Read Uab Meto YOSUA 21 Bible Online

YOSUA 21 - Uab Meto bible

YOSUA 21

¹Anbi neno mese ale anakaf ume nanan anbi uf Nai Lewi sin anao neu Silo anbi pah Kanaan, ma sin nem neu Ana' Fuat Knino Nai Eleazar, ma Nai Yosua Nai Nun anmone, ma neu ale anakaf ume nanan uf-uf nonot Israel. Sin nak, “Nao nok Nai Musa, UISNENO anfe nani plenat neu kai, he nati' neu kai atoni-atoni Lewi, amfe neu kai kot bale he hai mitua ambine ma bale mnela anhaumak kot nane neu hai mu'it sin.”

³Es nane te atoni Israel sin natuin plenat UISNENO. Na'ko sin pah bale bela, atoni Israel sin anfe neu atoni Lewi sin kot-kot nok bale mnela.

⁴Ahun-hunut le ansimo kot nane esle' ume nanan na'ko Nai Kehat anbi uf Nai Lewi. Ale ume nanan Ana' Fuat Knino Nai Harun sufan anfe neu sin kot-kot bo'es am tenu na'ko pah uf Yehuda, uf Simeon ma uf Benyamin.

⁵Ale ume nanan bian na'ko Nai Kehat anfe neu sin kot bo' mese na'ko pah uf Efraim, uf Dan ma uf Manasye anbi neno tesan Noe Yordan.

⁶Ume nanan Nai Gerson sin napeni kot bo'es am tenu na'ko uf Isakhar, Uf Asyer, uf Naftali ma uf Manasye le antom neno saen Noe Yordan.

⁷Ume nanan na'ko Nai Merari sin napeni kot bo'es am nua na'ko pah uf Nai Ruben, Gad ma Zebulon.

⁸Onle nane atoni Israel anbati kot-kot nane ma bale bela mnela natuin hel sulat neu atoni Lewi, onle UISNENO naplenat nani nao nok Nai Musa.

⁹Na'ko nonot Nai Kehat anbi uf Nai Lewi, ale Ana' Fuat Knino Nai Harun sufan esle' ahun-hunut sin napeni kot-kot nane; anfe neu sin kot bo'es am tenu nok ale in bale mnela. Na'ko uf Yehuda ma Simeon, sin ansimo kot sio, esle': Libna, Yatir, Estemoa, Holan, Debir, Ain, Yuta, Bet-Semes ma Arba, le nakanab natuin Nai Enak amaf. Kot nane muni in kanan Hebron, nane kot aninit ahafot mese anbi neten Yehuda. Ale mnela ma ale kuan kot nane anfe nalali neu Nai Kaleb Nai Yefune anmone hen fani in pah bale bela. Na'ko uf Benyamin sin napeni kot ha, esle': Gibeon, Geba, Anatot ma Almon.

²⁰Ale ume nanan bian na'ko Nai Kehat anfe neu sin kot bo'mese na'ko ale in hale mnela sin. Na'ko uf Efraim sin napeni kot ha, esle': Bet-Horon, Kibzaim, Gezer ma Sikhem, kot aninit ahafot mese anbi neten Efraim. Na'ko uf Dan sin napeni kot ha, esle': Elteke, Gibeton, Ayalon ma Gat-Rimon. Na'ko uf Manasye le antom neno tesan sin ansimo kot nua, esle': Taankha ma Gat-Rimon.

²⁷Ume nanan mese anteni anbi uf Nai Lewi esle' nonot Nai Gerson. Ume nanan anbi Nai Gerson nane napeni kot bo'es am tenu nok in bale mnela sin. Na'ko Manasye le antom neno saen sin napeni kot nau, esle': Beestera ma Golan, kot aninit ahafot mese anbi pah Basan. Na'ko uf Isakhar sin napeni kot ha, esle': Kisyon, Dobrat, Yarmut ma En-Ganim. Na'ko uf Nai Asyer sin napeni kot ha, esle': Misal, Abdon, Helkat ma Rehob. Na'ko uf Naftali sin napeni kot tenu, esle': Hamat-Dor, Kartan ma Kedes, kot aninit ahafot mese anbi Galilea.

³⁴Ume nanan bian anbi uf Nai Lewi, esle' Nai Merari napeni kot bo'es am nua nok ale in bale mnela sin. Na'ko uf Zebulon sin napeni kot ha, esle': Yokneam, Karta, Dimna ma Nahalal. Na'ko uf Nai Ruben sin napeni kot ha, esle': Bezer, Yahas, Kedemot ma Mefaat. Na'ko uf Gad sin napeni kot ha esle': Mahanaim, Hesybon, Yaezer ma Ramot, kot aninit ahafot mese anbi Gilead.

⁴¹Es nane te na'ko ale bale le nonot Israel sin napeni kot ok-oke bo'ha am fanu nok ale bale mnela le anhaumak anbi nane anfe nani sin neu atoni-atoni Lewi.

⁴³Onle nane UISNENO anfe nani pah nane ok-oke neu to Israel onle In anba'an nani nok supat neu sin amfenu. Leka sin antoko nalali pah nane, nonot Israel sin natua nabala anbi nane.

⁴⁴Ma anmatom nok sa' le UISNENO anba'an neu sin amfenu, pah nane antainine natuin UISNENO naneo ma nahafo nani. Katit fa es na'ko sin musu-musu sin le hen laban sin, natuin UISNENO anfe lasi mnisat neu atoni Israel neu ale sin musu sin.

⁴⁵UISNENO nanokab ale In lasi manba'an neu nonot Israel; katit fa es amsa le In ka nanokab nani fa.