Read Uab Meto YOSUA 15 Bible Online

YOSUA 15 - Uab Meto bible

YOSUA 15

¹Uf Yehuda in ume nanan sin ansimo pah le in nakat-nakat nane on i: Anbi bian a'ne'u, pah nane in menuan antia bian a'ne'u in tu'an pah mnela snaen Zin anbi nakat Edom;

²na'ko bian a'ne'u in tu'an Tasi Maten,

³anao piut neu bian a'ne'u anao nok bnapaf-bnapaf tubu anbi Akrabim antia Zin. Oke te anao nok bian a'ne'u Kades-Barnea, anao piut nok Hezron, ma ansae neu Adar, nalali te an ali Karka.

⁴Na'ko nane anao piut amsa neu Azmon, oke te anao natuin noe ana anbi nakat Mesir, nalali te namsopu anbi Tasi Tnana. Onle nane nakat anbi bian a'ne'u pah Israel ok-oke.

⁵Anbi neno saen, in nakat es Tasi Maten anao piut neu bian a'li antia Noe Yordan in haen. Anbi bian a'li, in nakat nane na'ko Noe Yordan in haen nane,

⁶ansae neu Bet-Hogla, oke te anao piut neu nakat Nonof Yordan. Na'ko nane nakat nane ansae piut neu bian a'li antia Fatu Bohan (Bohan nane Nai Ruben anmone),

⁷namuni te anao piut neu Nonof Susa antia Debir, oke te anbeo anteni neu bian a'li an ali Gilgal anbi bale le anmabaina nok bnapaf-bnapaf tubu anbi Adumim bian a'ne'u nonof nane. Na'ko nane anao piut anteni neu oe mate En-Semes, oke te neu En-Rogel,

⁸nalali te ansae anao nok Nonof Hinom neu neten bian a'ne'u, anbi nane Yerusalem esan, kot atoni Yebus. Na'ko nane nakat nane an ali neu neten nane tunan anbi neno tesan Nonof Hinom, anbi bian a'li tu'an Nonof Refaim,

⁹nalali te anao piut neu oe mata Me-Neftoah, antia kot-kot anhaumak Tubu Efron. Na'ko nane nakat pah nane anbeo an ali Baala (esle' Kiryat-Yearim),

¹⁰ma anfun natef neno tesan Baala an ali Tubu Edom, oke te anao piut neu bian a'li Tubu Yearim (esle' Tubu Kesalon), ma ansanu neu Timna.

¹¹Ma na'ko Timna, nakat nane anao piut neu bian a'li Tubu Ekron, oke te an ali Sikron, ma anao nok Tubu Baala, anao piut neu Yabneel, ma namsopu anbi Tasi Tnana,

¹²le anfani nakat neno tesan pah uf Yehuda. Anbi pah nane atoni-atoni le natua anbine na'ko uf Yehuda in ume nanan sin.

¹³Anmatom nok UISNENO In aplenat neu Nai Yosua, anfe nani pah Yehuda aon bian neu Nai Kaleb Nai Yefune anmone na'ko uf Yehuda. Anfe nani neune Hebron, nane kot Nai Arba in-ini kun, Nai Enak amaf.

¹⁴Nai Enak in sufan sin esle' atoni Sesai, Ahiman ma Talmai. Nai Kaleb anli'u sin ok-oke na'ko Hebron.

¹⁵Na'ko nane in anao ma anken kot atoni-atoni natua anbi Debir. (Kot pane afi ahunut mateka on Kiryat-Sefer.)

¹⁶Nai Kaleb nak, “Sekau nabe'i nasik nan Kiryat-Sefer, nabe'i au fe neune au anfeto bi Akhsa hen fani in fenai.”

¹⁷Nai Otniel, anah na'ko Nai Kaleb in biaf kanan Nai Kenas, le nasik nan kot nane; in anfe in anfeto bi Akhsa neu Nai Otniel anfani in fenai.

¹⁸Anbi sin neno mafet ma mamonet, Nai Otniel naseke bi Akhsa he nati' antoti nain pisa mese na'ko in amaf. Ma bi Akhsa in ansanu na'ko in bikase luke mnanu, oke te Nai Kaleb natoti bi Akhsa in hen lomi sa'.

