Read Uab Meto YOSUA 5 Bible Online

YOSUA 5 - Uab Meto bible

YOSUA 5

¹Ale kesel Amori anbi Noe Yordan aon bian a'li, ma ale Kesel Kanaan anbi Tasi Tnana ninen sin a ne nak UISNENO na'meti nalali Noe Yordan leka to Israel anlak noe nane. Es nane te sin namtau ma anlilitai natuin atoni Israel.

²Anbi tabu nane UISNENO nakua a'an neu Nai Yosua nak, “Amoe besi na'ko fatu, oke te amoe lasi ataka hapit ma helit neu atoni na'ko Israel.”

³Onane te Nai Yosua antao natuin plenat UISNENO, ma anhapi ma anheli atoni-atoni Israel anbi bale le nakanab nak Tubu Hapit ma helit.

⁴Anbi tabu atoni-atoni Israel anpoi na'ko Mesir, ale naimone sin anhapi ma anheli nalali sin. Mes leka sin anao anfun natef mnela snaen ton bo'ha in a'lon, sin anmone sin mese amsa katit fa le hen hapi ma hen heli sin. Ma leka ton bo'ha namsopu onane te, ale naimone le leka anpoi na'ko Mesir sin ton antia hen taum solalus, sin al-al sin anmate nalali, natuin sin ka natuin fa UISNENO In aplenat. Es nane te anmatom nok han supat UISNENO, ka nafetin fa sin he nit pah maafa ma alekot nane le In anba'an nalali neu sin amfenu.

⁷Es nane te ale sin anmone sin kan hapi ma kan heli fa sin. Sin anmone muni sin le i es Nai Yosua anhapi ma anheli sin.

⁸Leka anhapi ma anheli nalali sin, sin natua anbi sin um-ume talantia sin papa' naleko.

⁹UISNENO nakua a'an neu Nai Yosua nak, “Neno le i Au uneku ulali hi lasi abaut on ate-ate anbi Mesir.” Es nane te nakanab bale nane nak Gilgal talantia neno i.

¹⁰Leka fe sin nasnasan anbi Gilgal anbi mnela anhaumak Yerikho, to Israel sin naliatas Paskah anbi neno anmabe neno bo'es am ha anbi funan nane.

¹¹Noka fa onane te, on anbi hae ahunut sin anbukae mnahat pah Kanaan in afan, esle': Utunu' ka nok fa lalu haef ma ane kase le anse'i.

¹²Anbi neno nane amsa manna kan sanu anteni fa na'ko neno tunan, ma atoni Israel sin nasnas na'ko anbukae manna. Naubon na'ko tabu nane sin anbukae pah Kanaan in afan.

¹³Anbi hae mese Nai Yosua anhaumak Yerikho. Nok askeken in nit atoni mese anhake anbi in human nok suni mahosu anbi in niman. Nai Yosua anhaumak atoni nane, ma natoti nak, “Ho le i hai soba ka, ai hai musu?”

¹⁴“Ka hi soba fa, ma ka hi musu fa amsa,” atoni nane natae onane. “Au aum eu bale i on UISNENO In to meo nakaf.” Leka Nai Yosua in nen onane nok manoe in naluli ma nabes neu atoni nane. Nai Yosua nak, “Au le i Usi ho ate es kau. Nabe'i au mo'e sa' ka neu au Usi?”

¹⁵UISNENO In to meo nakaf nane natae nak, “Mupoitan ho penhaef na'ko ho haem; natuin nain bale hom hake ambine nane bale knino kun.” Ma Nai Yosua napoitan in apeni haef na'ko in haen.