Read Uab Meto 2 KORINTUS 3 Bible Online

2 KORINTUS 3 - Uab Meto bible

2 KORINTUS 3

¹Ati hai hem pules amteni hai aom ka? Ai on atoni bian he nalile sulat pules neu ki ai napeni sulat pules na'ko ki ka?

²Hai sulat pules es hi, le haim tui mani anbi hai nekam, fun ale atoni nahin nani ma ansoi nani.

³Fun sin nit nalali, nak hi on sulat le Neno Anan antui nani natuin hai mepu. Sulat nane kan tui nani fa neki oe metan, mes antui nani neki Uisneno In Smanan Knino amonit. Ma kan tui nani fa anbi fatu bena, mes antui nani anbi mansian in nekan.

⁴Hai mifnek onane neu Uisneno natuin Neno Anan.

⁵Kan mu'if lasi sa' anbi hai aom, he nati' haim tam ota neu mepu i, mes Uisneno es anfe be'it neu ki.

⁶In es anfe kai be'it he nati' haim fani ameput neu fefbela fe'u; fefbela le na'ponion neu Smanan Uisneno, ka neu fa plenat le matui nane. Fun plenat le matui nane namate, mes Smanan Uisneno nane namonib.

⁷Bi leku fef bela le namate nane anmo'e ma anmalak neu fatu, apinat Uisneno antana nok matane. In pinan matane talan te uf Israel ka nabe'i fa hen kiso Nai Musa human, maski pina le anbi Nai Musa human namsab anbi leku nane. Nah, amo'e fef bela le namate nane nalil'on nok pinan a'naek,

⁸lof amo'e fef bela le Smanan Uisneno anfe nani, nalil'on nok pinan le nesi anteni.

⁹Kalu amo'e fef bela le nasanab mansian nane anpin onane, lof amo'e fef bela le naleko nafani mansian nok Uisneno in pinan nesi anteni.

¹⁰Sa' le afi hit tak anpin, kan pinan tenif fun apinat muni i.

¹¹Kalu sa' esle' nalan al leku tuk es, anpin onane, lof sa' esle' nabal-bal lof anpin nesi anten.

¹²Natuin hai mui lasi afnekat onane, hai mi'uab nok nek amaspeti,

¹³ka on fa Nai Musa le ankub in human he nati' to Israel kais ankiso nit Uisneno. In apinat le he namneku anbi in human.

¹⁴Mes sin nekan nane an ek nabubu. Ma tal neno i sin nekan fe an ek nabubu neki kubat nane leka sin ansoi Sulat Knino unu. Al Neno Anan es nabe'i hen fei kubat nane.

¹⁵Ma tal neno i amsa, kalu sin ansoi Nai Musa in sulat, kubat nane fe ankub sin nekan.

¹⁶Mes leka es nali'on anfani nem neu hit Usif, of nait kubat nane na'ko in human.

¹⁷Fun hit Usi, lo Smanan Knino; ma leka Uisneno Ini Smanan Knino anbi me te lasi ao sona anbi nane amsa.

¹⁸Ma muni i hit kat kubaf hit humak, mes hit onle nino le tamasab Usif Yesus In apinat. Ma onane te In nabaina hit humak on In human; ma hit fani apinat natuin lasi apinat le na'ko Smanan Knino, hit Usi.