Read Uab Meto 2 KORINTUS 12 Bible Online

2 KORINTUS 12 - Uab Meto bible

2 KORINTUS 12

¹Au he uliabok, maski lasi nane ka ma'upa fa, mes au he etun ki mnitas le au simo na'ko hit Uisneno.

²Au uhin neu atoni Slani mese, afi ton bo'es am ha afinit — he aon ta'un ai he smanan ka, au ka uhinef, Uisneno es nahine — na'aiti atoni nane neu neno tunan in kuni ai peni tenu.

³Au amsa uhin atoni nane, — he aon ta'un ka ai he smanan ka, au ka uhinef, Uisneno es nahine —

⁴nait atoni nane neu Firdaus ma in nen uab le ka mateka fa, le mansian ka nabe'i hen tek nani.

⁵Au he uliabok neu atoni nane, mes au ka uliabok fa neu au aok, so al neu lasi lima'et sin.

⁶Fun kalu au he uliabok amsa, au ka atoni amonot kau fa, fun au u'uab lasi amneot. Mes au utau au aok, he nati' kais anmu'i atoni le natenab neu kau nesin le sin nit anbi kau ai le sin nen na'ko kau.

⁷Mes he nati' kais au umok'ok natuin ale mnitas matani nane, antao kau kasunat mese ai menas mese anbi au aok. Menas nane na'ko santuaf hen tufu kau he nati' kais au umok'ok.

⁸Au onen toti hae tenu neu Uisneno antom santuaf nane, he nati' naskot ai na'lo na'ko kau.

⁹Mes Uisneno natae neu kau nak, “Au halinat neu ko, noba nai, fun au matanik natision anbi ho lima'et.” Es nane te au lomi he uliabok natuin au lima'et, he nati' Neno Anan In matanin namafo ai nahafo kau.

¹⁰Natuin lasi nane au malin ma au lomi he bi lima'et. Au lomi he na'akan kau, anhamu'i kau, anli'u kau ma nasusab kau natuin Neno Anan. Fun leka au lima'e te au upeni matani.

¹¹Namneo au fani amonot, mes hi miseke kau. So hi mes ampules kau. Fun maski au olof kau, mes anbi ale lasi au ka ubaunok fa u'ko ale haef knino makana nane sin.

¹²Ale lasi taka ma lasi amkakat ma ale kuasat ma mautnai au mo'e ulali anbi ki nok nek amnalan he nati' hi mihin, mak au haef knino kau.

¹³Au ka kiso ki fa anbi lasi sa' ka, kalu tanesa nok tolas knino bian ka? So al anbi lasi i: Nak au ka ususab ki fa he nati' him baen kau. Au toti kaisa himipan tenab ka amneot nane!

¹⁴Kiso au uloitan ulali hae tenu he eti eu ki. Mes au ka lomif he ususab ki, fun au ka amif hi mu'im mes au aim ki. Fun li'ana ana ka nami fa maus neu amaf ainaf, so amaf ainaf es nami maus neu sin anhenu.

¹⁵Es nane te au lomi he una'at au maus, ma neis na'ko nane au lomi he una'at au aok natuin hi monim. Kalu au nek ki, nansa hi kam nek kau fa ka?

¹⁶Neu, au ka lomif he ususab ki, mes — hi mak — au amkesit kau es au hel ki eki fulit.

¹⁷Ai au upeni osaf sa' natuin atoni le au sonu neu ki ka?

¹⁸Au toit Nai Titus he neti neu ki ma au sonu bae knino bian he nok Nai Titus. Ai Nai Titus ansimo osaf sa' na'ko ki ka? Fun hai nua kai mepu nekaf mese ma hai mo'e natuin lekat mese.

¹⁹Hi mitenab lalo, ma hai mimneobom ambi hi matam. Hai mi'uab ambi Uisneno In human ma nok Neno Anan In kanan, mak, hai mo'e ale lasi nane bae benu manekat, hem hatani hi nek ateb knino.

²⁰Au umtau leka au eti, au upeni ki kan tomaf au lomik ma hi mipeni kau kan tomaf hi lomim. Au umtau kais-kais anmu'i matoes, manek nanan, lasi to'as, es-es nami kun alekot neu in aon, lasi ma'akan, lasi botu ai uab tutab, lasi mo'ko ma lasi taisibu.

²¹Au umtau, leka au eti teni, au Uisneno of nabaun kau anbi hi matam. Ma of au nekak ansusal neu atoni namfau le afi anmo'en sanat ma sin ka nateunok fa na'ko sin mo'et amle'ut, sin mo'et amolemut ma sin mo'et amneot.