Read Uab Meto 1 Korintus 3 Bible Online

1 Korintus 3 - Uab Meto bible

1 Korintus 3

¹Ma au amsa bae benu alki! Afi au ka u'uab ok ki fa on atoni le anmu'i Smanan Knino. Mes au u'uab ok ki on atoni le anmoni anbi nekaf pah pinan, le fe ka nanae fa anbi Neno Anan.

²Es nane te au uinut ki susu ma ka fe ki fa maka fun hi fe ka mibe'if hem simo mani. Ma tomas i amsa hi fe ka mibe'i fa hem simo mani.

³Fun hi fe moni anbi nekaf mansian. Leka hi fe manek nanan ma matoe es nok es, lasi nane ansaksi nak hi fe moni anbi nekaf pah pinan.

⁴Fun leka es na'uab nak, “Au hake ok Nai Paulus,” ma bian na'uab nak, “Au haek ok Nai Apolos,” lasi nane ansaksi nak hi fe moni anbi nekaf pah pinan.

⁵Nai Apolos nane sekau? Nai Paulus nane sekau? Hai al amnek lasi Uisneno le minoina ki he nati' hi nekam nateb neu In. Hai al minaoba mepu le In anfe nani neu kai.

⁶Au sen ma Nai Apolos anponi ai anpofi, mes Uisneno es namonib.

⁷Es nane te lasi abainesit ka es fa asenat ai aponit, mes so Uisneno le In es namonib kun.

⁸Asenat ma aponit sin papmese; ma of sin es-es ansimo baen natuin sin mepu kun.

⁹Fun hai on atoni ameup mibua mok Uisneno; ma hi onle lele Uisneno. Hi onle ume le nafena neu Uisneno amsa.

¹⁰Natuin Uisneno In manekan, le anfe nani neu kau, au on atoni ahinet anbi lasi fena, au ubela ume nane in sukin, ma atoni bian nafena anbi sukit nane. Atoni mes-mese so anpanat, in he nahakeb ai nafena anbin onme.

¹¹Fun katitaf atoni mese la nabe'i he nabela sukit bian, na'ko sukit le Uisneno nabela nani, esle' Yesus Neno Anan kun.

¹²Atoni le nahakeb anbi sukit nane neki mnatu ka, noin muti ka, fatu ma'upa ka, hau ka, hu meto ka ai aen ta'u.

¹³Es-es in mepu of nalilon anbi neno hit Usif nanoebon anfain nem. Fun ai anmo'e es-es in mepu nalilon. Ai of nalilon ma ansu' sin mepu nane.

¹⁴Kalu sin mepu le nafena nane kan putuf ma anhake nabala, of sin napeni baen.

¹⁵Mes kalu in mepu anput, of in anluki, in of anmoni mes onle atoni le anfin na'ko ai.

¹⁶Ati hi ka mihin fa nak Uisneno In ume knino es hi ma Uisneno In Smanan Knino natua anbi ki?

¹⁷Leka anmu'i atoni le nale'un Uisneno In ume, Uisneno of nale'un in. Fun Uisneno In ume nane knino kun ma Uisneno In ume esle' hi.

¹⁸Kais anmu'i atoni le naloeb in aon. Kalu anmu'i atoni anbi ki le in nak in ahinet natuin pah pinan i, so in fani amonot fe, he nati' in fani ahinet.

¹⁹Fun lasi ahinet pah pinan i, nane lasi amonot neu Uisneno. Fun antui nani anbi Sulat Knino nak, “In heke atoni ahinet anbi in lasi ak'elo.”

²⁰Ma antui nani anbi Sulat Knino nak, “In hek atoni ahinet sin nek tenab nane son-sona kun.”

²¹Es nane te kais anmu'i atoni pah pinan le naliabon, fun ale sa' nane anfe nani neu ki;

²²he Nai Paulus, Nai Apolos, Nai Kefas, pah pinan, lasi amonit, lasi maten, batan i ai batan amnemat. Ale sa' nane ok-oke hi ini kim.

²³Mes hi, Neno Anan Ini ki ma Neno Anan nane Uisneno Ini.