Read Uab Meto YOSUA 17 Bible Online

YOSUA 17 - Uab Meto bible

YOSUA 17

¹Pah bian anbi neno tesan Noe Yordan anfe nani neu ume nanan bian na'ko Nai Manasye sufan, Nai Yusuf in anmone unu. Nai Makhir, Nai Gilead amaf, nane Nai Manasye anmone unu. Natuin in atoni meo pa'e mese, es nane te bale Gilead ma bale Basan le anbi neno saen Noe Yordan anfe nani neune.

²Bale anbi neno tesan Noe Yordan anfe nani neu ume nanan bian na'ko Nai Manasye sufan, esle' ume nanan: Nai Abiezer, Nai Helek, Nai Asriel, Nai Sekhen, Nai Hefer ma Nai Semida; nane ok-oke suf atoni na'ko Nai Manasye Nai Yusuf anmone. Sin le nane nakaf-nakaf anbi ume nanan.

³Nai Zelafehad, Nai Hefer anmone, Nai Gilead upuf (Nai Gilead Nai Makhir anmone, Nai Manasye upuf), sin kan mu'i fa anmone, al anfeto, esle': bi Makhla, bi Noa, bi Hogla, bi Milka, bi Tirza.

⁴Sin anao neu Ana' Fuat Knino Nai Eleazar, Nai Yosua anmone, Nai Nun anmone ma ale nakaf sin ma sin nak, “UISNENO nak neu Nai Musa nak hai amsa mes he mipeni pah nok bale bela on hai biafen sin anmone.” Es nane te anmatom nok UISNENO In aplenat, ale anfeto Nai Zelafehad nane anfe neu sin nain nok sin biafen anmone.

⁵Es nane te, ka al fa Nai Manasye sufan anmone sin es napeni nain, mes in sufan na'ko anfeto sin amsa. Es nane te uf Nai Manasye in napeni batis pa' bo'mese, kan so'i fa bale Gilead ma Basan anbi neno saen Noe Yordan. Fun pah Gilead anfe nani neu Nai Manasye in sufan bian.

⁷Nakat na'ko pah Nai Manasye na'ko Asyer anao neu Mikhmetat anbi neno saen Sikhem. Na'ko bale nane ansanu neu bian a'ne'u antia pah atoni En-Tapuah.

⁸Pah Tapuah nane uf Nai Manasye ini, mes kot Tapuah anbi nakat Manasye, nane Nai Efraim sufan in-ini.

⁹Oke te nakat Nai Manasye in pah nane anao ansanu antia Noe ana' Kana. Kot-kot anbi bian a'ne'u noe ana nane Nai Efraim ini, maski anbi Nai Manasye in pah. Nakat pah Nai Manasye nane oke te natuin lanan bian a'li noe ana' nane, oke te namsopu anbi Tasi Tnana.

¹⁰Onle nane Nai Efraim anbi bian a'ne'u, ma Nai Manasye anbi bian a'li, ma Tasi Tnana nane anfani sin nakat anbi neno tesan. Anbi neno tesan lo tasi, pah Nai Manasye in anmu'i nakat nok pah Nai Asyer, ma anbi neno tesan lo tasi, anmu'i nakat nok pah Nai Isakhar.

¹¹Anbi pah Nai Isakhar ma Nai Asyer nane Nai Manasye in bale amsa, esle': Bet-Sean, ma Yibleam nok kuan-kuan le anhaumak bale nane. Onane amsa Dor (kot le anhaumak tasi ninen), En-Dor, Taanakh, Megido nok kuan-kuan le anhaumak bale nane.

¹²Mes uf Manasye kan li'u nabe'i fa kot-kot nane tuaken; es nane te atoni Kanaan fe natua nabala anbi nane.

¹³Anbi neno namuni te leka atoni Israel sin anmatanin nesin atoni Kanaan, sin kan li'u fa atoni Kanaan; al sin naseke atoni-atoni Kanaan nane hen mepu neu sin.

¹⁴Nai Yusuf in sufan sin nak neu Nai Yosua nak, “Nansa' hom kai al bale mese na'ko pah nane, mes hai mifau nae le'uf, natuin UISNENO anfe nalali tetus neu kai?”

¹⁵Nai Yosua natae nak, “Natuin hi amfau le'uf, ma pah neten Efraim malenat neu ki, es nane te amnao nai meu atoni Feris ma Refaim, sin pah. Amfai ma misona bale-bale fe'u nai anbi sin nasi ma sin lamu nane.”

¹⁶Nai Yusuf in sufan sin natae nak, “Pah neten nane in menuan nane ka noka kai fa, ma uf Kanaan le natua anbi mnela nane sin anmu'i aklet-aklet makenat na'ko besi he sin le natua anbi Bet-Sean ma kuan-kuan le anhaumak anbi bale nane, ai sin le natua anbi Nonof Yizreel.”

¹⁷Oke te Nai Yosua nak neu uf Efraim ma Manasye anbi neno tesan nane nak, “Namneo, hi mimfau nae le'uf ma abe'it ki, ma mes anfe ki nain anesi na'ko bale mese na'ko pah nane.

¹⁸Hi maiti pah neten nane nai, natuin maski pah nane fe nasi ma lamu, nabe'i him fai ma misona bale nane ma hi mipeni mani ok-oke. Ma neu atoni-atoni Kanaan nane, nabe'i him li'u sin, maski sin nabe'i ma anmu'i aklet-aklet makenat na'ko besi.”