Read Uab Meto YOSUA 24 Bible Online

YOSUA 24 - Uab Meto bible

YOSUA 24

¹Nai Yosua in nibun nabuab ale uf nonot Israel anbi Sikhem, oke te anlenu ale amnasit, ale anakaf, ale alef lasi, ma ale meo pa'e he nati' sin nem. Oke te sin nem anhake anbi Uisneno In human In matan.

²Nalali te Nai Yosua nak neu sin ok-oke nak, “Amnen nai sa' le UISNENO, Israel sin Uisneno nakua a'an neu ki nak, ‘Afi ahun-hunut hi ama sin natua anbi Noe Efrat aon bian, ma sin naluli nabes neu uisneno teta. Es na'ko sin in kanan Nai Terah, Nai Abraham amaf ma Nai Nahor amaf.

³Oke te Au o'en Nai Abraham, hi amaf nane, na'ko pah anbi Noe Efrat aon bian nane, ma Au lenu in anao anfun natef pah Kanaan nane ok-oke. Au fe neu sin sufa ka'uf namfau. Ahun-hunut nane Au fe Nai Isakh neune,

⁴oke te neu Nai Isakh Au fe neune anah nua, es Nai Yakub ma es Nai Esau. Ma au fe neu Nai Esau neten Edom anfani in pah, mes Nai Yakub hi amaf nane, in natnani neu Mesir, nok in anah sin ok-oke.

⁵Namuni te Au sonu Nai Musa ma Nai Harun, ma Au usanut snama ma sletu anaek neu Mesir oke te Au upoitan ki na'ko nane.

⁶Au eki hi ama sin anpoi na'ko Mesir, oke te atoni Mesir anli'u sin neki aklet makenat ma to meo le ansae bikase. Ma leka hi amaf sin nem antia Tasi Gelagah,

⁷sin anbai neu Kau antoti he Au bab sin. Onane te anbi bale hi amaf sin nok bale atoni Mesir Au mo'e anfani mesokan, ma Au kub atoni-atoni Mesir nane nok oe tasi talantia sin anlem ok-oke. Hi mihin milali ok-oke sa' le Au tao ma mo'e ulali neu Mesir. Hi mitua a'lo le'uf anbi mnela snaen.

⁸Oke te Au eki ki neu atoni Amori sin pah le sin natua anbi neno saen Noe Yordan. Sin anken ki, mes Au mo'e ki ma hi mis anbi makenat. Hi misik man sin pah, ma Au ule'un sin.

⁹Oke te kesel Moab, es Nai Balak Nai Zipor anmone anlaban ki. In ansonu haef neu Nai Bileam Nai Beor anmone ma antoti he nat Nai Bileam ansukat ki.

¹⁰Mes Au ka utuin fa Nai Bileam in a'lomin, onane te in anfe tetus neu ki. Onle nane Au ufetin ki na'ko Nai Balak.

¹¹Namuni te him lak Noe Yordan, ma hi aim amtia Yerikho. Atoni-atoni Yerikho sin anken ki, onane Amsa atoni Amori, atoni Feris, Kanaan, Het, Girgasi, Hewi ma atoni Yebus. Mes Au fe neu ki lasi mnisat neu sin ok-oke.

¹²Anbi tabu him nao mat hem ken sin, Au mo'e sin nekan anfani namneku ma namtau, talantia kesel Amori nua en nane sin naen na'ko ki. Ka hi suni fa ma ka hi auni fa es anmo'e ki ma hi mis ma ambe'u.

¹³Pah le Au fe neu ki, him simo ma mipeni ka nok fa susal ma haet. Ma kot-kot le Au fe neu ki hi ka es mihakeb fa. Mes muni i hi esle' mitua ambi nane, ma hi amsa es amnaben tua min kase in fuan ma bub fua mina in fuan, mes hi es kam sen fa sin.’ ”

¹⁴“Es nane te, tabu le i,” Nai Yosua in na'uab ankono nak, “mimtausan UISNENO nai. Am aetnom nai meu In nok nek amneot ma amnonot ma nok nek aki'at. Ampolin nai ale uisneno teta le afi hi amaf sin anbi ahunut sin naluli ma nabes neune anbi Mesopotamia ma anbi Mesir. Am aetnom al neu UISNENO.

¹⁵Leka hi kam lomi fa hem aetnom neu UISNENO, him beti nai anbi neno i amsa him lomi nai hem aetnom neu sekau: neu uisneno teta bian le hi amaf sin nausi neu sin anbi Mesopotamia ai neu uisneno teta atoni Amori le hi mitua sin pah anbi neno i. Mes hai — au ma au ume nanan sin — hai al of am aetnom neu UISNENO.”

