni.

⁴⁰Mes Nai Petrus anlelu sin anpoi oke neu mone, oke te in li'tu ma anonen toti. Nalali te in naklelon neu bi Dorkas aon nitu ma nak, “Tabita, hom fen nai!” Oke te bi Tabita anfai in matan ma leka in nit Nai Petrus te, in fen ma antok.

⁴¹Ma Nai Petrus na' in niman ma anfiti nahakeb. Oke te Nai Petrus boin ale to knino ma ale bife banu, ma nalile neu sin, nak bi Dorkas anmoni.

⁴²Ma lasi nane natonon neu kuan Yope funam natef ma to namfau sin nekan nateb knino neu Uisneno.

⁴³Nalali te Nai Petrus namaika neno fauk bi kuan Yope anbi Nai Simon apeu pasu in ume.