Read Uab Meto YOSUA 6 Bible Online

YOSUA 6 - Uab Meto bible

YOSUA 6

¹Anbi kot Yerikho in eno-eno naek sin anpanat nahelan sin nok nok matani ma an ek namate sin ok-oke he nati' atoni Israel ka nabe'i fa hen tam. Ka nafetin fa atoni mese amsa hen tam ai hen poi na'ko kot nane.

²UISNENO nakua a'an neu Nai Yosua nak, “Anbi tabu le i Au una'at Yerikho neu ko nok in kesel ma ale in solalus abe'it ma matani sin le nane.

³Ho mok ho solalus sin mes amnao maakatuin amfun kot nane hae mese neno mese anbi neno ne in a'lon.

⁴Ana' fuat knino hitu, mese-mese neki to'is, mes anao nahunun Peti Fef Bela. Ma anbi neno hitu, ho ma ho solalus sin mes amfun kot nane haef hitu fun ale Ana' fuat knino sin anfu sin to'is.

⁵Namuni te ale Ana' fuat knino nane mes anfu sin to'is nok hanan amnanu. Leka him nen to'is hanan amnanu nane, ale solalus sin mes naba' nok hanan anaek, onane te of baki lape nane nathono ma natkua. Oke te hi al-al ki mes amtam nai meu kot nane in nanan.”

⁶Es nane te Nai Yosua no'en ale Ana' fuat knino, ma nak neu sin nak, “Maiti Peti Fef Bela nane nai; atoni hitu na'ko ki mes anao nahunun Peti Fef Bela nane ma sin neki to'is.”

⁷Oke te Nai Yosua anlenu in solalus sin anao maakatuin anfun natef kot nane, ma solalus ana' aikan apao mat sin anao nahunun Peti Fef Bela UISNENO.

⁸Matom nok Nai Yosua in aplenat, onane te ana' aikan sin anao nahunun ale Ana' fuat knino afu to'is, ma Ana' fuat knino le sin anloi Peti Fef Bela sin natuin, nalali ana' aikan apao koti sin natuin neki amsopun. Leka sin fe anao onane te, sin anfu to'is nane piut-piut.

¹⁰Anfe nalali plenat neu solalus sin he nati' ka nabe'i fa he naba' ma ka nabe'i fa he na'uab sa'-sa' amsa leka Nai Yosua fe kan fe fa ataka sa'-sa'.

¹¹Onle nane Nai Yosua anlenu in solalus sin neki Peti Fef Bela anfun natef kot nane haef mese, nalali te sin anfani neu sin um-ume, ma sin antup anbi nane.

¹²Ma noka fa, fe nok-nok ana, Nai Yosua anfen oke te haef nua anteni ale Ana' fuat knino ma solalus sin maakatuin anfun natef kot nane sin maakatuin onle neno ahunut: ahunut nane esle' ana' aikan apao mat sin nahunun, nalali te Ana' fuat knino afu to'is, oke te Ana' fuat knino aloi Peti Fef Bela sin natuin. Ma leka sin fe anao onane te anfu to'is nane hanan piut-piut.

¹⁴Anbi neno nua nane sin anfun natef kot nane haef mese nalali te sin anfani neu sin um-ume. Onle nane sin anmo'e neno-neno anbi neno ne in a'lon.

¹⁵Anbi neno hitu sin anfen nok-noka leka neno fe anmeusab, oke te sin maakatuin haef hitu anfun natef kot Yerikho nane papmese onle neno-neno ahunut. Al anbi neno hitu nane, sin anfun natef kot nane haef hitu.

¹⁶Anbi hae hitu nane, leka ale Ana' fuat knino fe anfu sin to'is, Nai Yosua anfe ataka neu ale solalus ok-oke he nati' sin naba'. Nai Yosua nak, “UISNENO anfe nalali ki kot i neu ki!

¹⁷Ale kot ok-oke nok ale in nesan ok-oke mes hi mile'un mani ok-oke on fua tulu neu UISNENO. Al bi Rahab, bife amapaisa nane nok in ume nanan sin nabe'i mifetin sin hen moni, natuin in anbab nalali hit atoni atnu'us sin.

¹⁸Ka nabe'i fa hi maiti sa'-sa' es amsa na'ko ale sa'-sa' le mes hi mile'un. Leka hi maiti sa'-sa', snama ma sletu of nem neu um-ume Israel.

¹⁹Ale bale noni muti, noni mnatu, noni molo, ma besi mes ambeti miteta mani neu UISNENO, ma mibela sin anbi bale bela amaus UISNENO in-ini.”

²⁰Oke te ale Ana' fuat knino anfu sin to'is. Ma leka ale atoni-atoni Israel sin nen to'is nane hanan, sin naba' nahel-hel neki a'baf anaek, oke te baki lape kot Yerikho natsel. Solalus Israel ok-oke sin ansae, ma antam neu kot nane oke te sin nasik nani.

²¹Ale abiten kot nane in nanan, amnasi ma munif, atoni ma bife, sin namate sin ok-oke neki suni. Ale mu'it bijae, bibi kase ma bikase luke mnanu sin namate sin ok-oke.

²²Ma neu atoni nua en le anfani atnu'us nane, Nai Yosua nak, “Amnao nai meu ume bife amapaisa nane ma meki in anpoi nok ale in ume nanan sin onle him ba'an milali neu in.”

²³Ma atoni nua en atnu'us nane sin anao, ma neki bi Rahab anpoi nok in amaf in ainaf, in biaf in benuf sin, ma in ume nanan sin bian anteni. Bi Rahab nok in ume nanan sin ok-oke ma ale in ate sin ok-oke neki sin anpoi neu bale tainine anhaumak um-ume Israel.

²⁴Nalali te solalus Israel sin notu nani kot nane ok-oke nok ale sa'-sa' ok-oke le anbi kot nane in nanan, alkun blua mnatu, noni muti, noni molo ma besi. Ale blua nane sin naiti sin ma neki sin neu bale bela amaus UISNENO in-ini.

²⁵Mes bi Rahab bife amapaisa nane nok ale in ume nanan sin ok-oke Nai Yosua nafetin sin anmoni, natuin in natolo' atoni atnu'us le Nai Yosua ansonu sin neu Yerikho. (Talantia neno i bi Rahab in sufan fe esan anbi Israel.)

²⁶Anbi tabu nane Nai Yosua napoitan lasi talas i nak, “Sekau am sekau amsa le nahelnon he nahakeb nafani kot Yerikho i, in of antom kasat UISNENO. Sekau es nabela baki lape in sukin in of naneku in anmone unu; ma sekau es nahaken in eno-eno naek sin in of naneku in anmone muni.”

²⁷UISNENO nok Nai Yosua, ma Nai Yosua in kanan mateka anfun natef pah nane.