Read Uab Meto YOSUA 22 Bible Online

YOSUA 22 - Uab Meto bible

YOSUA 22

¹Oke te Nai Yosua no'en atoni-atoni na'ko uf Nai Ruben, Gad ma Manasye aon bian le antom neno saen Noe Yordan ma nak neu sin nak,

²“Him tao ma mo'e milali ale sa'-sa' le Nai Musa, UISNENO In ate naplenat nani neu ki. Ma hi amsa mituin milali ale au plenat.

³Hi ka misaitan mitfa hi biaf sin, atoni Israel bian, anbi neno afinit, he nati' sin anmabe'u anmese. Mes hi mituin hi UISNENO In aplenat sin nok namneo-namneo.

⁴Onane te anmatom nok In lasi manba'an, hi UISNENO anfe nalali tainine neu hi biaf sin, atoni Israel bian. Es nane te, him fani nai neu hi pah antom neno saen Noe Yordan nane le afi Nai Musa anfe nalali neu ki.

⁵Ma ampanat nai he nati' hi mituin ale plenat le Nai Musa anfe nalali neu ki esle': Amnek mimnau hi UISNENO, mituin In lom in nai, minaoba In plenat-plenat sin, mi'ki nai meu In, ma am aetnom nai meu In nok hi nekam ok-oke.”

⁶Nalali te Nai Yosua anfe tetus neu sin ma nafetin sin anfani neu sin pah ma in anfe neu sin uab molok i, “Muni i him fani atoni amu'it ma him fani meki mu'it namfau, noni muti, noni mnatu, noni molo, besi ma bale pake. Ambeti ale sa' le hi mi os anbi makenat neu ale hi biaf sin anbi hi nonot sin.” Onane te uf Nai Ruben, Gad ma uf Manasye anbi aon neno saen Yordan nane sin nasaitan atoni Israel bian, oke te sin anfen na'ko Silo anbi Kanaan an ali sin pah anbi Gilead. Sin natua anbi pah nane natuin UISNENO In naplenat nao nok Nai Musa. (Uf Manasye aon bian sin napeni nalali na'ko Nai Musa, pah antom neno saen Noe Yordan ma uf Manasye aon bian anteni sin napeni pah na'ko Nai Yosua antom neno tesan Noe Yordan nok uf-uf bian anteni.)

¹⁰Leka uf Nai Ruben, Gad ma Manasye antom neno saen sin nem antia Gelilot — fe anbi neno tesan Noe Yordan — sin nahakeb baki tulu mese le anaek ma namas anhaumak Noe Yordan.

¹¹Ma atoni-atoni Israel bian sin nen lasi nane oke te sin nak, “Atoni uf Nai Ruben, Gad ma uf Manasye antom neno saen sin nahakeb nalali baki tulu mese anbi Gelilot anhaumak Noe Yordan anbi hit pah aon bian!” Es nane te sin nabuan ok-oke anbi Silo hen ken uf-uf Israel le anbi neno saen Noe Yordan nane.

¹³Oke te Nai Pinehas, Ana' Fuat Knino Nai Eleazer anmone, to Israel ansonu in neu uf Nai Ruben, Gad ma uf Manasye le anbi Gilead anbi neno saen Yordan.

¹⁴Nai Pinehas anfen ma anao nok anakaf bo'mese na'ko nonot Israel atoni mese na'ko uf mese anbi neno tesan Noe Yordan, mese-mese nane anakaf anbi sin uf.

¹⁵Sin nem antia bale uf Nai Ruben, Gad ma uf Manasye anbi pah Gilead.

¹⁶Oke te sin anfani on UISNENO In to ok-oke, sin nak neu atoni-atoni na'ko uf Nai Ruben, Gad ma uf Manasye nane nak, “Nansa' es hi mo'e lasi amle'ut i neu Uisneno Israel? Nok hi mihakeb hi baki tulu anmese, him laban UISNENO! Hi ka mituin amteni fa In plenat-plenat sin!

¹⁷Ai hi ka mimnau amteni fa hit sanat anbi Peor? Anbi tabu nane UISNENO ankas kit neki snama ma sletu mese, maski nak hit le In nonot kun! Talantia neno le i hit fe atsutai in amnekin le nane. Ai le nane fe ka noka fa amsa?

¹⁸Ma tabu le i, ai him lomi hem koti amteni UISNENO? Kalu neno le i him laban UISNENO, neno noka fa In of nato'an nonot Israel ok-oke.

¹⁹Leka hi pah le nane nalahi ma ka maota fa neu hen fani bale luli besa neu UISNENO, hi mitnani aim neu UISNENO In pah, le Um-ume UISNENO anbine. Amtoti hai pah pisa mese, mes kais him laban UISNENO ai him laban kai nok him amtao amteni baki tulu bian, fun natuin baki tulu hit UISNENO in esan nalalien.

