Read Uab Meto YOSUA 11 Bible Online

YOSUA 11 - Uab Meto bible

YOSUA 11

¹Leka Kesel Nai Yabin na'ko Hazor in nen neu ale lasi mnisat Israel, in ansonu haef neu Kesel Nai Yobab na'ko kot Madon, neu kesel kot Simron ma Akhsaf,

²neu ale kesel anbi bale neten bian a'li, anbo Nonof Yordan anbi bian a'ne'u Nefo Galilea, anbi bale neten haen, ma anbi bale tasi ninen anhaumak Dor.

³In amsa ansonu haef neu atoni Kanaan anbi neno tesan ma anbi aon neno saen Yordan, neu atoni Amori, Het, Feris, ma atoni Yebus anbi bale neten, ma atoni Hewi anbi Tubu Hermon haen anbi bale Mizpa.

⁴Ale kesel nane sin nem nok sin solalus sin le amfau le'uf onle snaen anbi tasi ninen. Sin bikase ma sin aklet makenat amfau le'uf amsa.

⁵Ale kesel nane sin nabuabon ma sin al-al sin nem ma nahakeb sin bale makenat anhaumak Noe ana' Merom hen laban Israel.

⁶UISNENO nakua a'an neu Nai Yosua nak, “Kais mumtausan sin. Anbi noka fa tabu onle i, sin al-al sin Au umate sin ok-oke natuin Israel. Sin bikase sin mes ho mule'un sin ma ale sin aklet makenat mes ho motu mani sin.”

⁷Es nane te Nai Yosua nok ale in solalus sin sin nem ma anlaban musu nane nok askeken anhaumak Noe ana' Merom.

⁸Ma UISNENO anmo'e to Israel nis ma anbe'u sin. Atoni Israel sin nem ma anlaban sin ma anli'u sin antia Misrefot-Maim ma Sidon anbi aon bian a'li, ma talantia Nonof Mizpa anbi aon neno saen. Makenat nanaobon piut talantia katit fa atoni mese amsa na'ko musu le hen moni — al-al sin anmate ok-oke.

⁹Nai Yosua antao ma anmo'e sin anmatom nok sa' le UISNENO naplenat nani; in nale'un sin bikase sin ma notu nani ale sin aklet makenat.

¹⁰Nalali onane te Nai Yosua neki anfani, oke te nasik nan Hazor le anbi tabu nane anfani kot matani anbi ale plenat anbi bale nane. Kot nane sin notu nani, nok in kesel ma tuafen anbi kot nane namate nani sin ok-oke; katit fa atoni mese amsa le nafetin sin hen moni.

¹²Nai Yosua in nasik nani ale kot nane ok-oke, ma in anheke in kesel sin ma namate sin anmatom nok plenat Nai Musa, UISNENO In ate nane.

¹³Mes kot-kot le nahakeb sin anbi tubu tunken, katit fa es amsa le atoni Israel he nato nani sin, al Hazor anmes le Nai Yosua es notu nani.

¹⁴Ale kot-kot nane sin tuaken namate sin; katit fa atoni mese amsa le nafetin sin hen moni. Mes ale blua maupa ma ale mu'it sin atoni Israel naiti sin anfani sin ini.

¹⁵Ale sa' le afi UISNENO naplenat nani neu Nai Musa, In ate nane, Nai Musa natiaba nalali neu Nai Yosua, ma Nai Yosua in nanaoba nani; katit fa es amsa le in ka nanaoba fa.

¹⁶Nai Yosua in nasik nani ale pah nane — pah neten, pah tubu haen, leko anbi bian a'li ai le anbi bian a'ne'u; onane amsa pah Gosyen ok-oke ma pah mnela snaen anbi pah Gosyen, nok Nonof Yordan.

¹⁷Pah nane in menuan na'ko Neten Monas anhaumak Edom bian a'ne'u talantia antia Baal-Gad bian a'li anbi Nonof Libanon aon bian a'ne'u Tubu Hermon. A'lo le'uf Nai Yosua anmaken nok ale kesel pah nane, mes namuni te in anheke sin ma namate sin ok-oke.

¹⁹Na'ko ale kot-kot anbi pah nane, katit fa kot mese amsa le anmo'e lasi manbaan halan nekaf nok Israel, al Gibeon, kot uf Hewi. Ale kot-kot bian sin nis ma anbe'u sin anbi makenat.

²⁰UISNENO namanub sin nekan he sin anmaken nok Israel, he nati' nale'un sin ma namate sin ok-oke ka nok fa nek mamun anmatom nok UISNENO In aplenat neu Nai Musa.

²¹Anbi tabu nane amsa Nai Yosua in anao ma nale'un uf Enak, nane uf atoni-atoni le anae le'uf kun le sin natua anbi pah neten — anbi Hebron, Debir, Anab, ma anbi pah neten Yehuda ma Israel ok-oke. Sin al-al sin ok-oke Nai Yosua namate nani sin ma ale in kot-kot sin in nale'un nani sin.

²²Katit fa atoni mese amsa na'ko uf Enak nane le hen moni anbi pah Israel, al anbi Gaza, Gat, ma Asdod fe esan.

²³Nai Yosua nasik nani pah nane ok-oke anmatom nok UISNENO In aplenat neu Nai Musa, oke te anfe nani neu Israel anfani bale bela neu sin. Anbati nani pah nane, ma uf mese-mese es-es te napeni pa' mese. Atoni Israel sin nasnas na'ko makenat ma sin pah anbi tainine ma aomina.