Read Uab Meto YOSUA 8 Bible Online

YOSUA 8 - Uab Meto bible

YOSUA 8

¹UISNENO nakua a'an neu Nai Yosua nak, “Amnibun ma mubuab ale ho solalus sin, ma amnao nai mok sin neu Ai. Kais ho nekam an ole ma kais ho mumtau! Au of a'fe neu ko lasi mnisat neu kesel Ai. Ale in to, ale in kot, ma in pah of ho musik mani.

²Ai ma in kesel of hom tao ma mo'e sin on afi hom tao ma mo'e Yerikho ma in kesel. Mes hae le i ale in bale' sin ma ale in mu'it sin nabe'i hi maiti sin anfani hi ini. Miloitan ma mibalab nai he mipe' kot nane nok askeken na'ko koti.”

³Onane te Nai Yosua in naloitan ma nabalab he nao neu Ai nok ale in solalus sin. In anbeti amakenat alekot atoni 30.000, oke te in ansonu sin anao nok fai,

⁴ma in anfe plenat i neu sin nak, “Mitolo' nai ambi kot nane kotin, mes kais mi'ko mis na'ko kot nane; ma miloitan ma mibalab nai he mipe' kot nane.

⁵Au ma au solalus sin of haim haumak kot nane. Ma leka ale atoni-atoni Ai anpoi hen laban ki, hai of mibain'om ma hai maen on afi ahunut.

⁶Sin of anli'u kai talantia na'lo na'ko kot nane, ma sin natenab nak hai maen on afi ahunut.

⁷Anbi tabu le nane hi mes ampoi mi'ko bale hi mitolo' ambine, ma misik kot nane nai. Hi UISNENO of nana'at nani neu ki.

⁸Leka hi misik milali te, hi motu mani kot nane, matom nok sa' le UISNENO naplenat nani neu ki. Nane hi mepu ma hi sutais es nane.”

⁹Nalali te Nai Yosua ansonu sin, ma sin al sin anao ma natolo' anbi aon neno tesan Ai anbi. Ai ma Betel sin atnanan, oke te sin anpao anbi nane. Mes Nai Yosua antup anbi um-ume to Israel.

¹⁰Ma nok-nok ana Nai Yosua anfen ma anfe plenat neu in solalus sin he nati' sin anibun nabuabon. Nalali te in ma ale anakaf to Israel sin neki pukan solalus nane anao neu Ai.

¹¹Pukan solalus nane sin nok Nai Yosua sin anao neu eno naek kot Ai, oke te sin nahakeb um-ume anbi aon bian a'li, anbi nane anmu'i nonof mese anbi sin nok kot nane.

¹²In anlenu oni atoni 5.000 ma sin natolo' anbi aon neno tesan kot nane, anbi Ai ma Betel atnanan.

¹³Es nane te, in naloitan ma nabalab solalus amakenat nane on i: bale tokos solalus nakaf nahakeb nani anbi bian a'li kot nane ma pukan olalus anbi neno tesan, mes Nai Yosua anbi fai nane in anao neu nonof kot nane.

¹⁴Leka kesel Ai Nai Yosua in solalus sin, in naloitan ma nabalab nok lab-lab hen laban sin. In nok ale in atoni-atoni sin anpoi ma anao neu Nonof Yordan hen maken nok atoni Israel anbi afi bale ahunut. In ka nahin fa nak ka lo fa of anken in na'ko kotin.

¹⁵Nai Yosua nok in solalus amakenat sin an asafanu naen kotin; sin naen an ali bale mnela snaen.

¹⁶Onane te ale atoni anbi kot Ai anibun sin hen li'u Nai Yosua ma in solalus sin nane. Mes leka sin anli'u Nai Yosua, onane te in na'lo na'ko sin kot.

¹⁷Ale atoni anbi kot Ai nanan sin anpoi ma anli'u atoni Israel, talantia kot nane sin nafetin natfai kun onane, katit fa apaot hen pao.

¹⁸Oke te UISNENO nakua a'an neu Nai Yosua nak, “Muaiti ho auni, ma mululu' neu Ai; kot nane tabu le i Au una'at ani neu ko.” Nai Yosua nanaoba plenat UISNENO nane.