²⁰Mimnau, Nai Akhan Nai Zerah anmone kan lomi fa he natuin UISNENO plenat antom ale bale le he nale'un nani sin, ma in amnekin nane sa ka? Nonot Israel ankas sin ok-oke! Le anmo'e sanat al Nai Akhan, mes le amates ka al fa in anmese!”

²¹Oke te atoni-atoni uf Nai Ruben, Gad ma Manasye antom neno saen sin natae nak,

²²“Le Akuasat Afin-finit nane UISNENO! Le Uisneno Akuasat Afin-finit nane UISNENO! In nahin neu nansa' hai mo'e lasi i, ma hai amlomi he nati' hi amsa mihin mani! Leka onle hai mo'e lasi nane nok tenab he haim laban UISNENO ai natuin hai ka miteb amteni fa neu In, namautu he hai mate nai anbi tabu le i amsa!

²³UISNENO In neki non kun ankas kai, leka hai mitenab hem laban UISNENO ma hai mihakeb kim hai baki tulu anmese kun he mitulu fua tulu mnotu ai fua tulu ane kase ai fua tulu halan nekaf anbi in fafon.

²⁴Hai tenab ka onfa nane. Hai bia ki al-al ki! Hai mihakeb baki tulu nane, natuin hai mimtau anbi neno namuni te hi sufam of nak neu hai sufam, nak, ‘Hi ka mu'i fa malutas sa'-sa' nok UISNENO, Israel sin Uisneno!

²⁵Amkiso, In antao Noe Yordan i on nakat anbi hit atnanak nane hen bati kai nok ki atoni Nai Ruben ma Nai Gad. Namneo hi ka mu'i fa malutas sa'-sa' nok UISNENO.’ Of sa' ka es anbol anbi tabu nane? Ma of hi sufam anmo'e hai sufam nasnas na'ko naluli nabes neu UISNENO.

²⁶Es nane te, hai mihakeb baki tulu, ka neu fa fua tulu mnotu ai neu ale hai fua tulu sin,

²⁷mes han fani atakaf ma saksit neu kit anbi kai ma hi, ma neu hit sufken anbi neno amunit, nak namneo hai le i miluli ma mibes neu UISNENO anbi Um-ume Saksit nok hai meki fua tulu mnotu, ale fua tulu ma fua tulu halan nekaf. Nok nane te hi sufam of ka na'uab fa nak hai sufam kan mu'i fa malutas sa'-sa' nok UISNENO.

²⁸Es nane te, hai tenab esle': leka onle hi sufam na'uab onane, onane te hai sufam nabe'i na'uab nak, ‘Amkiso baki tulu nane! Hai ama sin nahakeb baki tulu mese le papmese nok baki tulu UISNENO, ka neu fa fua tulu mnotu ai neu ale fua tulu, mes hen fani atakaf neu kit aon biah am bian.’

²⁹Miteb nai, hai kam lomi fa hem laban UISNENO ai he misnas na'ko am aetnom meu In nok mihakeb baki tulu bian anteni neu fua tulu mnotu ai fua tulu ane kase ai fua tulu bian, mes baki tulu hit UISNENO in esan nalalien anbi Um-ume Saksit UISNENO matan.”

³⁰Ale uab molok le atoni-atoni na'ko uf Nai Ruben, Gad ma uf Manasye antom neno saen naton nalali onane te Ana' Fuat Knino Nai Pinehas in nen nani nok ale anakaf bo'mese na'ko nonot Israel antom neno tesan Noe Yordan. Ma sin amsa anmalin nok uab molok nane.

³¹Oke te Nai Pinehas, Ana' Fuat Knino Nai Eleazar anmone, nak neu atoni-atoni uf Ruben, Gad ma uf Manasye antom neno saen nak, “Tabu le i hai mihin UISNENO nok kit, natuin hi kam laban fa In. Hi mifetin milali nonot Israel na'ko kasat UISNENO.”

³²Oke onane te Nai Pinehas nok ale anakaf Israel nane sin anfen ma anao anfani. Sin nasaitan atoni-atoni Ruben ma Gad anbi Gilead, oke te sin anfani neu Kanaan, ma sin naiaba lasi nane neu nonot Israel.

³³Es nane te to Israel sin amsa anmalin nok lasi nane, talantia sin anpules ma naliatas Uisneno. Sin ka na'uab anteni fa neu sin tenab hen ken atoni-atoni Ruben, ma Gad, ma he nale'un sin pah.

³⁴Amsoput te uf Ruben ma Gad nane sin na'uab nak, “Baki tulu i anfani saksit neu kit al-al kit nak UISNENO nane in Uisneno kun.” Es nane te sin nakanab baki tulu nane nak “Saksi”.