Read Uab Meto YOSUA 18 Bible Online

YOSUA 18 - Uab Meto bible

YOSUA 18

¹Leka sin nis ma anbe'u nalali pah le UISNENO anba'an nalali, to Israel ok-oke nabua anbi Silo, oke te sin nahaken Um-ume Saksit UISNENO.

²Fun anmu'i uf hitu na'ko to Israel le fe ka napani fa nain.

³Es nane te, Nai Yosua nak neu to Israel nak, “Him lomi hem pao antia leka anteni, oke te fun him nao he misik ma mitua pah le UISNENO, hi amfenu sin Uisneno, anfe neu ki?

⁴Ambeti nai atoni tenu na'ko uf mese-mese. Au of a'lenu sin he nao anfun natef ma ankiso pah nane ma antui ale nakat pah nane le sin anlomi he sin anpal ma anmu'i nani. Nalali onane te, sin mes anfani nem neu kau.

⁵Pah nane mes anbati nani anfani pisa' hitu. Yehuda of nabala anbi pah bian a'ne'u, ma ume Yusuf anbi pah bian a'li.

⁶Hi mes amtui mani pah pisa hitu nane sin nakat-nakat sin, ma mina'at mani neu kau. Mes au fe ki him hel sulat he au uhin sa' le Uisneno natetab neu ki.

⁷Al uf Lewi of sin ka napeni fa nain nok ki, natuin sin pa' esle' sin anfani Ana' fuat knino neu hen tuthae UISNENO. Mes neu uf Gad, Ruben, ma Manasye aon bian, namneo sin papeni nalali sin pa' anbi neno saen Noe Yordan. Nai Musa UISNENO In ale, afi anfe nalali nain nane neu sin.”

⁸Onane te Nai Yosua anfe lekat lulut i neu atoni-atoni nane on i, nak, “Amnao nai amfun mitef ma amkiso pah nane ok-oke ma amtui nakat-nakat pah nane; oke te him fani aim meu kau. Mes au fe ki him hel sulat anbi i anbi Silo he au uhin sa' le UISNENO natetab neu ki.” Leka sin ansimo nalali lekat lulut nane na'ko Nai Yosua, sin anao anfun natef ma ankiso pah nane.

⁹Pah nane ok-oke sin anfun natef, ma sin antui nakat-nakat na'ko pah pisa' hitu nane ma sin antui amsa kot-kot le anbi pah nane in nanan. Oke te sin anfani neu Nai Yosua anbi um-ume anbi Silo.

¹⁰Oke te Nai Yosua anfe neu sin he sin anhelan sulat he nahin sa' le UISNENO natetab neu sin. Nalali te Nai Yosua anfe nain neu uf mese-mese le fe ka napeni fa nain.

¹¹Anbati nauhunun pah nane neu ume nanan uf Nai Benyamin. Sin pa' nane anbi pah uf Yehuda ma pah uf Nai Yusuf sufan.

¹²Anbi bian a'li, sin nakat pah nane na'ko Noe Yordan, oke te ansae neu bnapaf bian a'li Yerikho, nalali te anao neu neno tesan anao nok pah neten anao mnela snaen Bet-Awen.

¹³Nakat nane anao piut amsa neu bnapaf anbi bian a'ne'u Lus (nane Betel), oke te ansanu neu Atarot-Adar anbi neten bian a'ne'u Bet-Horon-Pinan.

¹⁴Na'ko neno tesan neten nane, nakat pah nane anbeo neu bian a'ne'u an ali neu Kiryat-Baal (nane Kiryat Yearim). Kiryat-Baal nane uf Yehuda sin ini. Nane nakat pah nane anbi neno tesan.

¹⁵Nakat-nakat anbi bian a'ne'u na'ko Kiryat-Yearim anao piut neu oe mata-oe mata Me-Neftoah.

¹⁶Oke te ansanu anao neu pah neten haen le anmatom nok Nonof Hinom anbi tu'an bian a'li Nonof Refaim. Oke onane te nakat nane anao neu bian a'ne'u bnapaf-bnapaf pah neten anbi pah Yebus, anao piut an ali neu En-Rogel,

¹⁷anbeo anao neu bian a'li neu En-Semes, oke te anao neu Gelilot anbi aon bian Bale Saet Adumim. Nalali te nakat nane ansanu neu Fatu Bohan (Bohan nane Nai Ruben anmone),

¹⁸oke te anao nok bian a'li bnapaf-bnapaf pah neten le anmabaina nok Nonof Yordan, oke te ansanu neu nonof nane,

¹⁹anao nok bian a'li bnapaf-bnapaf pah neten pah Hogla, ma namsopu anbi bian a'li Tasi Maten anbi bale Noe Yordan haen. Nane nakat anbi bian a'ne'u.

²⁰Noe Yordan anfani nakat anbi neno saen. Nane nakat-nakat le anfe nani neu ume nanan anbi uf Benyamin hen fani sin bale bela.

²¹Kot-kot le uf Nai Benyamin in ume nanan sin in-ini ok-oke kot bo'es am nua nok kuan-kuan le anhaumak kot-kot nane, esle': Yerikho, Bet-Hogla, Emek-Kezis, Bet-Araba, Zemeraim, Betel, Haawim, Para, Ofra, Kefar-Haamonai, Ofni ma Geba.

²⁵Onane amsa kot bo'es am ha i nok kuan-kuan le anhaumak anbi nane: Gibeon, Rama, Beerot, Mizpa, Kefira, Moza, Rekem, Yirpeel, Tarala, Zela, Elef, Yebus (nane Yerusalem), Gibea ma Kiryat-Yearim. Nane pah-pah bale bela le anfe nani neu uf Nai Benyamin in ume nanan sin hen fani pah bale bela neu sin.