Read Uab Meto YOSUA 10 Bible Online

YOSUA 10 - Uab Meto bible

YOSUA 10

¹Nai Adoni-Zedek, kesel Yerusalem, in nen nak Nai Yosua nasik nan nalali ma nale'un naskuku nani kot Ai ok-oke, ma namate in kesel onle in anmo'e nalali neu Yerikho nok in kesel. In a'nen amsa nak atoni Gibeon anmo'e nalali lasi manba'an halan nekaf nok atoni-atoni Israel ma natua anbi sin atnankenu.

²Yerusalem tuakenu sin namtau ne le'uf, natuin Gibeon nane kot anaek mese; in anaen papmese nok kot-kot le anmu'i kesel, in anaen anesi na'ko Ai. Ma ale in atoni anbine nane amsa atoni-atoni abe'it anbi makenat nanan.

³Es nane te Nai Adoni-Zedek ansonu atoni neu Kesel Hoham anbi Hebron, Kesel Piream anbi Yarmut, Kesel Yafia anbi Lakhis, ma Kesel Debir anbi Eglon, neki lasi i,

⁴“Aim nai ambab kau hit tape' Gibeon, natuin Gibeon tuakenu sin anmo'e nalali lasi manba'an halan nekaf nok Nai Yosua ma atoni Israel.”

⁵Nalali te kesel nim en Amori nane, esle' kesel Yerusalem, Hebron, Yarmut, Lakhis ma Eglon sin nabuan, oke te nok ale sin solalus sin, sin anius nan ma nape' Gibeon.

⁶Atoni-atoni Gibeon sin ansonu hanaf neu Nai Yosua anbi um-ume Gilgal nak, “Kais mufetin kai hai mese, koi Usi! Aum nai lab hem bab kai, natuin solalus na'ko ale kesel Amori anbi pah neten sin nabuabon nem ma anlaban kai!”

⁷Oke te Nai Yosua ma ale in solalus sin ok-oke, ma ale in solalus alekot sin, sin anfen na'ko Gilgal neu hen makenan.

⁸UISNENO nakua a'an neu Nai Yosua nak, “Kais mumtausan sin. Lasi mnisat Au fe ulali neu ko, es nane te katit fa es na'ko sin amsa le nabe'i anhake na'ki neu hen laban ko.”

⁹Anbi fai nane in nanan Nai Yosua nok in solalus sin anao na'ko Gilgal neu Gibeon, oke te sin anlaban atoni-atoni Amori nok askeken.

¹⁰UISNENO anmo'e atoni-atoni Amori sin nekan namneku leka sin ankiso nit solalus Israel. Sin namate atoni Amori namfau anbi Gibeon, ma le fe anmoni anli'u sin ansanu bnapaf tubu Bet-Horon talantia Azeka ma Makeda anbi aon bian a'ne'u.

¹¹Anbi tabu atoni-atoni Amori sin fe ansanu bnapaf tubu nane natuin sin naen na'ko solalus Israel, UISNENO nasanut ul fatu na'ko neno tunan neu sin anbi lanan talantia Azeka. Le amates natuin ul fatu nane amfaun anesi na'ko amates le atoni Israel namate sin.

¹²Anbi neno nane leka UISNENO anfe mnisat neu atoni Israel nis ma anbe'u atoni Amori, Nai Yosua na'uab neu UISNENO. Ma anbi atoni Israel sin human sin matan, Nai Yosua namolok nak, “Hoi manas! Anhake nai anbi Gibeon fafon. Ma ho hoi funan! Kaisa ho mutnani na'ko Nonof Ayalon fafon.”

¹³Es nane te manas anhake ma funan ka natnani fa talantia atoni Israel sin anbe'u nani sin musu-musu sin. Lasi nane matui anbi Sulat Yasar in nanan. Neno teme mese manas nasnas anbi neno tnana, ma a'lo le'uf kun oake te fun in ante.

¹⁴Kan bol nit fa ma of kan bol nit fa amsa neno mese on neno nane, nak UISNENO natuin alomif atoni onane. UISNENO In anmaken anpesi Israel!

¹⁵Leka makenat nane oke, Nai Yosua nok in solalus sin anfani neu sin um-ume anbi Gilgal.

¹⁶Mes kesel nim en atoni Amori sin naen nafetnok ma sin natolo' anbi nuat mese in nanan anbi Makeda.

¹⁷Mes atoni sin nit sin ma sin natonan Nai Yosua neu sin bale tolo' nane.

¹⁸Oke te Nai Yosua nak, “Amtuil fatu-fatu naek neu nuat nane in fefa, ma amtao apaot anbi bale nane nai,” Nai Yosua nak onane,

¹⁹“mes hi kaisaa misnas ambi nane. Anli'u sin piut, ma amken sin na'ko kotin; kais mifetin sin he sin antam neu sin kot-kot sin! UISNENO anfe nalali ki mnisat neu sin.”

²⁰Nai Yosua ma atoni-atoni Israel sin namate atoni-atoni Israel nane, mes anmu'i anbi sin amsa le sin naen neu sin kot nami he nafetnon, talantia ka namate fa sin.

²¹Nalali te ale solalus na'ko Nai Yosua sin neki anfani nok aomina neu Nai Yosua anbi um-ume anbi Makeda. Katit fa atoni mese amsa anbi pah nane nabe'i hen laban sa'-sa' neu atoni Israel.

