Read Uab Meto YOSUA 3 Bible Online

YOSUA 3 - Uab Meto bible

YOSUA 3

¹Noka fa onane te, Nai Yosua ma to Israel ok-oke sin anfen anbi nok-nok ana, oke te sin nasaitan sin bale um-ume anbi Sitim, ma sin anao neu Noe Yordan. Anbi nane sin nahakeb sin um-ume ma sin anpao Sin tabu he sin anlak noe nane.

²Leka neno tenu namsopu te, ale anakaf sin anfun natef um-ume ok-oke,

³ma anfe plenat i neu to Israel nak, “Leka hi mit ale Ana' fuat knino sin anloi Peti Fef Bela UISNENO, so nati' hi amsa amfen misaitan bale um-ume snasat i. Mituin Peti nane,

⁴mes kais amhaumak mis Peti nane; mituin na'ko koti mi'lo na'ko Peti nane kilo mese. Nok nane te hi of mihin lanan me es le mes hi hem nao mituin, natuin hi fe kam mit fa neu pah i.”

⁵Nai Yosua nak neu to Israel nak, “So nati' hi miknino hi aom nai, natuin na'ko noka fa UISNENO of antao ma anmo'e sanmakat anbi sonam hi atnanam.”

⁶Oke te Nai Yosua anfe plenat neu ale Ana' fuat knino he nati' sin naiti Peti Fef Bela nane oke te sin anao nahunun to Israel. Sin amsa antao natuin Nai Yosua in aplenat.

⁷UISNENO nakua a'an neu Nai Yosua nak, “Anbi neno i Au of amoe ko amfani atoni anaet talantia to Israel ok-oke sin natola ko ma nahin nak Au ok ko on afi Au ok Nai Musa.

⁸Es nane te amlenu ala Ana' fuat knino le anloi Peti Fef Bela nane he nati' leka sin antia anbi noe, sin antam anbi noe nane ma anhake anhaumak noe in ninen.”

⁹Oke te Nai Yosua no'en ale atoni-atoni Israel, ma nak neu sin nak, “Aim hem nen sa' le UISNENO naplenat nani neu ki.

¹⁰Leka sin anao mat hen maken, UISNENO mes anli'u atoni Kanaan, Het, Hewi, Feris, Girgasi, Amori ma Yebus. Ma anbi tabu Peti Fef Bela UISNENO ameput neno tunan ma pah pinan anlak Noe Yordan nahunun ki, of hi mit nak Uisneno amonit In anbi hi sonam hi atnanam.

¹²Es nane te him beti nai atoni bo'es am nua atoni — mese na'ko uf Israel mese-mese.

¹³Leka ale Ana' fuat knino le anloi Peti Fef Bela UISNENO sin anhalin sin haeken anbi oe Noe Yordan in nanan, oe in a'sain of natfek; oe le ansai na'ko noe anakan of anhake an ekton kun anbi bale mese.”

¹⁴Tabu nane fe tabu abul amnahat, ma onle nane te oe Noe Yordan ansae kun nok matani. Leka atoni Israel nasaitan sin um-ume hen lak Noe Yordan, ale Ana' fuat knino sin anao nahunun sin neki Peti Fef Bela. Ma anbi tabu ale Ana' fuat knino nane sin anhalin sin haeken neu oe noe nane in nanan,

¹⁶anbi tabu nane amsa noe nane in a'sain natfek. Anbi noe in anakan, oe in nabua'on kun anbi Adam, kot mese le anbi kot Sartan aon bian. Ma oe anbi noe haen le ansai neu Tasi Maten natfek ok-oke, talantia to Israel sin anlak anao nok nain le anmeto anmabaina nok kot Yerikho. Ale Ana' fuat knino le anloi Peti Fef Bela nane sin anhake nabala anbi noe atnanan talantia to Israel ok-oke anlak antia noe aon bian.