Read Uab Meto YOSUA 7 Bible Online

YOSUA 7 - Uab Meto bible

YOSUA 7

¹UISNENO anfe nalali plenat neu to Israel nak na'ko ale blua sa'-sa' anbi kot Yerikho le mes he nale'un nani, blua sa' es amsa ka nabe'i fa he sin naiti. Mes plenat nane sin ka natuin nani fa. Atoni mese kanan Nai Akhan antanhai plenat nane, talantia UISNENO nato' anae le'uf neu to Israel. (Nai Akhan amaf kanan Nai Karmi ma na'if kanan Nai Zabdi na'ko ume Nai Zerah na'ko uf Yehuda.)

²Anbi tabu nane Nai Yosua anlenu atoni fauk-fauk na'ko Yerikho anao neu Ai, kot mese anbi Betel aon neno saen anhaumak Bet-Awen. Atoni-atoni nane anlenu sin anao he natnu' pah nane. Leka sin nanaoba nalali mepu nane,

³sin anfani ma natiaba lasi neu Nai Yosua. Sin nak, “Ka nabe'i fa hit al-al kit oke atnao he tape' Ai. Al hit atsonu oni atoni nifun nua ai nifun tenu. Kais atsonu solalus ok-oke neu bale nane he sin anmaken, natuin kot nane kot ana'-ana'.”

⁴Es nane te anaot le he nape' kot nane al atoni nifun tenu, mes atoni Ai anbe'i sin ma anli'u sin.

⁵Atoni-atoni Ai anli'u sin na'ko kot Ai in eno naek talantia bale mato'ik, oke te namate atoni oni bo'tenu am ne na'ko sin anbi tubu bnapan aisanut. Onane te atoni-atoni Israel sin nekan namnoe ma namtau.

⁶Nai Yosua ma ale amnasit-amnasit to Israel sin nekan antu' anae le'uf talantia sin anpisu sin bale pake, ma neno mese a'lon na'ko nok-noka talantia neno anfai sin naluli nabes anbi Peti Fef Bela UISNENO matan ma antao afu anbi sin anakan anfani ataka nak sin nekan antu'.

⁷Nai Yosua nak neu UISNENO nak, “Koi au UISNENO! Neu sa' es Ho meki kai aim amtia Yordan in aon bian i? Ai he muna'at kai neu atoni-atoni Amori? He nati' sin namate kai ka? Leka nesi hai mibala anbi nane, anbi Yordan in aon bian!

⁸Koi UISNENO! Musu anli'u nalali atoni-atoni Israel. Es nane te au he ak sa' ka?

⁹Atoni Kanaan ma ale atoni bian anbi pah i of sin a nen neu lasi nane. Sin of anisu nan kai ma namate kai ok-oke! Oke te of Ho he mo'e sa' ka he nati' Hom panat Ho kanam apinat nane?”

¹⁰Oke te UISNENO natae Nai Yosua nak, “Amfen nai! Kan mu'i in otan ho mululi ma mubes nok ambentom onane anbi nain!

¹¹Atoni Israel sin anmo'e nalali sanat. Au fe ulali Au plenat he nati' sin natuin lasi manba'an anbi sin nok Kau, mes sin antanha nalali! Ale bale' le mes sin he nale'un sin naiti nalali. Sin nabak ma sin natolo' nani anbi ale sin bale' he nati' es kais nahin.

¹²Es nane te sin kan hake nabe'i fa hen laban musu sin. Ma musu anli'u sin natuin nasanut nalali kasat neu sin he nale'un sin. Au of ka ok ki fa anteni leka ale bale' le ka nabe'i hi maiti sin nane fe ka nale'un fa sin.

¹³Es nane te amfen nai, Yosua! Muknino to Israel nai ma amlenu sin he nabalab he naeku ma natef nok Kau. Amfe plenat neu sin he sin nabalab anbi noka fa, natuin Au UISNENO Israel of Au uton lasi i neu sin: ‘Hoi atoni-atoni Israel! Ale bale' le Au fe ulali plenat neu ki he mile'un sin, bale' nane bian fe nabala es ki. Nahun na'ko hi fe kam polin fa ale bale' nane, hi of kam hake mibe'i fa hem laban musu!’

