Read Uab Meto 1 Korintus 4 Bible Online

1 Korintus 4 - Uab Meto bible

1 Korintus 4

¹Onane te so him kius kai on Neno Anan In ate le nana'at neu kai Uisneno In mepu tolo' le es fe ka nahinef.

²Of namuni te antoti na'ko amnek lasi sin, nak sin nalilok on atoni alekot.

³Neu au, nane au ak lasi ana', hi e hem lef au lasi ai mansian es hen lef au lasi. Ma au amsa ka ufekaf au lasi.

⁴Fun namneo au ka uhin fa sa', mes ka namneob kau fa natuin lasi nane. In kun es anlef au lasi esle' hit Uisneno.

⁵Es nane kais him lef es in lasi kalu leku fe kan tiaf. Him pao fe talan te Uisneno nanoebon anfani nem. In of antana ale lasi le natolo' anbi mesokan. Ma In of nalile ale lasi le natenab anbi sin nekan. Bi leku nane atoni mes-mese ansimo aliatas na'ko Uisneno.

⁶Bae benu alki! Fun natuin hi, au u'uab lasi i antom neu kau ma neu Nai Apolos. Au u'uab onane he nati' hi minoina lasi le nak, “Kais him lefi atoni in lasi nesi na'ko le antui nalali.” Onane te kan mu'if atoni mese anbi ki he naliabon ma anpules atoni bian ma nabaun atoni bian.

⁷Fun sekau es nak, hom nesin atoni bian ka? Ma sa' le hi mu'i, le hi kam simo fa na'ko Uisneno? Ma kalu him simo te, nansa' es hi miliabom onle hi kam simo fa ka?

⁸Him pet ma mimsen milalien, him fani atoni amu'it, him sae kesel. Mes hai kahaf. Alekot mese kalu namneo onane, nak him sae kesel he nati' hai amsa amsae kesel mok ki.

⁹Fun natuin au nek tenab, Uisneno anfe neu kai, haef knino bale le ka makana onle atoni le napeni le'at neu maten ma haim fani lasi bae neu pah pinan, neu ahake neno tunan ma neu mansian.

¹⁰Haim fani amonot natuin Neno Anan, mes him fani ahinet natuin Neno Anan. Haim fani alima'et, mes him fani abe'it. Him fani atoni makana, mes hai olof kai.

¹¹Talan te leku i, hai mimnah ma meno, hai ka mu'if tainusat, hai mipeni bisot ai tepos ma hai ka mu'if bale he mimaika.

¹²Hai meup kim meki hai nimam he mipeni mnahat. Kalu na'akan kai, haim tek alekot neu sin. Kalu anhamu'i kai, haim seusaban sin.

¹³Kalu sin tek nale'un hai kanam, haim simo nok nek alekot. Haim fain onle knuntu ai malafu pah pinan i; talan te leku i hai onle malafu na'ko ale sa'.

¹⁴Au tui lasi i ka natuin fa he umaeb ki, mes he fainek ki onle au anhenu ki.

¹⁵Fun maski hi mu'i anoni nifun bo'es anbi Neno Anan, mes kan mu'if le anfani amaf. Al au es anfain amaf neu ki anbi Neno Anan, natuin beno knino le au etun neu ki.

¹⁶Es nane te au fainek ki, he nati' him kiso heta anbi kau!

¹⁷Natuin lasi nane au sonu ki Nai Timotius onle au anah le au nek ani ma na'ki anbi hit Usif, In of namnauba ki neu au monik anbi Neno Anan Yesus, onle au unoina neu ale tolas knino anbi me-me.

¹⁸Mes anmu'i atoni fauk anbi ki le namoko'ok fun sin natenabnak of au ka eti tenif eu ki.

¹⁹Mes kalu Usif anlomi, of au et laba eu ki. Of au uhin, ka al fa atoni amoko nane sin uab, mes sin matani amsa.

²⁰Fun Plenat Uisneno nane ka al fa na'ko uab mes na'ko kuasat ma matani.

²¹Neu, him loim sa' ka? Au et eu ki eki fainekat matani on ue, ai eki lasi manekat ma nek aklati ka?