Read Uab Meto EFESUS 6 Bible Online

EFESUS 6 - Uab Meto bible

EFESUS 6

¹Hoi anah-anah, hi mitnin neu hi ama ma hi aina anbi Neno Anan, natuin lasi mes onane.

²Hi miusi hi ama ma hi aina - nane plenat matani na'ko Uisneno, onle anba'an nani nak,

³he nati' hi mipeni ua alekot ma ua mnanu anbi pah pinan.

⁴Ma neu hi amaf-amaf, kaisa hi mi'koke hi anhenu neu lasi to'as, mes minoina sin mek Uisneno In lasi noina ma In fainekat.

⁵Hoi ale ate, hi mitnin hi tuan nok amtaus ma lilitais ma nek muti onle hi mitnin Neno Anan.

⁶Kais al anbi sin matan neu he miminab sin nekan. Mes on Neno Anan In ate ki, hi mitnin Uisneno In lomin meki hi nekam oke.

⁷Hi minaoba hi tuthaes onle atoni le antuthae Usif tunan ma kan tuthae fa atoni pah pinan.

⁸Hi mihin, nak ale atoni, he ate ka, ai he ao sona ka, kalu in anmo'e lasi alekot, in of ansimo seunbanit na'ko Usif tunan.

⁹Mes neu hi tuan-tuan, hi mo'e onane amsa neu hi ate sin. Kais him sali sin meki salit amle'ut. Mimnau nak hi ma hi ate sin, anmu'i Usif mese, esle Usif tunan abit neno tunan. In kan betif humaf.

¹⁰So him fani atoni abe'it meki matani le hi mipeni na'ko Usif tunan In kuasat.

¹¹Him pake bale manuat le Uisneno anfe ki he nati' him be'u Nitu in lisan apenut.

¹²Hit kat mabe'u fa tok atoni pah pinan, mes hit mabe'u tok santuaf ini plenat ma in kuasat ma ana' plenat mesokan. Ma hit mabe'u tok ale smanan nitu abit neno tnanan ai le natonon anbi batan i.

¹³Es nane te hi maiti bale manuat Uisneno, he nati' hi mabe'u ambi neno amle'ut nane. Oke te him hake mibala, leka hi misopu lasi mabe'ut nane.

¹⁴Onane te him hake nai! Hi mi'futu hi tnanam meki lasi amneot, him tainus sobalu besi lasi amneot.

¹⁵Hi mipenhae meki nek lomif hem etun Beno Alekot ma halan nekaf.

¹⁶Ambi ale lasi i hi maiti ben besi tika nek ateb knino. Fun hi meki nek ateb knino nane hem fu mimate ale santuaf sin asanef aklahat.

¹⁷Ma amsimo lasi honis on soeb besi ma a'an Uisneno on suni Smanan Knino.

¹⁸Hi mo'e ale lasi nane anbi onen totis ma amtoti tuntakus na'ko Uisneno. Him onen toti bi ale leku ambi Smanan Knino ma ambe' nai ambi hi onen totis nane. Him onen toti piut ma mitnat ale to Uisneno.

¹⁹Him onen toti neu kau amsa he nati' bi leku le au umolok, Uisneno anfe kau a'at amneot. Ma he nati' au etun Beno Alekot in lasi tolo' ka nok fa amtaus.

²⁰Natuin Beno Alekot nane, au fani haef le tomas i anbi o'of. Him onen toti he nati' au umolok antom Beno Alekot nane ka nok fa amtaus, onle au mes he umolok.

²¹Nai Tikhikus, hit bae manekat ma atuthaes aki'at anbi Usif tunan In mepu, of an etun ki ale lasi antom neu kau ma au mepu.

²²Es nane au sonu in neti neu ki, he nati' hi mihin ale lasi le antom neu kai ma he nati' in halin hi nekam.

²³Halan nekaf ma manekat nok nek ateb knino na'ko Uisneno, Amaf ma na'ko Usif Yesus Neno Anan neu ki alki.

²⁴So Uisneno anfe tetus neu ki alki le him nek hit Usif Yesus Neno Anan meki lasi manekat le ka namle'u nitaf. Na'ko hai nua kai, Nai Paulus