¹⁶Onane te nonot Israel sin natae nak, “Hai of ka misaitan fa UISNENO hem aetnom neu uisneno teta bian!

¹⁷Hit UISNENO In es neki non nafetin hit amaf sin ma hit amsa na'ko lasi aten anbi Mesir. Hit tit talali ale lasi sanmakat le UISNENO anmo'e nalali. UISNENO In naneo ma nahafo kit piut anbi hit lanan, ma hit atfini ma atkono pah uf-uf sin atnankenu.

¹⁸Ma leka hit atam pah i, UISNENO anli'u ale atoni Amori le sin natua anbi i. Es nane te, haim lomi aetnom neu UISNENO, natuin In le nane hit Uisneno kun!”

¹⁹Oke te Nai Yosua nak, “Mes hi oni of ka mibe'i fa hem aetnom neu UISNENO, natuin In Uisneno knino kun, Le In Mese kun. In kan lomi fa he es nanes'on nokan. Leka hi misaitan In ma miusi neu uisneno teta bian, In of kan sako fa hi sanat sin. Ma mes, In of anlaban ki ma ankas ki. In of nale'un ki, maski afi ahunut In leko kun neu ki.”

²¹Es nane te atoni-atoni Israel nane sin natae nak, “Kahaf! Hai of ka miusi fa neu uisneno teta bian. Hai of am aetnom al neu UISNENO!”

²²Oke te Nai Yosua nak, “Esnanete him fani kim saksi nak hi mifek milali he nati' him aetnom al kun neu UISNENO.” “Namneo,” sin natae onane nak, “haim fani kim saksi neu hai aom an mes.”

²³“Kalu onane, ampolin nae ale uisneno teta uf-uf bian le anbi ki nane,” Nai Yosua nak neu sin, “ma amanba'an mak hi of mi'ki neu UISNENO, Israel sin Uisneno!”

²⁴Oke te atoni-atoni nane sin nak neu Nai Yosua nak, “Hai of am aetnom al neu UISNENO, hit Uisneno. Hai of mituin ale In plenat-plenat sin.”

²⁵Anbi neno nane Nai Yosua anmo'e fef bela nok to Israel anbi Sikhem; ma anbi nane in anfe neu sin ale plenat ma ale lekat lulut le mes sin he natuin nani.

²⁶Ale plenat ma lekat lulut nane in antui nani sin anbi Sulat Plenat Uisneno. Nalali te in naiti fatu naek mese, oke te In nahakeb nani anbi hau naek in mafon anbi bale le anbeti natetab nani neu UISNENO.

²⁷Nalali onane te Nai Yosua nak neu ale atoni nane ok-oke nak, “Fatu i anfani on saksi neu kit. Ale a'an le UISNENO nakua nani neu kit, In nakua nalali anbi fatu i in matan. Es nane te, fatu i in es anfani saksi neu ki, he namnauba ki he nati' kais him laban Uisneno.”

²⁸Nalali te Nai Yosua anlenu atoni-atoni nane sin anfani; oke te sin anfani neu sin mese-mese sin ini kun.

²⁹Namuni te Nai Yosua Nai Nun anmone UISNENO In ate nane, anmate anbi in uan ton natun mese bo'mese.

³⁰Ma ansub anbi in pah anbi Timnat-Serah anbi Efraim aon bian a'li Tubu Gaas.

³¹Leka fe Nai Yosua fe anmoni, nonot Israel an aetnon neu UISNENO. Ma leka Nai Yosua anmate nalali amsa sin fe an aetnon nabala neu UISNENO le anbi sin fe anmu'i nakaf-nakaf le sin nit nalali ale sa' le UISNENO anmo'e neu to Israel.

³²Fun Nai Yusuf in nuifen le nonot Israel neki sin na'ko Mesir, ansub nani anbi Sikhem anbi pah le Nai Yakub ansos nalali neki noni muti upan natun mese, na'ko Nai Hemor in anmone sin, Nai Sikhem amaf. Pah nane anfani Nai Yusuf sufan sin in-ini kun.

³³Oke te Nai Eleazar Nai Harun anmone anmate amsa, ma ansub nani anbi Gibea, kot le anbi neten Efraim. Kot nane anfe nalali neu Nai Pinehas, Nai Eleazar anmone.