Read Uab Meto YOSUA 23 Bible Online

YOSUA 23 - Uab Meto bible

YOSUA 23

¹A'lo leka UISNENO anfe lasi tainine neu nonot Israel; ale musu ka noki fa sin anteni. Anbi tabu nane Nai Yosua in namnasi nalali.

²Oke te in no'en to Israel ok-oke, ale amnasit sin, ale anakaf sin, ale alef lasi sin, ma ale meo pa'e, ana' in nak neu sin nak, “Au umnasien.

³Hi mit milali ale sa' le UISNENO anmo'e neu ale uf anbi pah i neu ki. Le an pes nok ki nane hi UISNENO kun.

⁴Uf-uf sin pah le fe namaika esan, onane amsa ale uf-uf sin pah le au is ma be'u ulali nane pah le na'ko neno saen Noe Yordan anao piut neu neno tesan Tasi Tnana, ale nane ok-oke au bati ulali neu ki hen fani hi in-ini kun.

⁵Hi UISNENO of antao ma anmo'e neso naskotun uf-uf nane, ma sin naen na'ko hi humam hi matam leka him nao hem ken sin. Hi of misik man sin pah, onle hi UISNENO anba'an nalali neu ki.

⁶Es nane te, ampanat he nati' hi mituin ma minaoba ale sa' le matui anbi Sulat Plenat Knino Nai Musa. Kais him tanhai plenat mese amsa na'ko ale plenat-plenat nane.

⁷Nok nane te hi of ka maselo fa mok uf-uf le fe namaika nok ki anbi hi atnanam. Hi of kam tek fa sin uisneno teta kanan ai him sup meki kanaf nane. Onane amsa hi of ka miusi fa ai ka mibes fa neu ale uisneno teta nane.

⁸Hi mes mi'ki piut neu UISNENO, onle him tao ma mo'e antia neno i.

⁹Uf-uf anaet ma abe'it UISNENO anli'u nalali sin neu ki; katit fa atoni mese amsa na'ko sin le nabe'i hen hake na'ki hen laban ki.

¹⁰Atoni mese anbi ki nabe'i in nis ma anbe'u atoni nifun-nifun, natuin hi UISNENO In es neki non kun anmaken anseka ki, onle In anba'an nalali.

¹¹Es nane te, nati' mimnau hem nek mimnau hi UISNENO.

¹²Leka hi ka mi'ki fa ma hi maselo mok uf-uf le fe namaika anbi hi atnanam, ma hi mafe ma mamone mok sin,

¹³mimnau, mes hi UISNENO In of kan li'u fa uf-uf nane neu ki. Onane te sin of neki amle'ut anae le'uf neu ki, natuin sin of anfani kle'o ai abekut neu ki. Sin amsa of anmo'e ki talantia hi misusbom anae le'uf; natuin sin of anfani uel neu hi hanum ai on kasunat ma katila anbi hi matam nanan. Hi of misusbom piut talantia katit fa es na'ko ki he namaika nabala anbi pah alekot i le hi UISNENO anfe nalali neu ki.

¹⁴Tabu antia neu au he mate. Hi al-al ki oke, mese-mese hi mihin lek-leko nak hi UISNENO anfe nalali ki ale sa' alekot le In anba'an nalali. Ale In kasi manba'an In nanokab nalali, katit fa esle' In ka nanokab fa.

¹⁵Mes onle In nanokab nalali In lasi manba'an neu ki, onane amsa In mes nanaoba ale In salit neu ki.

¹⁶Leka him tanhai lasi manba'an le hi UISNENO naplenat nalali neu ki he nati' hi mituin, ma leka hi amnao he miusi uisneno teta ma mibes neu uisneno teta nane, onane te UISNENO of nato'an ki, ma ankas ki. Anbi tabu le ka lo fa hi al-al ki of mimneku na'ko pah alekot i, le UISNENO anfe nalali neu ki.”