Read Uab Meto 1 Korintus 10 Bible Online

1 Korintus 10 - Uab Meto bible

1 Korintus 10

¹Bae benu alki! Au lomi he nati' hi mihin, nak afi hit mnais unu sin namaoftok anbi nope ma sin alsin anlak Tasi Me'.

²Neu hen fani atuina Nai Musa, sin alsin ansu' oe anbi nope ma anbi tasi nane.

³Sin alsin anbukae mnahat knino papmese,

⁴ma sin alsin ninu oe knino papmese. Fun sin ninu na'ko faut putun knino le anhaek nok sin, ma faut putun nane lo Neno Anan kun.

⁵Mes onane amsa, Uisneno kan lomif sin bian amfaut, talan te namate sin anbi mnela paha snaen.

⁶Ale lasi nane anfani on lasi noina neu kit he namnauba kit; he nati' kais hit sinmakan ale lasi amle'ut onle sin anmo'e nalali.

⁷Onane amsa kais hit fani atuthae le'u onle sin atoni bian anmo'e onane. Fun antui nani anbi Sulat Knino nak, “Fun to nane sin antok he nah ma ninu; oke te sin anfen ma anmalin neu atuthae le'u.”

⁸Kais hi mo'e lasi paisa', onle sin atoni bian le anmo'e nani. Fun atoni bian nifun bo'nuam tenu anmaet neno mese natuin mo'et nane.

⁹Ma kais hit su' Uisneno, onle sin atoni bian anmo'e, talan te sin anmate natuin kauna ansau sin.

¹⁰Ma kais hi mimunu, onle sin atoni bian anmo'e, talan te ahake neno tunan namate sin.

¹¹Ale lasi nane anbol neu sin hen fani lasi noina neu kit. Ma ale lasi nane amsa antui nani he namnauba kit. Fun leku i hit moni atbi batan amsoput.

¹²Es nane te atoni le natenab, nak in hake nabala, anpanat nai he nati' kais in natsel ai anbel!

¹³Fun ale lasi su'at le anbol neu ki, nane lasi su'at neno-neno neu atoni pah pinan. Mes Uisneno In aki'at kun. In of kan paleob ki hen su'ki nesin hi be'im. Bi leku lasi su'at anbol neu ki, In of nasoitan ki lanan, he nati' him sutai mibe'i lasi su'at nane.

¹⁴Es nane bae benu manekat, so leko hi misaitan luli besa neu le'u.

¹⁵Au umolok neu ki on atoni ahinet. Onane te him tai mit lasi le au umolok neu ki.

¹⁶Ai klas mninut tulu nekaf, le hit tatulu nekak neu Uisneno, nane ka nekaf mese nok Neno Anan Ini maten ka? Ai utunu' le hit ebi nane ka nekaf mese fa nok Neno Anan In aon ka?

¹⁷Fun utunu' nane mese, onane amsa hit, maski hit tamfau, hit aof mese, fun hit tapeni pa' anbi utunu' mese nane.

¹⁸Him kiso mit to Israel natuin nekaf pah pinan. Sin nah na'ko mnahat le neki neu baki fuat, sin namesbok nok baki fuat nane.

¹⁹Au he u'uab sa' ka neu lasi nane? Baki fuat ai mnahat le neki neu baki fuat nane ka sa'-sa' fa?

²⁰Kahaf! Mes au ak, sin fuat nane neu nitu ma ka neu fa Uisneno. Ma au ka lomif he nati' hi mimesbom mok nitu.

²¹Hi ka mibe'i fa he minu na'ko Uisneno Ini klas mninu, oke te minu amteni na'ko nitu ini klas mninu. Hi ka mibe'i fa hem tok mibua anbi hit Uisneno In mei tolas, oke te, amtoko amteni anbi nitu in mei.

²²Ait him lomi he mikoke Uisneno In to'as ka? Ait hi tabe'i atnesin Uisneno ka?

²³“Ale sa' nabe'i hit mo'e.” Namneo, mes ale sa' le hit mo'e nane, ka neik fa alekot oke. “Ale sa' nabe'i hit mo'e.” Namneo, mes ale sa' nane, ka neik fa lasi fena neu kit oke.

²⁴Kais atoni mes-mese naim alekot neu in aon. Mes so atoni mes-mese naim alekot neu in aon bian.

²⁵Ale sisi le nasosa anbi masa, leko hi miah, ka nok fa tenab ai mafena anbi hi nekam.

²⁶Fun antui nani anbi Sulat Knino nak, “Pah pinan nok in nesan ok-oke, Uisneno Ini kun.”

²⁷Kalu atoni ka apalsait mese anhoen ko he muah, ma hom simo han honet nane, sa' le nabalab anbi mei, ho muah. Kais mutenab mafena anbi ho nekam.

²⁸Mes kalu es na'uab neu ko nak, “Mnahat nane mnah fuat!” Kais ho muah mnahat nane, fun natuin in le na'uab neu ko ma natuin tenab mafena anbi in nekan.

²⁹Au u'uab onane, ka natuin fa tenab mafena anbi ho nekam, mes natuin tenab mafena anbi atoni nane nekan. Oni atoni bian nak, “Nansa' ka atoni bian in tenab mafena hen eka au lomi ka?

³⁰Kalu au utulu nekak neu sa' le au uah nane, nansa' ka atoni bian in natenab amle'ut neu kau natuin mnahat le au utulu nekak neune ka?”

³¹Au utae ak, “Leka ho muah ai leka ho minu, ai leka ho mo'e ale sa', so ho mo'e mani he muliatas Uisneno.”

³²Kais him fani lasi aktulis neu atoni bian, he atoni Yahudi ka ai atoni Yunani ka ai Uisneno In tolas knino.

³³Onle au amsa, au uminab atoni amfaut sin nekan anbi ale lasi. Mes ka natuin fa au alekot mes natuin atoni amfaut sin alekot, he nati' sin napeni honis.