Read Uab Meto 2 KORINTUS 11 Bible Online

2 KORINTUS 11 - Uab Meto bible

2 KORINTUS 11

¹So leko him lomi, au mono kle'o! Him lomi onane ka?

²Au lomi ki onle Uisneno anlomi ki. Fun au mafutub ulali ki neu atoni mese he ok ki on bife ao temef le knino neu Neno Anan.

³Mes au umtau, kalu hi nekam na'oni oke te hi ka mi'ki amtenif meu Neno Anan. Papmese on afi kauna anfui. Bi Hawa neki in manoen.

⁴Fun him ta'ah kim kalu anmu'i atoni le an etun ki Yesus teta na'ko le haim etun ki. Ai anfe ki smanaf teta na'ko le him simo milali ai Beno Alekot teta na'ko le him simo milali.

⁵Mes natuin au nek tenab, au ka labu fa kle'o u'ko haef makana bian sin.

⁶Oni au atoni amonot kau bi uab, mes anbi lasi hine neu Uisneno, au ka atoni amonot kau fa. Fun hai milile milali neu ki anbi ale leku ma anbi ale lasi.

⁷Ai au usanab neu ki ka? Fun au ubaun au aok he nati' nalatan ki, ma au etun Uisneno In Beno Alekot neu ki ka nok fa baen mes lum-luman kun.

⁸Leka au tuthae ki, tolas knino bian sin es anbaen kau. Au ulukib sin he nati' sin bab ki.

⁹Leka au nukan sa'anbi ki, au ka ususab fa atoni mese. Fun sa' le au nukan nane, bae knino sin abit Makedonia sin natis nani neu kau. Au panat au aok anbi ale lasi, he nati' kais anfani sutais neu ki. Ma of au mo'e onane piut.

¹⁰Nok Neno Anan In amneot anbi kau, au ak ki, katit fa atoni mese anbi pah Akhaya hen ek au nek liaba nane.

¹¹Nansa au u'uab onane ka? Ai natuin au ka nek ki fa ka? Uisneno es nahin lasi nane.

¹²Lasi le au mo'e, of au mo'e piut he nati' haef knino bian sin ka napeni manuan he naliabok ma sin nak, sin mepu papmese onle hai mepu.

¹³Fun atoni onane sin haef knino apoiba. Sin ameput le nalosib atoni ma anmo'e sok on Neno Anan In haef knino.

¹⁴Kais hi mimkak neu lasi nane, fun Nitu amsa namasbon on ahake meusine!

¹⁵Es nane te ka lasi amkakat fa, leka in ameput sin anmo'e sok on ameput le anmo'e Uisneno lomin. Of namuni te sin napeni sin mo'et nane in seunbanit.

¹⁶Au u'uab a'teni ak, so es kais ankius kau on amonot. Ma kalu hi mitenab onane, so him simo kau on atoni amonot, he nati' au uliabok kle'o.

¹⁷Sa' le he au u'uab, au ka u'uab ani fa on atoni le na'uab natuin Uisneno In a'an. Mes au u'uab ani on atoni amonot le nateb, nak in mes naliabon.

¹⁸Fun anmui atoni namfau le naliabok natuin nekaf pah pinan, es nane au lomi he uliabok amsa.

¹⁹Him lomi hem simo atoni amonot fun hi atoni ahinet ki.

²⁰Fun him lomi, leka atoni na'aet ki, leka atoni nah mate hi sa', leka atoni naplenat ki, leka atoni namokon neu ki, leka atoni anpas ki.

²¹Au nek mae kuk, fun haim limae neu he mo'e lasi onane. Mes kalu atoni bian nabe'i naliabok — au amsa ube'i uliabok — au u'uab on atoni amonot!

²²Sin atoni Ibrani ka? Au amsa atoni Ibrani kau! Sin atoni Israel ka? Au amsa atoni Israel kau! Nai Abraham in sufan esle' sin ka? Au amsa Nai Abraham in sufan kau!

²³Neno Anan In atuthaes sin ka? — au u'uab on atoni amaunu — au amsa tuthae nesin sin! Au hae nesin sin, natam kau anbi o'of nesin sin, anbiso kau nesin sin ma ala kle'o te au he mate.

²⁴Atoni Yahudi sin anhamu'i kau hae nim, ma antepo kau papa bo'tenum sio.

²⁵Anbius kau hae tenu, anpoil kau neki fatu hae mese. Au lem ok bnao hae tenu, au utboe bi oe tasi neno teme mese ma fai teme mese.

²⁶Anbi au lanan le he unaoba mepu, au sutai susal namfaun, noe sako, atoni asikat, koke na'ko atoni Yahudi, koke na'ko atoni le kan tamaf nonot Yahudi. Au upeni susal anbi kot, susal anbi mnela paha snaen, susal anbi tasi atnanan, susal na'ko au bae sin le napoibok nak sin atoni Slani.

²⁷Au uhaebok naek ma mepu mafena; fe fe'at au ka tupaf, au ka uah ma ka inuf, fe fe'at au unahok, manikin ma kan mu'if tainusat.

²⁸Au ka teka tenif lasi bian; fun neno-neno au he ubiku ma tuthae Tolas Knino.

²⁹Leka anmu'i atoni le anlima'e, au amsa lima'e ok sin? Leka sin anmu'i atoni le anmofu anbi sanat au nekak naklati?

³⁰Leka au uliabok, of au uliabok anbi au lima'et.

³¹Au ka upoibok fa. Uisneno, le hit Usif Yesus In Amaf anfani saksi neu kau. So atpules In kanan talan te nabal-bal.

³²Leka au bi Damsyik Kesel Aretas in kumlol naplenat atoni sin hen pao kot Damsyik hen heke kau.

³³Mes sin natam kau neu kola ma nasanut kau natuin baik lape in fafon. Onane te au ufetnok u'ko sin.