¹⁴Es nane te, Yosua, muton nai neu sin mak anbi noka fa of antae ki uf mese-mese. Leka Au lek uf mese, ale nonot anbi uf nane mes sin anao mat nonot mese-mese. Ma leka Au lek nonot mese, ale ume nanan anbi nonot nane mes sin anao mat ume nanan mese-mese. Nalali te leka Au lek ume nanan mese, atoni mese-mese anbi ume nanan nane mes anao mat atoni mese-mese.

¹⁵Ma atoni le anlek in ma namneo in nabela ale bale le nakain sin nane mes notu nani sin ok-oke nok in ume nanan sin ok-oke ma ale sa' le sin amu'i; natuin in es antanhai lasi manba'an ma anmo'e lasi amle'ut anaek anbi nonot Israel sin atnanan.”

¹⁶Noka fa, fe nok-nok ana, Nai Yosua anlenu to Israel anfonat anao mat, uf mese-mese, ma antom neu uf Yehuda.

¹⁷Oke te Nai Yosua anlenu uf Yehuda anfonat anao mat, nonot mese-mese, ma antom neu nonot Nai Zerah. Nalali te anlenu nonot Nai Zerah anfonat anao mat, ume nanan mese-mese, ma antom neu ume nanan Nai Zabdi.

¹⁸Oke onane te Nai Yosua anlenu ume nanan Nai Zabdi anfonat anao mat, atoni mese-mese; ma antom neu Nai Akhan, Nai Karmi anmone, Nai Zabdi upuf.

¹⁹Nai Yosua nak neu Nai Akhan nak, “Au anah, am au ho sanat nai ma muton nok aknino anbi i anbi UISNENO, Israel sin Uisneno, sa' le hom tao ma mo'e mulali. Muton neu kau nai, ma kais ho mutolo'.”

²⁰“Namneo,” Nai Akhan natae onane, “Au mo'e ulali sanat neu UISNENO, Israel sin Uisneno. I sanat le au tao ma mo'e ulali:

²¹Anbi ale bale' le hit tasik tani, au kiso it sobalu bet kone le mas leok le'uf, na'ko Babilonia, onane amsa noni muti oni kilo nua, ma mnatu tuka mese in mafenan kilo batis mese ma manesi. Au sinmak anae le'uf neu ale bale' nane es nane te au aiti sin ma ma utolo' sin anbi nain anbi au um-ume; ma noni muti antom a'pin le'uf.”

²²Oke te Nai Yosua ansonu atoni anao lab-lab neu Nai Akhan in um-ume. Ma namneo ale bale' nane le antal nani sin nane al-al sin esan, natolo' sin anbi nain, ma noni muti antom a'pin le'uf.

²³Sin naiti ale bale' nane ma sin neki neu Nai Yosua ma neu atoni Israel ok-oke. Oke te sin antao ale bale' nane anbi UISNENO In human In matan.

²⁴Namuni te Nai Yosua nok ale to Israel ok-oke anheke Nai Akhan, ma neki in neu Nonof Susal nok ale in anah sin, in mu'it bijae sin, bikase luke mnanu, bibi kase, um-ume, ma ale sa'-sa' le in anmu'i ma ale in noni muti, sobalu bet kone ma mnatu le in nabak nani sin.

²⁵Oke te Nai Yosua nak neu Nai Akhan nak, “Nansa' ho meki susal neu kit? Es nane te UISNENO of neki nem neu ko susal!” Ma to Israel ok-oke anpali namate Nai Akhan nok in ume nanan neki fatu. In amaus ma bakan, notu nani sin ok-oke.

²⁶Ma nalali te sin nahakeb naukel fatu naek mese anbi bale nane ma fe esan talantia neno i. Es nane te bale nane fe nakanab nak Nonof Susal talantia neno i amsa. Nalali te UISNENO In to'as ansanu ma namne.