Read Uab Meto 2 KORINTUS 9 Bible Online

2 KORINTUS 9 - Uab Meto bible

2 KORINTUS 9

¹Nok amneot au ka tui tenif neu ki antom tuntakus le him sonu neu to Uisneno anbi Yudea.

²Au uhin ulali ki, nak him lomi hem tuntaku, ma au uliaba ulail ki neu ale atoni abit Makedonia. Au u'uab neu sin ak, “Bae knino sin abit Akhaya, sin naloitan nalali na'ko ton afinit.” Ma hi makoet nane anfani lasi heta neu atoni namfaun.

³Au sonu bae knino sin he nati' lasi le hai miliabom neu ki kais luman ai son-sona kun. Mes so namneo-namneo hi miloitan milali onle au umolok ulali neu ki.

⁴Au umtau kal-kalu anmu'i atoni Makedonia le anlomi he nok kau leka au eti eu ki. Ma kalu sin napeni ki, hi fe ka miloitan fa, of hai mae, fun hai mi'uab milali neu sin mak, hai mifnekan naek neu ki. Ma hi al-alki of am mae samsa.

⁵Es nane au lomi he nati' bae knino sin neti nahunun kau he naloitan sa' le him ba'an milali. Onane te of nalilon nak hi tulu nane him fe mani nok nek amlilat ma amnaut ma ka natuin fa seke.

⁶Mimnau lek-leko lasi i: Atoni le ankifu an-ana of nonu te an-ana amsa ma atoni le ankifu naek of nonu te naek amsa.

⁷So es-es anfe natuin in nek lomin. Kais nok nek a'unu ai natuin seke, fun Uisneno In nek atoni le anfe nok nek amlilat.

⁸Ma Uisneno anmui kuasat hen fe ki tetus nok athoes, he nati' hi mimno'u anbi ale sa'. Oke te hi mo'e lasi alekot nesin teni.

⁹Fun antui nani anbi Sulat Knino nak, “In ankifu nalali, In anfe neu atoni amamu'it, In alekot nabala talan te nabal-bal.”

¹⁰Uisneno es naloitan fini neu asenat, ma mnahat neu kit. In amsa of naloitan fini neu ki ma of ansato sa' le him sen ma namonib lasi amneot anbi hi nekam.

¹¹Onane te of namu'ib ki anbi mo'et manekat huma-huma oke te hi mitulu nekam neu Uisneno natuin hai.

¹²Fun tuthaes manekat le hi mo'e nane, ka al fa he mino'u to knino sin nukat, mes of anmo'e atoni amfatu he natulu nekan neu Uisneno.

¹³Ma natuin hi tuthaes manekat nane nalilon, sin naliatas Uisneno natuin sin nit hi lasi aki'at neu Neno Anan In Beno Alekot. Ma natuin hi nek amnaut him bati ale sa' neu sin ma neu atoni bian amsa.

¹⁴Of sin onen toti neu ki natuin sin nek ki, fun Uisneno In nek mamun nathoe neu ki.

¹⁵So hit tatulu nekak neu Uisneno fun In manekan nae le'uf kun!