Read Uab Meto YOSUA 1 Bible Online

YOSUA 1 - Uab Meto bible

YOSUA 1

¹Leka Nai Musa, UISNENO In ate nane anmate nalali, UISNENO nakua a'an neu Nai Musa in atuntakus, es Nai Yosua Nai Nun anmone.

²UISNENO nakua a'an nak, “Au ate Nai Musa anmate nalalilen. Es nane te tabu le i leko ho ma to Israel ok-oke hi miloitan ma mibalab nai hem lak Noe Yordan, ma amtam meu pah le Au fe ani neu sin.

³Au uton ulali neu Nai Musa nak ale pah le hi haem anteli of Au fe ani neu ki, nau Nai Yosua ma neu Au to ok-oke.

⁴Hi pah of naufon na'ko mnela snaen bian a'ne'u talantia Tubu Libanon neno kabenan a'li ma na'ko Noe Efrat anaek nane neno saen talantia pah uf Het ma talantia Tasi Tnana neno tesan.

⁵Katit fa es amsa le nabe'i he nis ma anbe'u ko, Yosua, anbi neno fe ho moni. Natuin Au of ok ko piut on afi Au ok Nai Musa. Au of ka usaitan ko fa.

⁶So nati' ho muteb ma amhataniom nai, natuin ho of amna' ma amtopu nonot i anbi tabu sin antoko ma natua pah le Au ba'an ani neu sin amaf sin.

⁷Al, so nati' ho muteb namneo-namneo ma amhataniom nai. Ho mes ampanat he nati' ho mutuin ale plenat le Nai Musa Au ate nane anfe nani neu ko, kais hom polin Au plenat sin, fun onane te of ho mis ma ambe'u.

⁸Au sulat plenat nane mes hom so'i piut-piut neu Au to. Ho munoina mulek-leko sulat nane fai nok ma manas nok, he nati' ho mo'e mutuin piut-piut ale plenat le matui anbi nane. Leka ho mo'e mutuin ale nane ok-oke, ho monim of naleko ma of ho mis ma ambe'u.

⁹Mumnau nai, natuin Au lenu ulali ko he nati' namneo-namneo ho muteb ma amhatiniom! Kaisa ho mumtau ai hom ole, natuin Au UISNENO Au ok ko ho hem nao meu me amsa.”

¹⁰Oke te Nai Yosua anfe plenat neu ale anakaf Israel

¹¹he nati' sin anfun natef ale ume-ume to Israel ma anfe plenat i, “Miloitan bukae nai, natuin neno tenu anteni hi mes amlak Noe Yordan hem toko mitua pah le UISNENO anfe neu ki.”

¹²Neu uf Nai Ruben, uf Nai Gad, ma aon bian na'ko uf Manasye, Nai Yosua nak,

¹³“Mimnau! Nai Musa UISNENO In ate nane naton nalali neu ki nak pah le anbi Noe Yordan aon bian neno saen i UISNENO anfe nani neu ki hen fani hi pah.

¹⁴Ale hi fenai hi anah ma hi mu'it nabe'i nabala anbi i, mes ale hi meo pa'e sin mes naloitan hen maken ma nahunun atoni Israel bian hen lak Noe Yordan.

¹⁵Hi mes ambab sin talantia sin antoko natua pah anbi Noe Yordan in aon neno tesan i le UISNENO anfe nani neu sin. Leka UISNENO anfe nalali tainine neu nonot Israel ok-oke, oke te nabe'i hi meki amfani meu hi pah anbi Noe Yordan aon neno saen, le Nai Musa UISNENO In ate anfe nani neu ki.”

¹⁶Oke te uf Nai Ruben, Nai Gad ma uf Manasye aon bian sin natae nak, “Sa' le hom lenu kai, of hai mo'e mani, ma hom lenu kai hem nao meu me amsa, of haim nao.

¹⁷Hai of amnen ma mituin ko, on hai amsa amnen ma mituin piut neu Nai Musa. So nati' UISNENO nok ko onle nok Nai Musa!

¹⁸Sekau am sekau le kan lomi fa he nabaunon neu ho kuasat, ai ka natuin fa ho plenat, of namate nani. So nati' ho muteb nai ma amhataniom nai!”