Read Uab Meto YOSUA 4 Bible Online

YOSUA 4 - Uab Meto bible

YOSUA 4

¹Leka to Israel ok-oke sin anlak antia nalali noe aon bian, UISNENO nakua a'an neu Nai Yosua nak,

²“Ambeti nai atoni bo'es am nua, es na'ko uf mese-mese.

³Amlenu sin he nati' fatu bo'es am nua na'ko Noe Yordan atnanan, na'ko bale le ale Ana' fuat knino sin anhake. Amlenu sin anloi fatu-fatu nane antia bale hi mihakeb um-ume anbi fai i.”

⁴Es nane te Nai Yosua no'en atoni bo'es am nua le anbeti nalali sin nane,

⁵oke te in nak neu sin nak, “Amnao nau meu Noe Yordan atnanan, neu Peti Fef Bela UISNENO matan. Mese-mese mes maiti fatu mese na'ko nane — ok-oke fatu bo'es am nua matom nok uf-uf anbi nonot Israel.

⁶Fatu-fatu nane of namnauba nonot i neu sa' le UISNENO anmo'e nalali. Anbi neno namuni leka hi anah sin natoti neu fatu-fatu i sin otan sa' neu ki,

⁷so nati' hi mitonan sin mak oe Noe Yordan natfek leka Peti Fef Bela UISNENO neki ma anlak noe nane. Fatu-fatu nane of namnauba nonot Israel piut-piut neu sa' le anbol anbi i.”

⁸Atoni bo'es am nua nane amsa anmo'e natuin plenat Nai Yosua. Matom nok UISNENO In a'an neu Nai Yosua, sin naiti fatu bo'es am nua na'ko Yordan atnanan — amfaun anmatom nok uf-uf anbi nonot Israel — sin amfaun.

⁹Anbi Yordan atnanan amsa, Nai Yosua nahakeb fatu bo'es am nua anbi bale ale Ana' fuat knino sin anhake anbine le sin anloi Peti Fef Bela nane. (Fatu-fatu nane fe esan talantia neno lei.)

¹⁰Ale Ana' fuat knino sin anhake nabala anbi Yordan atnanan talantia ale atoni-atoni nane anmepu nalali ale sa' le UISNENO naplenat nani neu sin nao nok Nai Yosua. Nane anmatom nok lekat lulut le afi Nai Musa anlek nani neu Nai Yosua. Nok lab-lab to Israel sin anlak Noe Yordan.

¹¹Leka to nane ok-oke anlak nalali ma antia noe aon bian, ale Ana' fuat knino le anloi Peti Fef Bela nane sin anao nahunun anbi to matan.

¹²Matom nok sa' le Nai Musa ale to meo na'ko uf Nai Ruben, Nai Gad ma Nai Manasye aon bian, sin anlak nahunu noe nane.

¹³Sin ok-oke atoni 40.000 le anpake aikan ma nabalab neu hen maken. Anbi UISNENO In human In matan, sin anlak neu mnela akloput anhaumak Yerikho.

¹⁴Anbi neno nane UISNENO antao ma anmo'e ale lasi le anmo'e to Israel nanaeb Nai Yosua on atoni anaet. Anbi in monin ok-oke sin nanaeb in on afi sin nanaeb Nai Musa.

¹⁵Nalali te UISNENO anlenu Nai Yosua

¹⁶naplenat ale Ana' fuat knino le anloi Peti Fef Bela nane he nati' sin anpoi na'ko Yordan.

¹⁷Nai Yosua antao natuin ale sa' le UISNENO naplenat nani neu in.

¹⁸Leka ale Ana' fuat knino nane sin nem antia noe in ninen oe noe nane ansai anfani ma ansai onle ahunut.

¹⁹To Israel sin nem antia Noe Yordan aon bian anbi neno bo' mese funan ahunut, ma sin nahakeb sin um-ume anbi Gilgal neno saen Yerikho.

²⁰Anbi bale nane Nai Yosua nahakeb fatu bo'es am nua le naiti sin na'ko Yordan atnanan.

²¹Oke te Nai Yosua nak neu to Israel nak, “Leka anbi neno namu ale hi anah-anah sin natoti ki neu fatu-fatu le i sin otan,

²²hi mitonan sin mak to Israel anlak Noe Yordan i sin anao nok nain ametos.

²³Hi minu'un sin mak UISNENO na'meti oe Noe Yordan nane neu ki talantia hi al-al ki amtia noe aon bian, onle afi In na'meti Tasi Gelagah neu kai,

²⁴he nati' ale atoni anbi pah pinan ok-oke sin nahin neu UISNENO In kuasat lo matain le'uf kun. Ma nok nane te hi of miliatas hi UISNENO talantia nabal-bal.”