¹⁹Bi Akhsa natae nak, “Au lomi he hom fe neu kau oe mata fauk-fauk, natuin nain le ama hom fe kau nane anbi bale ametos.” Ma Nai Kaleb anfe neune oe mata anbi bale nane anbi fafon ma anbi pinan.

²⁰Le i pah le anfe nani neu uf Yehuda in ume nanan sin he nati' anfani sin bale bela.

²¹Kot-kot a'lo le'uf anbi bian a'ne'u esle' anbi nakat Edom, ok-oke kot bo'nua am sio, antam nok ale kuan-kuan le anhaumak anbi nane. Kot-kot nane esle': Kabzeel, Eder, Yagur, Kina, Dimona, Adada, Kedes, Hazor, Yitnan, Zif, Telem, Bealot, Hazor-Hadata, Keriot-Hezron (esle' Hazor), Amam, Sema, Molada, Hazar-Gada, Hesmon, Bet-Pelet, Hazar-Sual, Bersyeba, Baala, Iyim, Ezem, Eltolad, Khesil, Horma, Ziklag, Madmana, Sansana, Lebaot, Silhim, Ain ma Rimon.

³³Kot-kot ma kuan-kuan le anhaumak anbi nane, le anbi neten-neten sin haeken, ok-oke kot bo'es am ha esle': Esytaol, Zora, Asna, Zanoah, En-Ganim, Tapuah, Enam, Yarmut, Adulam, Sokho, Azeka, Saaraim, Aditaim, Gedera, ma Gederotaim.

³⁷Onane amsa kot bo'es am ne i nok kuan-kuan le anhaumak bale nane esle': Zenan, Hadasa, Migdal-Gad, Dilean, Mizpa, Yokteel, Lakhis, Bozkat, Eglon, Khabon, Lahmas, Khitlis, Gederot, Bet-Dagon, Naama, ma Makeda.

⁴²Onane amsa kot sio nok kuan-kuan le anhaumak bale nane esle': Libna, Eter, Asan, Yiftah, Asna, Nezib, Kehila, Akhzib ma Merasa.

⁴⁵Ma Ekron amsa nok in kot-kot ana sin ma in kuan-kuan sin,

⁴⁶ma ale kot-kot ma kuan-kuan anhaumak Asdod, na'ko Ekron antia Tasi Tnana.

⁴⁷Onane amsa Asdod ma Gaza nok kot-kot ana ma in kuan-kuan sin le nasan'ok anhaumak antia noe ana nakat Mesir ma Tasi Tnana ninen.

⁴⁸Anbi pah neten anmu'i kot bo'es am mese nok kuan-kuan le anhaumak bale nane esle': Samir, Yatir, Sokho, Dana, Kiryat-Sana (esle' Debir), Anab, Estemoa, Anim, Gosyen, Holon ma Gilo.

⁵²Onane amsa kot sio en i, nok kuan-kuan le anhaumak bale nane esle': Arab, Duma, Esan, Yanum, Bet-Tapuah, Afeka, Humta, Kiryat-Arba (esle' Hebron) ma Zior.

⁵⁵Onane amsa kot bo' mese i nok kuan-kuan le anhaumak bale nane esle': Maon, Karmel, Zif, Yuta, Yizreel, Yokdeam, Zanoah, Kain, Gibea ma Timna.

⁵⁸Ma kot ne en i amsa nok kuan-kuan le anhaumak bale nane esle': Halhul Bet-Zur, Gedor, Maarat, Bet-Anot ma Eltekon.

⁶⁰Onane amsa kot-kot i nok kuan-kuan le anhaumak bale nane esle': Kot Kiryat-Baal (esle' Kiryat-Yearim) ma Kot Raba.

⁶¹Anbi bale mnela snaen anmu'i kot ne nok kuan-kuan le anhaumak bale nane esle': Bet-Araba, Midin, Sekhakha, Nibsan, Kot Masi ma En-Gedi.

⁶³Kot Yerusalem nane antam Yehuda sin bale bela, mes atoni Yehuda sin kan li'u nabe'i fa atoni Yebus le natua anbi nane. Talantia neno i atoni Yebus fe natua nabua nok atoni Yehuda anbi kot nane.