²²Oke onane te Nai Yosua nak, “Misoitan nuat nane in fefan nai ma meki nem neu i kesel nim en nane.”

²³Sin anfai nuat nane in fefan amsa, oke te kesel Yerusalem, Hebron, Yarmut, Lakhis ma Eglon anpo'o napoitan sin,

²⁴ma neki sin anao neu Nai Yosua. Oke te Nai Yosua no'en atoni Israel nibun nabuabon ok-oke, nalali te in anlenu he nati' ale solalus anakaf le nok in anbi makenat anfonat nem ma anteti ale kesel nane sin neon. Ma ale solalus anakaf nane sin nem ma anteni ale kesel nane sin neon.

²⁵Oke onane te, Nai Yosua nak neu in solalus anakaf sin nane nak, “Kais hi nekam naoni ma kais hi mimtau. So nati' hi mitab ma amhataniom nai, natuin onle i UISNENO of antao ma anmo'e neu ale hi musu sin.”

²⁶Oke te Nai Yosua namate ale kesel nane ma naboni sin anbi ni nim. Sin aon nitu anbi nane talantia neno anmabe.

²⁷Anbi tabu neno antes, Nai Musa anlenu, he nati' nasanut aon nitu amates-amates nane oke te anpolin sin neu nuat in nanan le kesel sin nane anpake anfani bale tolo'. Nalali te sin antao fatu-fatu naek nane anbi nuat fefan. Talantia neno i fatu-fatu nane fe esan anbi nane.

²⁸Neno nane Nai Yosua nape' Makeda, ma nis nan kot nane nok in kesel. Kot nane in tuafen in namate sin ok-oke; atoni mese amsa in ka nafetin fa hen moni. Nai Yosua antao ma anmo'e kesel Makeda onle in antao ma anmo'e neu kesel Yerikho.

²⁹Oke onane te, Nai Yosua nok in solalus sin anfen ma anao piut na'ko Makeda neu Libna ma nape' Libna.

³⁰UISNENO anfe lasi mnisat amsa neu atoni Israel neu kot i nok in kesel. Katit fa atoni mese amsa le he nafetin sin hen moni; ale atoni anbi kot nane namate nani sin ok-oke, Nai Yosua in antao ma anmo'e kesel kot nane on in antao ma anmo'e neu kesel Yerikho.

³¹Nalali te Nai Yosua ma in solalus sin anao mat na'ko Libna neu Lakhis. Sin aniusnan kot nane oke te nape' nani.

³²UISNENO anfe neu atoni Israel lasi mnisat neu Lakhis anbi makenat anbi neon nua. Sa' le sin antao ma anmo'e anbi Libna, sin antao ma anmo'e anbi Lakhis; atoni mese amsa sin ka nafetin fa hen moni, sin namate nani sin ok-oke.

³³Nai Horam, kesel Gezer in nem ma antuntaku Lakhis, mes Nai Yosua in nis ma anbe'u sin nok in solalus sin; atoni mese amsa ka namaika fa, al-al sin anmate oke.

³⁴Nalali te, Nai Yosua nok in solalus sin anao mat na'ko Lakhis neu Eglon oke te niusnan ma nape' kot nane.

³⁵Anbi neno nane amsa sin nasik nan Eglon, ma namate ale atoni anbi nane onle sin antao ma anmo'e anbi Lakhis.

³⁶Na'ko Eglon, Nai Yosua ma in solalus sin ansae neten ma anao neu kot Hebron, ma sin nape' kot nane,

³⁷ma nasik nan kot nane. In kesel ma ale atoni anbi kot nane ma anbi kot-kot bian anbi nane, namate nani sin ok-oke. Nai Yosua naskuku nale'un nani kot nane onle in antao ma anmo'e neu kot Eglon. Katit fa atoni mese amsa le sin nafetin hen moni anbi nane.

³⁸Oke onane te, Nai Yosua ma in solalus sin anfani ma nape' Debir.

³⁹Kot nane ma in kesel ma ale kot bian anbi nane Nai Yosua nasik nani sin. Ale atoni anbi nane namate nani sin ok-oke. Nai Yosua antao ma anmo'e Debir nok in kesel onle in antao ma anmo'e neu Hebron ma Libna ma sin kesel sin.

⁴⁰Pah nane ok-oke Nai Yosua in nis ma anbe'u nani sin. In nis ma anbe'u ale kesel anbi pah neten, anbi nonof tubu haen aon neno saen, anbi tubu haen neno tesan, ma anbi ale mnela neno aon bian a'ne'u. Katit fa atoni mese amsa le nafetin sin hen moni; namate nani sin ok-oke. Nane anmatom nok In aplenat UISNENO, Israel.

⁴¹Nai Yosua in nis ma anbe'u sin na'ko Kades-Barnea anbi neno aon bian a'ne'u antia Gaza anhaumak pah tasi ninen, natam nan pah Gosyen, anao piut antia Gibeon bian a'li.

⁴²Al anbi makenat haef mese, Nai Yosua in nis ma anbe'u ale kesel nane ok-oke ma in nasik nan sin pah le anbi sin kuasat nanan, natuin UISNENO, Israel In anmaken anseka Israel.

⁴³Oke onane te, Nai Yosua nok in solalus sin anfani neu sin um-ume anbi Gilgal.