¹⁹Leka Nai Yosua naiti in niman nok in auni onane te, solalus le sin natolo' nane nok lab-lab sin anfen ma nape' kot nane, oke te nasik nani kot nane.

²⁰Atoni-atoni Ai sin naklelo'on ma nika neu sin kotin, ma sin nit ai masu ansae antia neno atnanan. Nai Yosua ma in solalus sin amsa sit nit ai masu ansae ma sin nahin nak in solalus bian sin nasik nalali kot nane. Es nane te, Nai Yosua in naklelo'on anfani nok in solalu sin neu kot Ai ma sin namate atoni Ai. Ale atoni-atoni Israel le anbi kot Ai nane sin nem ma nape' kot nane, talantia sin an aum nan atoni Ai ma katit fa es he naen nafetin in aon. Katit fa es na'ko sin le he naen anpoi, atoni Israel namate sin ok-oke,

²³al kesel Ai. Sin anheke in oke te neki in anao neu Nai Yosua.

²⁴Leka solalus Israel namate nalali ale solalus musu ok-oke le anli'u sin anbi mnela snaen, sin anfani nem neu Ai, ma namate ale atoni anbi nane.

²⁵Nai Yosua in naiti in niman ma in auni piut neu kot Ai, ma in ka nasanut nani fa talantia namate nani ale atoni-atoni anbi Ai ok-oke. Neno nane amsa amates anabi kot Ai amfaun atoni 12.000 ok-oke, atoni ma bife.

²⁷Mu'it ma ale bale' le nasik nani anbi kot nane, atoni Israel sin naiti nani anfani sin in-ini kun, anmatom nok UISNENO In a'an neu Nai Yosua.

²⁸Ma Nai Yosua in notu nani kot Ai, ma anmo'e nani anfani fatu tutnae talantia neno i.

²⁹Kesel kot nane naboni in anbi ni, ma nafetin in anbi nane talantia neno anmabe. Leka neno antes, Nai Yosua anlenu he nasanut in ta'un nane na'ko ni ma anpolin anbi eno naek kot matan. Ma oke te nahakeb baki naek mese nok fatu namfau. fatu-fatu nane fe esan talantia neno i.

³⁰Nalali te Nai Yosua nahakeb baki tulu mese anbi Tubu Ebal neu UISNENO, Israel sin Uisneno.

³¹Baki tulu nane anmo'e nani matom nok lekat lulut anbi Nai Musa in Sulat, ate UISNENO nane, neu atoni-atoni Israel: “Baki tulu mese na'ko ale fatu le fe kan mepu nani fa neki bale pake besi.” Anbi baki tulu nane in fafon atoni Israel sin natulu neu UISNENO fua tulu mnotu ma sin fua tulu halan nekaf.

³²Ma anbi bale nane, atoni Israel ok-oke sin ansaksi, Nai Yosua antui UISNENO In aplenat neu fatu-fatu nane le matui anbi Nai Musa in Sulat.

³³Atoni-atoni Israel ok-oke, nok ale sin anakaf, ale sin solalus anakaf, ale sin alef lasi sin, ma atoni anao amnemat le natua nabua nok sin, sin anhake anbi Peti Fef Bela UISNENO aon bian am bian anbaina neu ale Ana' fuat knino Nai Lewi sin le anloi Peti Fef Bela nane. Atoni bian na'ko atoni-atoni nane sin anbaina neu Tubu Gerizim, ma bian anteni anbaina neu Tubu Ebal. On afi Nai Musa, UISNENO In ate nane, naplenat nani neu sin he nati' sin anmo'e lasi nane leka tabu antia neu sin hen simo tetus le UISNENO anba'an nalali.

³⁴Nalali te Nai Yosua anso'i ale aplenat nane ok-oke nok hanan nahel-hel matom nok le matui anbi Sulat Plenat knino, ale tetus ma ale kasat.

³⁵Nai Yosua anso'i ale plenat Nai Musa ok-oke neu to Israel ok-oke le nabuabon anbi nane, ale bife, li'ana, ma atoni anao amnemat le natua nok sin.