Read Uab Meto YOSUA 13 Bible Online

YOSUA 13 - Uab Meto bible

YOSUA 13

¹Nai Yosua in namnasien. Es nane te UISNENO nakua a'an neu Nai Yosua nak, “Ho mumnasien, Yosua! Mes pah fe namfau le mes he musik mani sin:

²pah Filistin ok-oke ma Gesur,

³ma pah Awi ok-oke anao antia bian a'ne'u. (Pah na'ko Noe Sikhor nakat nok Mesir antia nakat Ekron bian a'li, nane ok-oke antam pah uf Kanaan; ma ale kesel Filistin natua anbi Gaza, Asdod, Askelon, Gat ma Ekron.)

⁴Onane amsa fe mes he nasik nani: pah Kanaan ok-oke ma Meara uf Sidon sin pah), anao antia Afek nakat nok pah uf Amori;

⁵ma pah uf Gebal, ma pah Libanon ok-oke anao neu neno saen, na'ko Baal-Gad anbi aon bian a'ne'u Tubu Hermon, anao piut antia lanan le anao neu Hamat.

⁶Nane amsa antam pah atoni Sidon ok-oke, le natua anbi bale neten anbi tubu-tubu Libanon ma Misrefot-Maim atnankenu.” “Ale uf-uf nane ok-oke of Au li'u sin, anbi tabu to Israel anken sin,” UISNENO nakua a'an anteni neu Nai Yosua. “Pah nane mes hom bati mani neu to Israel hen fani sin pah bale bela, onle Au lenu ulali neu ki.

⁷Es nane te, hom bati pah nane nai neu uf sio anbi nonot Israel, ma neu uf Manasye aon bian, he nati' nane anfani bale bela neu sin.”

⁸Uf Nai Ruben ma uf Nai Gad ma uf Nai Manasye aon bian sin ansimo nalali nain na'ko Nai Musa, ate UISNENO nane; esle' nain anbi neno saen Noe Yordan aon bian.

⁹Sin pah nane anao nok pah Aroer (anbi Nonof Noe Arnon ninen), ma kot le anbi nonof nane atnanan. Onane amsa mnela neten ok-oke na'ko Madeba antia Dibon

¹⁰ma antia nakat pah Amon, nok ale kot le afi Nai Sihon, kesel Amori naplenat nani, le natua anbi Hesybon.

¹¹Pah Gilead antam nok amsa, pah anhaumak Gesur ma Maakha, ma Tubu Hermon ok-oke, ma pah Basan ok-oke ma anao antia Salkha.

¹²Sin pah amsa anao nok pah Kesel Nai Og in aplenat, atoni Refaim amunit le naplenat Asytarot ma Edrei. Nai Musa in nis ma anbe'u nalali uf-uf nane ma anli'u sin anpoi na'ko sin pah.

¹³Mes atoni Israel kan li'u fa tuafen Gesur ma Maakha; sin fe natua nabala anbi Israel.

¹⁴Mes uf Lewi sin kan simo fa pa' na'ko Nai Musa, natuin UISNENO naton nalali neu Nai Musa nak pa' na'ko uf Lewi esle' na'ko ale fua tulu le notu anbi baki tulu neu UISNENO Israel.

¹⁵Pah bian na'ko pah le UISNENO anba'an neu to Israel nane Nai Musa anfe nalali neu uf Nai Ruben in ume nanan sin, hen fani pah bale bela neu sin.

¹⁶Sin pah nane anao nok Aroer (anbi Nonof Noe Arnon ninen). ma kot le anbi nonof nane atnanan antia mnela neten ok-oke anhaumak Medeba;

¹⁷onane amsa Hesybon ma ale kot anbi mnela neten nane, esle': Dibon, Bamot-Baal, Bet-Baal-Meon,

¹⁸Yahas, Kedemot, Mefaat,

¹⁹Kiryataim, Sibma, Zeret-Hasahar le anbi neten nane fafon anbi nonof nane,

²⁰Bet-Peor anbi Tubu Pisga in abnapaf sin ma Bet-Yesimot.

²¹Onane amsa ale kot nane antam anbi neten mnanu nane, ma ale pah Nai Sihon, kesel uf Amori in aplenat, le afi anbi Hesybon. In ma ale ana' aplenat Midian amsa, esle': Nai Ewi, Nai Rekem, Nai Zur, Nai Hur, ma Nai Reba, Nai Musa in nis ma anbe'u nalali sin. Ale ana' aplenat le nane afi sin naplenat pah nane neu Kesel Nai Sihon.

²²Anbi ale atoni-atoni le atoni Israel namate sin Nai Bileam Nai Beor anmone, atoni mnane nane namate in amsa.

²³Noe Yordan anfani nakat neu uf Nai Ruben in pah anbi aon neno tesan. Nane kot-kot ma kuan-kuan le anfe nani neu uf Nai Ruben in ume nanan sin hen fani pah bale bela neu sin.

²⁴Pah bian na'ko pah le UISNENO anba'an nani neu nonot Israel nane amsa Nai Musa anfe nalali neu uf Nai Gad in ume nanan sin, hen fani sin bale bela.

²⁵Sin pah nane anao nok Yaezer ma ale kot anbi Gilead ma aon bian na'ko pah uf Amon antia Aroer anbi aon neno saen Raba;

²⁶pah na'ko Hesybon antia Ramat-Mizpa ma Betonim, ma pah na'ko Mahanaim antia nakat Lodebar, ale nane ok-oke antam amsa pah neu uf Nai Gad.

²⁷Anbi Nonof Yordan, pah uf Nai Gad nane anao nok Bet-Haram, Bet-Nimra, Sukot, ma Zafon, esle' Kesel Nai Sihon anbi Hesybon in pah aplenat bian. Nakat neno tesan pah uf Nai Gad nane es Noe Yordan antia Nefo Galilea anbi aon bian a'li.

²⁸Nane kot-kot ma kuan-kuan le anfe nani neu uf Nai Gad in ume nanan sin hen fani bale bela neu sin.

²⁹Pah bian na'ko pah le UISNENO anba'an nani neu Israel nane amsa Nai Musa anfe nalali neu uf Nai Manasye aon bian in ume nanan sin hen fani sin bale bela.

³⁰Ale nakat sin pah nane antia Mahanaim, antam Basan ok-oke — esle' ale pah plenat Nai Og, kesel Basan, ma kuan-kuan Yair bo'ne anbi Basan.

³¹Anesi na'ko nane amsa pah Gilead aon bian antam amsa, ma Asytarot nok Edrei, esle' kuan-ainaf nua en pah plenat Kesel Nai Og anbi Basan. Pah nane ok-oke anfe nani neu Nai Makhir, Nai Manasye anmone.

³²Onle nane Nai Musa anbati pah anbi aon neno saen Yerikho, anbi Noe Yordan aon bian, leka in anbi mnela Moab.

³³Mes uf Nai Lewi ka napeni fa pah ana'-ana' mese amsa na'ko Nai Musa. Nai Musa natonan sin nak pa' le anfe neu sin esle' na'ko ale fua tulu le natulu nani neu UISNENO Israel.