Read Uab Meto 1 TESALONIKA 2 Bible Online

1 TESALONIKA 2 - Uab Meto bible

1 TESALONIKA 2

¹Bae benu alki! Hi mihin kim le hai aim neu ki anbi i ka luman fa.

²Hi mihin nak afi hai fe ka aim neu ki fa anbi Tesalonika sin hamu'i ma nakle'at kai anbi Filipi. Mes maski antoni namfau anlaban kai, hit Uisneno anfe kai maspeti hem etun ki Beno Alekot le na'ko Uisneno.

³Fun hai fainekat nane ka natuin fulit ai ka natuin fa tenab amle'ut ma ka nok fa lasi losib amsa.

⁴Mes Uisneno ankius kai on atam ota ma In nana'at Beno Alekot nane neu kai. Es nane hai mimolok, ka natuin fa he miminab atoni pah pinan sin nekan; mes he miminab Uisneno In nekan. Fun Uisneno In es ansu' hai nekam.

⁵Hi mihin kim nak hai ka mimolok fa mek fefmina ai uab losib he mitolo' salit-salit apalu' ai akomat. Uisneno ansaksi lasi nane!

⁶Hai amsa ka mami fa pules na'ko atoni pah pinan — he na'ko hi ai na'ko atoni bian. On Neno Anan haef hai mibe'i hem toit sa' na'ko ki.

⁷Mes hai mo'e anbi hi atnanam onle ainaf mese le anfaf ma ampaloli in anah.

⁸Onane amsa natuin haim nek ki' haim lomi hem fe ki ka al fa Beno Alekot na'ko Uisneno mes hai monim amsa, fun haim nek ki.

⁹Fun hi fe mimnau mit, bae benu alki, hai haet ma hai puse neu ki. Hai mepu fai manas, he nati' kaisa anfani baut mafena neu sekau amsa le anbi ki, leka haim etun Uisneno In Beno Alekot neu ki.

¹⁰Him fain saksi neu kai, onane amsa Uisneno. Fun hai monim knino ma amneot ma ka nok fa akbunef sa' neu ki alki, le him palsai neu Neno Anan.

¹¹Hi mihin, nak hai mo'e neu ki mes-mese on amaf mese le anmo'e neu in anhenu.

¹²Haim fainek ki, haim toti nok matani neu ki he nati' hi moni onane talan te anhalin Uisneno nekan. Fun Uisneno anboin nalali ki he mipeni pa' anbi Pah Pinan Fe'u Uisneno ma anbi In apinat.

¹³Anmu'i anteni lasi mese bian le anmo'e kai he mitulu nekam neu Uisneno. Esle', bi leku hai mitiaba beno na'ko Uisneno neu ki, him simo beno nane ka on fa beno na'ko mansian, mes on beno na'ko Uisneno. Ma tebes nane beno na'ko Uisneno! Uisneno anmepu anbi ki le anpalsai neu Neno Anan.

¹⁴Bae benu alki, lasi le him naben milali, Tolas Knino Uisneno abit Yudea le anfani Neno Anan Yesus ini sin amsa'a naben nani. Him naben hamu'it na'ko hi uf, onle Tolas Knino Uisneno abit Yudea sin naben nani na'ko atoni Yahudi sin.

¹⁵Atoni Yahudi sin namate nalali Usif Yesus ma ale mafefa knino sin ma anhamu'i kai. Sin laban Uisneno piut ma anfani musu neu ale atoni ok-oke!

¹⁶Sin nakain kai he nati' kais haim etun Beno Alekot neu ale uf kan tamaf nonot Yahudi, le he neki amonit neu sin. Onane te atoni Yahudi ansato sin sanat piut tal nehenu anfin. Ma leku i to'as Uisneno anbol neu sin ka natfek.

¹⁷Mes bae benu alki, hai mibaitsom mok ki leku tuk es bi — hai matam, mes hai nekam kahaf — haim lomi he mi'eku amteni mok ki.

¹⁸Haim lomi he met neu ki — ma au, Nai Paulus, he et eu ki neis na'ko hae mese — , mes Nitu nakain kai.

¹⁹Namneo hai afnekat ma amlilat es hi. Bi leku Yesus, hit Usif, nanoebon nem ma hit athake atbi In matan, of him fain amlilat neu kai.

²⁰Namneo, hai apinat ma hai amlilat esle' hi.