Read Uab Meto 1 TESALONIKA 3 Bible Online

1 TESALONIKA 3 - Uab Meto bible

1 TESALONIKA 3

¹Hai kam un man fa hai lasi malinat. Es nane hai mifek he mimaika'a mes-mes anbi Atena.

²Oke te haim sonu Nai Timotius, hit bae le anmeup nok kai neu Uisneno bi etus Neno Anan In Beno Alekot. Haim sonu in he nati' anhatani ki ma anfainek ki he hi palsait ansato anteni neu Neno Anan.

³Ma kaisa anmu'i es anbi ki le in nek ateb knino nabeko, natuin hamu'it i. Fun hi mihin, nak ale hamu'it i natam nalali neu lekat Uisneno neu kit.

⁴Fun afi hai fe mok ki, haim eut main ki, mak of hit tapeni hamu'it. Ma lasi nane onle hi mihin, anbol nalalien.

⁵Natuin lasi nane, au sonu Nai Timotius neit neu ki, he au uhin neu hi nek ateb knino. Fun au umtau kal-kalu santuaf ansu' ki, oke te hai haet nane luman.

⁶Mes leku i, Nai Timotius anfani nemen na'ko ki ma neki beno le anhalin kai neu on me hi nek palsait neu Neno Anan ma hi lasi manekat. In eut kai nak hi mimnau kai piut anbi hi nekam. Ma him lomi he mi'eku mok kai, onle hai amsa amlomi he mi'eku mok ki.

⁷Es nane, bae benu alki, anbi ale hai sutais ma hai susal. Hi palsait neu Neno Anan namepan hai nekam hai malin natuin hi nek ateb knino.

⁸Tomas i, hai nekam anmoni anfan, lamu him hake mi'ki mimesbom mok Usif.

⁹Es nane hai mitulu hai nekam neu Uisneno natuin lasi malinat le hai mipeni anbi Uisneno In human natuin hi.

¹⁰Fai manas haim onen toti piut, he nati' hit ta'eku humaf nok humaf; ma amsato ki lasi sa' le him labu mani anbi hi nek ateb knino.

¹¹So Uisneno hit Ama ma Yesus hit Usif, nasoitan lanan neu kai he mi'‘eku mok ki.

¹²Ma so hit Usif ansato ki ma namu'ib ki he nati' hi manek es nok es ma amnek ale atoni, onle hai amsa amnek ki.

¹³So In hatani hi nekam, he nati' knino ki ma ka kobe ki fa anbi Uisneno hit Ama In matan, leka Yesus hit Usif, nanoebon nem nok ale atoni le anfani In ini.