Read Uab Meto YOSUA 2 Bible Online

YOSUA 2 - Uab Meto bible

YOSUA 2

¹Namuni na'ko um-ume anbi Sitim, Nai Yosua ansonu atoni atnu'us nua neu Kanaan. Nai Yosua naplenat atoni nua en atnu'us nane he nati' sin natnu' nani pah Kanaan nok atol-tolo', anes-nesi kot Yerikho. Oke te sin anao neu kot nane, ma sin antam neu ume amapaisa mese, in kanan bi Rahab.

²Kesel kot Yerikho in a'nen nak anbi fai nane anmu'i atoni Israel le nem ma natnu' pah Yerikho.

³Es nane te kesel atoni anao neu bi Rahab he natiaba plenat i nak, “Mupoitan nai atoni-atoni le sin nem ma antam anbi ho ume. Sin le nane atoni atnu'us le sin nem he natnu' pah Yerikho ok-oke!”

⁴“Namneo anmu'i atoni le sin nem neu au ume,” bi Rahab natae onane, “mes au ka uhin fa sin he nem na'ko me. Sin anao nalali anbi tabu fe names'ok leka fe kan ek fa eno naek kot. Ma au ka utoti fa sin neu sin he nao neu me, mes leka atli'u sin nok manoe, oni fe nabe'i tapeni sin.” (Mes bi Rahab in natolo' nalali atoni nua en nane anbi hu kase ta'un le in antupu nani anbi in po'af.)

⁷Oke te kesel in haef sin nane anao nasaitan kot nane. Leka sin anpoi nalali te, an ek nani eno naek nane. Sin nami atoni nua en atnu'us nane talantia bale tlaka anbi Noe Yordan.

⁸Anbi fa nane fe atoni nuaen atnu'us Israel nane kan tupan fa, bi Rahab in anao neu sin anbi in ume po'af,

⁹ma nak neu sin nak, “Au uhin ulalien nak UISNENO anfe nalali ki pah le i neu ki. Ale atoni anbi i sin namtausan ki.

¹⁰Hai amnen milali hanaf antom neu onme UISNENO nameti Tasi Gelagah anbi hi humam ma hi matam, leka him poi misaitan Mesir. Hai amsa amnen milali neu onme hi mimate Nai Sihon ma Nai Og kesel nua en Amori anbi Noe Yordan aon neno saen.

¹¹Leka hai amnen milali lasi nane, hai mimtau anae le'uf. Ale hai atoni sin be'in sin matanin namneku natuin hi. UISNENO hi namneo-namneo Uisneno Akuasat Afin-finit anbi neno tunan ma pah pinan.

¹²Au toti kihe nati' hi amlomi hem sup anbi In kanan nak of hi amtao ma amoe au ume nanan sin nok alekot onle au tao ma mo'e ulali neu ki. Hi manba'an nai nak au ama ma au aina, au biaf ma au benuf sin ma ale sin ume nanan sin ok-oke hi of ka mimate fa sin, so mak of hi mineo ma mhafo sin, Es nane te amfe neu kau atakaf mese nak nabe'i au uteb neu ki!”

¹⁴Oke te atoni nua en nane natae nak, “Hai manba'an nak leka UISNENO nana'at pah le i neu kai, hai of amtao ma mo'e ki nok alekot, al nati' ka nabe'i fa he ho mutonan sekau neu hai sekau kai. So nati' UISNENO anfe kai kasat leka hai ka minokab fa hai lasi manba'an nane.”

¹⁵Natuin bi Rahab in ume nahakeb anbi baki lape kot, es nane te bi Rahab nasanut atoni nua en nane neki tani nao nok eno kiso.

¹⁶“Amnao nai meu bale tubu tunan,” onle nane bi Rahab in nak neu sin, “He nati' atoni-atoni le kesel anlenu sin nane kan heke nan ki fa. Mitolo' ambi bale nane neno tenu in a'lon talantia sin anfani neu sin bale, oke te nabe'i him nao piut.”

¹⁷Atoni nua en atnu'us nane sin nak neu bi Rahab nak, “Leko, hai of minokab hai fef manba'an le hom toti mulali na'ko kai.

¹⁸Al lasi i esle' mes ho amtao ma amoe mani. Leka hai mipe' ho pah, so nati' tani me' le i hom futun neu eno kiso le i bale ho musanut kai. Ho ama ma ho aina, ho biaf ma ho benuf sin, ho ama in ume nanan sin ok-oke so nati' ho mubua sin anbi ho ume le i.

¹⁹Leka mese na'ko sin anpoi na'ko ume le i ma namate in, in amaten nane in sanat kun anmes; hai kam sutai fa neu lasi nane. Mes leka anmu'i es le napeni lasi amle'ut anbi ume i in nanan, hai es amsutai neu lasi nane.

²⁰Mes, leka hi mitonan es neu hai sekau kai, onane te hai kam futnom amteni fa neu lasi-lasi manba'an le hom toti na'ko kai.”

²¹Bi Rahab in ansimo lasi nane oke te in nafetin sin ma sin anao. Nalali te in anfutun tani me nane anbi in eno kiso.

²²Oke te atoni nua en atnu'us nane sin anao neu bale tubu tunan ma si natolo' anbi nane. Neno tenu in a'lon kesel in haef sin nami sin anbi me-me anbi pah nane ok-oke, mes ka napeni fa sin. Namuni te kesel in haef sin nane anfani neu Yerikho.

²³Oke te atoni nua en atnu'us nane sin ansanu na'ko bale tubu tunan ma sin anlak noe, oke te sin anfani neu Nai Yosua. Ale sa' le sin nit, sin naton nani neu Nai Yosua.

²⁴Nalali te sin nak, “Namneo UISNENO In anfe pah nane ok-oke neu kit; ale atoni anbi pah nane sin namtausan kit.”