Read Uab Meto YOSUA 20 Bible Online

YOSUA 20 - Uab Meto bible

YOSUA 20

¹Nalali te UISNENO anlenu Nai Yosua

²nak neu atoni Israel on i, “Au fe ulali plenat neu Nai Musa he nati' in naton neu ki antom kot-kot aninit ma ahafot, nane kot-kot le nabe'i atoni naen neune he napeni neot ma hafot.

³Atoni le namate atoni bian ka nok fa asafanu, nabe'i in naen neu kot nane he nafetnon na'ko atoni hen seunbanin lasi amle'ut neu atoni nane.

⁴In nabe'i naen neu kot mese na'ko kot-kot nane, ma anao neu bale lef lasi anbi kot nane, oke te naton in lasi nane neu ale anakaf anbol kot nane neu lasi sa' le anbol nalali. Ale anakaf nane of nafetin in hen tam neu kot nane ma anfe neune bale he in natua anbi nane.

⁵Leka atoni le hen seunbanin lasi amle'ut nane anli'u in antia bale nane, tuafen kot nane ka nabe'i fa he nana'at in neu atoni nane. Sin mes naneo ma nahafo in, natuin in namate atoni ka nok fa asafanu, ma ka natuin fa nato'an atoni nane.

⁶In nabe'i natua anbi kot nane talantia sin nafek in lasi anbi to mfaun sin matan, ma antia atoni le in ana' mepu Ana' fuat knino Amnanut anbi batan nane anmate. Oke onane te nabe'i atoni nane anfani neu in kuan le afi in naen na'ko bale nane.”

⁷Oke te anbi bian a'li Noe Yordan to Israel naletab kot-kot i on kot aninit ma ahafot esle': Kedes anbi neten Naftali anbi Galilea, Sikhem anbi neten Efraim, ma Hebron anbi neten Yehuda.

⁸Anbi bale neno saen Noe Yordan anbi mnela snaen antom neno saen Yerikho, sin natetab kot-kot i on kot aninit ma ahafot esle': kot Bezer anbi Nai Ruben pah, kot Ramot anbi Gilead anbi Nai Gad pah, ma kot Golan anbi Basan, anbi Nai Manasye pah.

⁹Nane ale kot-kot aninit ma ahafot le natetab nani sin neu to Israel ok-oke ma neu ale atoni anao amnemat le natua anbi sin atnanan. Sekau am sekau le namate atoni bian ka nok fa asafanu, nabe'i napeni neot ma hafot anbi kot-kot nane na'ko atoni le hen li'u hen seunbanin lasi amle'ut neune; ka nabe'i fa he namate in leka fe ka nafek fa in lasi anbi atoni mfaun sin matan.